ەلىمىزدىڭ قۇقىق قورعاۋ جۇيەسىن رەفورمالاۋ ماسەلەلەرىنە ارنالعان كەڭەستە سويلەگەن سوزىندە مەملەكەت باسشىسى جاڭا رەفورمانىڭ ءمان-ماڭىزىنا ايرىقشا نازار اۋداردى. “قازاقستاندا قۇقىق قورعاۋ قىزمەتى مەن سوت جