30 تامىزدا ەلىمىزدە كونستيتۋتسيا كۇنى كەڭىنەن اتالىپ ءوتتى. وسى مەرەكەگە وراي كوپتەگەن شارالار ۇيىمداستىرىلدى. سونىڭ ىشىندەگى باستى وقيعا قازاقستان رەسپۋبليكاسىنىڭ پرەزيدەنتى – قارۋلى كۇشتەردىڭ جوعارعى باس قولباسشىسى نۇرسۇلتان نازارباەۆتىڭ قاتىسۋىمەن “قازاق ەلى” مونۋمەنتى جانىنداعى الاڭدا وتكەن كونستيتۋتسيانىڭ 15 جىلدىعىنا ارنالعان اسكەري شەرۋ بولدى
شەرۋ باستالار الدىندا مەملەكەت باسشىسى ءسوز سويلەپ, وتانداستارىمىزدى كونستيتۋتسيا كۇنىمەن قۇتتىقتادى. مەرەكەلىك ءىس-شاراعا قاتىسۋشىلار الدىندا ءسويلەگەن سوزىندە ەلباسى قازاق تاريحىندا اتا زاڭنىڭ الاتىن ورنى, ونىڭ قازىرگى مەملەكەتتىلىگىمىزدىڭ دامۋىنا قوسىپ كەلە جاتقان ۇلەسى, كونستيتۋتسيانىڭ تاريحي ءمان-ماڭىزى تۋرالى ايتا كەلىپ, ەلىمىزدە تاۋەلسىزدىگىمىزدى جاريالاعان كەزدەن بەرى اتقارىلىپ جاتقان جۇمىستار مەن الداعى ماقسات-مىندەتتەرگە كەڭىنەن توقتالىپ ءوتتى. وسى رەتتە كونستيتۋتسيانىڭ 15 جىلدىعى اتالىپ جاتقان كۇننىڭ مەملەكەتىمىز ءۇشىن مەرەيلى مەجە, ايرىقشا ماڭىزدى كۇن بولىپ سانالاتىنى, اتا زاڭىمىزدىڭ ەلىمىزدىڭ ارايلى ازاتتىعىمىزدىڭ اينىماس ايعاعى, جارقىن بولاشاعىمىزدىڭ بۇلجىماس باعدارى ەكەنى, ول ەلدىگىمىزدىڭ التىن ارقاۋى, تولاعاي تابىستارىمىزدىڭ باستاۋ قاينارى بولىپ سانالاتىنى اتاپ كورسەتىلدى. ودان ءارى نۇرسۇلتان نازارباەۆ تاريحىمىزعا قىسقاشا توقتالىپ, سول ءبىر اتا-بابالارىمىزدىڭ اق نايزانىڭ ۇشىمەن, اق بىلەكتىڭ كۇشىمەن سىرتقى جاۋلارىمەن سوعىس ءجۇرگىزگەن كەزدەرى بيلىك باسىنداعى حان مەن بيلەردىڭ, سۇلتان مەن داتقالاردىڭ حالىقتىڭ باسىن بىرىكتىرۋدە اتا داستۇرىمىزگە نەگىزدەلگەن ءتۇرلى زاڭدىق, قۇقىقتىق كۇشى بار ەرەجەلەر مەن جارعىلاردى قابىلداعاندارىن اتاپ ايتتى جانە بەس ساۋساقتى بىرىكتىرۋ جولىندا ورداباسى مەن ۇلىتاۋدا, مارتوبە مەن كۇلتوبەدە كەلەلى كەڭەس قۇرعاندارىن جەتكىزدى. بۇل ورايدا زاڭدى باسشىلىققا العانىنىڭ ارقاسىندا حالقىمىزدىڭ بىرلىگى نىعايا تۇسكەنىن, سونىڭ ناتيجەسىندە سول تۇستاعى ەڭسەلى ەلدىكتىڭ ەرەجە بەلگىلەرى قالىپتاسقانىن مالىمدەدى.
نۇرسۇلتان ءابىش ۇلى كەلەسى كەزەكتە قازاق حالقى ءوز تاريحىندا تۇڭعىش رەت ءتول كونستيتۋتسياسىنا قول جەتكىزگەنىن, قازىر ول بۇكىل حالىقتىڭ تالقىسىنان ءوتىپ, ەلدىڭ يگىلىنە اينالىپ, مەملەكەتىمىزدىڭ باستى تولقۇجاتى بولىپ تابىلاتىنىن كولدەنەڭ تارتتى. كەڭەسكەن ەردە كەمشىلىك بولمايدى, كەلەلى ءىستى حالىق قولدايدى, دەدى ەلباسى وسى ورايدا. سىن ساعاتتا تاۋەلسىزدىگىمىزدىڭ كەپىلى بولعان قاستەرلى اتا زاڭىمىز – ۇلتتىق رۋحىمىزدىڭ اداستىرماس تەمىرقازىعىنا اينالدى. ءبىز بىرلىگىمىزدى بەكەمدەگەن ءباتۋالى بايلاممەن تاۋەلسىزدىگىمىزدى تۇعىرلى ەتتىك, تۇراقتىلىق پەن تۇتاستىقتى ساقتاپ, دەگەنىمىزگە جەتتىك. ءبىز جۇرەتىن جولىمىزدىڭ جاڭىلماس جوسىعى, تالعام-تاڭداۋىمىزدىڭ تارازىسى بولعان كونستيتۋتسيا ارقىلى ءىرگەلى ساياسي-ەكونوميكالىق رەفورمالاردى ىسكە اسىردىق. وسىلاي دەي كەلىپ, نۇرسۇلتان ءابىش ۇلى كونستيتۋتسيانىڭ كەپىلدىك ەتۋىمەن ءتۇرلى ەتنوس وكىلدەرىنىڭ ۋىزداي ۇيىعان ۇلىسىنا اينالعان قازاقستاننىڭ ونەگەسى بۇگىندە بۇكىل الەمگە ۇلگى رەتىندە ۇسىنىلىپ جاتقانىن, قازىر ءبىزدىڭ دۇنيەنى دۇرلىكتىرگەن قيىندىقتاردى ەڭسەرگەنىمىزدى, سونىڭ ءبارىن قاتۋلىقپەن ەمەس, تاتۋلىقپەن شەشكەنىمىزدى اتاپ ءوتتى.
ءبىز قول جەتپەس قياندا كورىنگەن بيىك بەلەستەردى باعىندىردىق. تارلان تاريح ءۇشىن تىم قىسقا بولىپ سانالاتىن از ۋاقىتتىڭ ءىشىندە عاسىرلىق ءمانى بار اۋقىمدى ىستەر اتقاردىق. ءبىز سارىارقانىڭ سايىن دالاسىندا سالتاناتى جاراسقان, ءزاۋلىم عيماراتتارى كوكپەن تالاسقان اسقاق استانانى سالدىق. ءبىز جاسامپاز جارعىمەن ءتورت قۇبىلامىز تەڭەلىپ, قاتارىمىزدان تورگە وزدىق. تورتكۇل دۇنيەگە ءتورەلىك ايتىپ, توبە بيگە قول سوزدىق, دەي كەلىپ, ەلباسى بيىل قازاقستان ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتىپ جاتقانىنا, تاياۋ ارادا ەلىمىزدە وسى بەدەلى بيىك ۇيىمعا مۇشە مەملەكەت باسشىلارىنىڭ ءسامميتى وتەتىنىنە, مۇنداي مارتەبەگە قازاق ەلى بۇرىن قول جەتكىزبەگەنىنە نازار اۋداردى. ودان ءارى پرەزيدەنت: كونستيتۋتسيانى قاستەرلەۋ – تۇپتەپ كەلگەندە –مەملەكەتتى قۇرمەتتەۋ دەگەن ءسوز! ەندەشە, ءبىز بارشامىزعا ونەگەلى قاعيداتتار ۇسىناتىن ۇستىنىمىز, جاسامپاز جارعىمىز – اتا زاڭدى ايرىقشا قۇرمەتتەۋىمىز كەرەك, دەدى.
استانانىڭ باس الاڭىندا سامۇرىعى تۇعىرىنا قونعان “قازاق ەلى” مونۋمەنتى مەن تاۋەلسىزدىك سارايىنىڭ الدىندا بىلتىردان بەرى وسىمەن ەكىنشى رەت وتكىزىلگەن اسكەري شەرۋ الدىندا مەملەكەت باسشىسى كونستيتۋتسيانىڭ, ونىڭ قۇرمەتىنە جاسالىپ جاتقان وسىناۋ مەرەكەنىڭ ءمان-ماڭىزى ءجونىندەگى ءسوزىن تومەندەگىشە جالعاستىردى. كەلەلى كونستيتۋتسيامىز – داۋعا قالدىرمايتىن امالىمىز, ايبارلى ارميامىز – جاۋعا قالدىرمايتىن قامالىمىز. وقتان قاعار اقبەرەن ساۋىتىمىز – ۇلتتىق اسكەرىمىز تاۋەلسىزدىگىمىز بەن تۇتاستىعىمىزدى قاس قاقپاي كۇزەتىپ تۇر. تاسقا باسىلعان تاريحىمىزدىڭ جارقىن تۇستارى ءبىزدى ەلدىك پەن ەرلىككە شاقىرادى. ەجەلدەن ەر دەگەن داڭقى شىققان باتىر بابالارىمىز كۇرەڭ ءمىنىپ, قوڭىراۋلى نايزا قولعا الىپ, جاۋعا بورىدەي تيگەن. كيەلى اتامەكەن, تۋعان جەر ءۇشىن جان بەرىسكەن باھادۇرلەر قاشاندا ارىن جانىنان بيىك باعالاعان, وتان ءۇشىن وت كەشىپ, ەل-جۇرتىن قورعاپ قالعان. ەسىل ەرلەردىڭ عۇمىرى ات ۇستىندە وتكەن, وسىلايشا, بىزگە قۇس ۇشسا قاناتى تالاتىن ۇلان-عايىر دالانى امانات ەتكەن. وسى اماناتتى كوزدىڭ قاراشىعىنداي ساقتاۋ – بۇگىنگى باتىرلاردىڭ قاستەرلى بورىشى, ۇلتتىق ارميانىڭ ۇلى مىندەتى. ساپ تۇزەگەن ساردارلار مەن ساربازدار ءۇشىن بۇدان اسقان مۇرات, بۇدان اسقان ابىروي بولمايدى. ەندەشە, ەلىمىزدىڭ ابىرويى اسقاقتاپ, ۇلتتىق اسكەرىمىزدىڭ داڭقى ارتا بەرسىن!
مەملەكەت باسشىسى, سونىمەن قاتار, ەلىمىزدە ازاتتىعىمىزدىڭ اق تاڭى ارايلاپ اتقان كۇننەن وسى كەزگە دەيىن ەلدىگىمىزدى, تاۋەلسىزدىگىمىزدى نىعايتۋدا اتقارىلعان قىرۋار جۇمىستار تۋرالى دا باياندادى. سوڭعى 10 جىلدا ءبىلىم بەرۋ جانە دەنساۋلىق ساقتاۋ سالالارىنا جۇمسالعان قارجى 8 ەسە وسكەنىنە, جاقىندا استانادا جاڭا ۋنيۆەرسيتەتتىڭ اشىلعانىنا, ءبىلىم بەرۋ, جاستاردىڭ جان-جاقتى بىلىكتى دە ءبىلىمدى بولۋى ءۇشىن مەملەكەت ودان ءارى جۇمىس ىستەي بەرەتىنىنە, وسىعان بايلانىستى ەلىمىزدە ينتەللەكتۋالدى مەكتەپتەردىڭ جەلىسى سالىنىپ جاتقانىنا توقتالدى. وسى ورايدا ەلباسى مەن ءححى عاسىردا قازاقستاندىقتار بارىنشا وقىمىستى, ءبىلىمدى جانە باسەكەگە قابىلەتتى ۇلت بولاتىنىنا سەنىمدىمىن, دەي كەلىپ, ەكونوميكا سالاسىندا اتقارىلىپ جاتقان جۇمىستارعا بايلانىستى بيىلعى جىلى جالپى قۇنى 800 ملرد. تەڭگەدەن اساتىن 140 يندۋستريالىق نىساننىڭ قۇرىلىسى اياقتالاتىنىن, ءسويتىپ, 20 مىڭ جاڭا جۇمىس ورنى اشىلاتىنىن قاپەرگە سالىپ ءوتتى. وسىنداي جۇمىستاردىڭ ءناتيجەسىندە ءبىز ەكونوميكالىق جاعىنان مىقتى ءارى تابىستى, ساياسي جاعىنان تۇراقتى مەملەكەت قۇردىق. ونى بۇكىل الەم باعالايدى جانە قۇرمەتتەيدى, دەدى پرەزيدەنت.
استانانىڭ اشىق اسپانى استىندا بيىل ەكىنشى مارتە ءوتكىزىلگەن شەرۋگە وفيتسەرلەر, كەلىسىم-شارت بويىنشا قىزمەت ەتىپ جاتقان اسكەري قىزمەتكەرلەر, ءاسكەري وقۋ ورىندارىنىڭ كۋرسانتتارى مەن ساربازداردان تۇراتىن 2200 ادامدى قۇرايتىن جاۋىنگەرلىك ەسەپتوپتار, 150-دەن استام قارۋ-جاراق پەن ءاسكەري تەحنيكا جانە 66 اۆياتسيالىق تەحنيكا قاتىستى. شەرۋدە الاڭدا ساپ ءتۇزەپ ءجۇرىپ وتكەن جاۋىنگەرلىك توپتار ەكى اي بويى استانانىڭ ماڭىنداعى قىرقىنشى ستانساداعى 68 665 اسكەري ءبولىم اۋماعىندا جاساقتالعان دالالىق لاگەردە دايىندالدى. ولاردىڭ اراسىندا بولعان كەڭەس وداعىنىڭ باتىرى, حالىق قاھارمانى, ارميا گەنەرالى ساعادات نۇرماعامبەتوۆ اتىنداعى “جاس ۇلان” رەسپۋبليكالىق مەكتەبىنىڭ جاس بارابانشىلارى مەن 80 ادامنان تۇراتىن نازىك جاندىلار ەسەپتوبى بيىل العاش رەت شەرۋگە قاتىسسا, جاياۋ اسكەرلەر جاۋىنگەرلىك ءماشينەلەرى (بمپ), تانكتەر الاڭنان ءجۇرىپ ءوتتى. وسىلاردىڭ ءبارىن الاڭعا ەرتەمەن جينالا باستاعان مىڭداعان استانالىقتار مەن قالا قوناقتارى, ارالارىندا شەتەلدىكتەر دە بار, شەرۋ بىتكەنشە قىزىعا تاماشالاپ وتىردى.
مەرەكەلىك پارادتى جاۋىنگەرلىك ەسەپتوپتار ىشىنەن “جاس ۇلان” رەسپۋبليكالىق مەكتەبىنىڭ جاس بارابانشىلارى اشتى. ودان سوڭ قورعانىس مينيسترلىگى ورتالىق اپپاراتى مەن قۇرلىق اسكەرلەرى وفيتسەرلەرى, اۋە قورعانىسى كۇشتەرى باس قولباسشىسىنىڭ باسقارماسى, اسكەري-تەڭىز كۇشتەرىنىڭ قۇراما روتاسى سالتاناتتى ساپپەن ءجۇرىپ ءوتتى.
وسىدان كەيىن شەرۋدى “سوعىس قۇدايى” اتانعان راكەتا اسكەرلەرى جانە ارتيللەريا جالعاستىرسا, ولاردان سوڭ “باتىس” وڭىرلىك قولباسشىلىعىنىڭ اسكەري قىزمەتشىلەرى مەن بيىل 10 جىلدىق مەرەيتويىن اتاپ وتكەن “كوگىلدىر بەرەتتى” دەسانتشىلار ساپ تۇزەدى. قاناتتى ۇلانداردان سوڭ الاڭدا قورعانىس مينيسترلىگىنىڭ قۇرمەتتى قاراۋىل روتاسى كورىندى. ولار 9 مامىردا ماسكەۋدە وتكەن ۇلى جەڭىستىڭ 65 جىلدىعىنا ارنالعان اسكەري پارادقا قازاقستان قارۋلى كۇشتەرىنىڭ اتىنان قاتىسىپ قايتقان بولاتىن.
ودان ءارى شەرۋگە قۇرلىق اسكەرلەرى اسكەري ينستيتۋتىنىڭ, راديوەلەكترونيكا, بايلانىس جانە اسكەري ينجەنەرلىك ينستيتۋتىنىڭ, سونداي-اق اۋە قورعانىس كۇشتەرىنىڭ ەكى مارتە كەڭەس وداعىنىڭ باتىرى تالعات بيگەلدينوۆ اتىنداعى اسكەري ينستيتۋتىنىڭ كۋرسانتتارى شىقتى. وسى جەردە قۇرلىق ءاسكەرلەرىنىڭ باس قولباسشىسى, گەنەرال-مايور مۇرات مايكەەۆتىڭ جەتەكشىلىگىمەن پارادقا قاتىسۋشىلار 5 شىلدەدەن باستاپ وسىناۋ مەرەكەلىك شاراعا دايىندىق جۇرگىزگەندەرىن, ال وفيتسەردىڭ ءوزى وتانعا ادال قىزمەتىنىڭ ارقاسىندا “ايبىن” سياقتى بىرنەشە مەملەكەتتىك ناگرادالارمەن ماراپاتتالعانىن اتاپ ءوتۋ ءجون. بيىل قۇرلىق اسكەرلەرىنىڭ اسكەري ينستيتۋتى قۇرىلعانىنا 40 جىل تولماق.
شەرۋدە بولاشاق وفيتسەرلەردىڭ سوڭىن الا قورعانىس مينيسترلىگىنىڭ ش.ءۋاليحانوۆ اتىنداعى كادەت كورپۋسىنىڭ روتاسى ساپ تۇزەپ شىقتى. بيىلعى پارادقا وتان قورعاۋ جولىنداعى جاۋىنگەرلىك تاپسىرمالاردى ەرلەرمەن بىرگە ورىنداپ جۇرگەن اسكەري ايەلدەردەن قۇرالعان ەسەپتوپ تۇڭعىش رەت قاتىستى. جاۋىنگەر بويجەتكەندەردىڭ شەرۋلىك ەسەپتوبى وڭتۇستىك جانە شىعىس وڭىردە قىزمەت ەتەتىن قىزداردان قۇرالىپتى. الاڭدا ولاردىڭ اسكەري كيىمى وزدەرىنە جاراسىپ تۇردى. شەرۋدە بويجەتكەن اسكەريلەر ەرلەردەن قالىسپاي ءوز مىندەتتەرىن ءتيىستى دەڭگەيدە اتقارىپ شىقتى. بويجەتكەندەردىڭ ەسەپتوبىنان سوڭ الاڭدا قارۋلى كۇشتەر اسكەري پوليتسياسىنىڭ وفيتسەرلەرى كورىندى. ولاردان كەيىن سالتاناتتى شەرۋدى ەلىمىزدىڭ ءوڭتۇستىك جانە شىعىس اۋماعىن قورعاپ جۇرگەن شەكاراشىلار – ىشكى ىستەر مينيسترلىگىنىڭ, ۇلتتىق قاۋىپسىزدىك كوميتەتىنىڭ, توتەنشە جاعدايلار جونىندەگى مينيسترلىكتىڭ جانە رەسپۋبليكالىق ۇلاننىڭ ءبولىمشەلەرى جالعاستىردى.
شەرۋدىڭ تاعى ءبىر قاۋمالاعان جۇرتشىلىق ءۇشىن قىزىقتى جەرى اسكەري قىزمەتشىلەردىڭ ەسەپتوپتارىنان سوڭ جاۋىنگەرلىك تەحنيكا ۇلگىلەرىنىڭ ءجۇرىپ, اسكەري اۆياتسيانىڭ استانا اسپانىندا قالىقتاپ كورسەتكەن ونەرى بولدى. مۇندا الدىمەن باس الاڭدا قۇرلىق ءاسكەرلەرىنىڭ, اۋە قورعانىسى كۇشتەرىنىڭ جانە اسكەري-تەڭىز كۇشتەرىنىڭ جاۋىنگەرلىك تۋلارىمەن “لەند روۆەرلەر” ءوتتى. ولاردىڭ ءىزىن الا قارۋلى كۇشتەردەگى ت-72ب تانكىسى مەن بمپ-2 جاياۋ اسكەر جاۋىنگەرلىك ماشينەلەرى ءجۇردى. اسكەري تەحنيكالار قوزعالىسىن “سترەلا-10م” زەنيتتى-زىمىراندى كەشەنى جالعاستىردى. وسىدان كەيىن الاڭدا وزدىگىنەن جۇرەتىن تانكىگە قارسى راكەتالىق “شتۋرم-س” كەشەنى كورىندى. بۇل تەحنيكا قوزعالاتىن جانە قوزعالمايتىن بروندى نىساندارعا جانە جاسىرىنىپ جاتقان جاۋ اسكەرلەرىن جويۋعا ارنالعان. شەرۋدە اسكەري تەحنيكالار قاتارىنان العاش رەت دەسانتتى شابۋىلداۋشى بريگادا مەن قازاقستان ءبىتىمگەرشىلىك باتالونىنىڭ تۋلارىن كوتەرگەن “حاممەر” اۆتوكولىكتەرى مەن قازىرگى زامانعا ساي جەتىلدىرىلگەن بتر-80ا كولونناسى شىقتى. ودان ءارى جاۋىنگەرلىك مۇمكىندىگى زور جىلجىمالى “تسيكادا” راديوكەدەرگى ستانساسى, بردم-2, 122 مم-لىك د-30 گاۋبيتساسىن ۇسىنعان بىرىككەن زىمىراندى-ارتيللەريالىق پولكتىڭ مەحانيكالاندىرىلعان كولونناسى ءجۇرىپ ءوتتى. بۇل قارۋ ءتۇرى ءوزىنىڭ جاۋىنگەرلىك سيپاتى جاعىنان ءتىرى كۇشتەردى جانە قارسىلاستىڭ بروندى تەحنيكاسىن كەز كەلگەن ۋاقىتتا جويا الادى. ول سول ءۇشىن اسا قاۋىپتى جانە بارلىق ەلدەر قىزىعاتىن قارۋ ءتۇرى بولىپ سانالادى. وسىدان سوڭ 152 مم “مستا-ب” گاۋبيتساسى بار ارتيللەريالىق باتارەيا ساپ تۇزەدى. بۇل قارۋ ءتۇرىنىڭ مۇمكىندىگى مينوتىنە جەتى رەت وق اتا الادى. شەرۋدى كاماز اۆتوكولىگىنە قوندىرىلعان “گراد”, “ۋراگان” سىندى دۇركىندەپ وق اتۋ رەاكتيۆتى جۇيەلەرى جالعاستىردى. ارتيللەريالىق جانە راكەتالىق قارۋلار ساپىندا “سمەرچ”, “توچكا-ۋ” سياقتى قۋاتتى قارۋلار بار.
جاۋىنگەرلىك تەحنيكانىڭ ءىزىن باسا قارۋلى كۇشتەردىڭ اۋە قورعانىسى كۇشتەرىنىڭ ماقتانىشى, اۋە شابۋىلىنان قورعانىس جۇيەسىنىڭ ەڭ سەنىمدى قارۋلارى س-125, س-200, س-300 ازۋلى زەنيتتى-زىمىراندى كەشەندەر شىقتى. ودان سوڭ اسكەري-اۋە پارادىن مەملەكەتتىڭ جانە اسكەر تەكتەرىنىڭ جالاۋلارىن جەلبىرەتىپ مي-17, مي-24, مي-17, مي-26 تىكۇشاقتارى جالعاستىردى. ال اۋە كۇشتەرىنىڭ قاۋمالاعان جۇرت قىزىعا كورەتىندەي كورسەتكەن كورىنىسى ءتورت سۋ-27 جاۋىنگەرلىك ۇشاقتارىنىڭ سۇيەمەلدەۋىمەن ەكى يل-76 اسكەري كولىكتىك اۋىر ۇشاقتارى كورسەتكەن اۋە شەرۋى بولدى. ولارعا ل-39 وقۋ-جاتتىعۋ ۇشاقتارىنىڭ قورشاۋىنداعى ەكى ان-26, سۋ-25, سۋ-27, ميگ-27, ميگ-29, ميگ-31 سياقتى شابۋىلداۋشى, بومبالاۋشى ۇشاقتار دا قوسىلدى.
اسكەري پاراد قۇرامىندا قورعانىس مينيسترلىگىنىڭ ورتالىق اسكەري وركەسترى, ىشكى اسكەرلەردىڭ ورتالىق وركەسترى مەن مينيسترلىك بولىمدەرىنىڭ جانە اسكەري-وقۋ ورىندارىنىڭ وركەسترلەرى بار ەسەپتوپتىڭ شەرۋىمەن اياقتالدى.
داستان كەنجالين, سۋرەتتەردى تۇسىرگەندەر س.بوندارەنكو, ب.وتارباەۆ.
الماتى مەرەكە قۇشاعىندا
30 تامىز ەرەكشە بولىپ تۇردى. جاز دا الماتىلىقتارمەن قوشتاسقىسى كەلمەگەندەي شۋاعىن شاشىپ-اق باقتى. مۇندايدا مەرەكەگە ءسان بەرەتىن اقباس الاتاۋ ءوزىنىڭ قوڭىر سامالىمەن جەلپۋىن دە ۇمىتپاعان. قالانىڭ استانا الاڭىنا اعىلعان جۇرت كولەڭكەنى كوپ ىزدەمەگەندەي.
استانا الاڭى استاناعا كوز تىكتى. الىپ ەكرانداردا اسكەري پاراد, ەلباسى نۇرسۇلتان نازارباەۆتىڭ جالىندى قۇتتىقتاۋ سوزدەرى. ال الاڭدا قازاقستان ەلىنىڭ اسپان تۇستەس تۋلارىنىڭ تەڭىز تولقىنى. ۇندەسىپ جاتقان, ۇيلەسىپ جاتقان اق تىلەكتەر.
بۇل مەرەكەنىڭ الماتىلىقتارعا قىمباتىراق بولاتىن ءبىر ءجونى بار, ول – اتا زاڭىمىز قابىلدانعاندا الماتى استانا ەدى. بۇگىنگى كۇنى حالىق 15 جىلدىق مەرەكەسىن تويلاپ وتىرعان كونستيتۋتسيامىز ومىرگە وسى قالادان باستاۋ العان. قاشاندا سولاي عوي – جۇرت جاقسىنى يەمدەنگىسى كەلەدى.
اتا زاڭىمىزدى مەرەكەلەۋشىلەر قاتارىنان اقباستى ارداگەرلەرىمىز كوزگە كوبىرەك شالىنادى. ونىڭ دا ءجونى بار. استانا ارقاعا كوشكەندە اعالار جاعى جاستارعا اق باتالارىن بەرىپ, جاڭا ورداعا شىعارىپ سالىپ, وزدەرى وسىندا قالعان. سويتسە دە, ولار شەت قالعان جوق, ارداگەرلەرگە قاشاندا قۇرمەت دايىن – بۇگىن دە ولاردى مەرەكەلىك سالتاناتتىڭ تورىنە شىعاردى.
ونەر ساڭلاقتارى دا جۇرتتىڭ ورتاسىندا, ولاردىڭ قۋانىشىن ءبولىسىپ ءجۇردى. بيبىگۇل تولەگەنوۆا, ءاسانالى ءاشىموۆ, ءسابيت ورازباەۆ, نۇرعالي نۇسىپجانوۆپەن ديدارلاسىپ قانا قويماي, ولاردىڭ جاقىننان لەبىزىن ەستىگەن حالىق ويىن-ساۋىقتى دا بىرگە تاماشالادى. ال ويىن-ساۋىق كۇنى بويى استانا الاڭىندا ءبىر ءسات تە تولاستاعان جوق, جاستار جاعى ونى ۇزىن كەشكە دەيىن سوزدى.
ءسىرا, وسىناۋ شات-شادىمان مەرەكەنىڭ ءوزىن اتا زاڭىمىزدىڭ سالتانات قۇرۋىنىڭ ءبىر كورىنىسى دەسە بولعانداي-اۋ.
“ەگەمەن-اقپارات”.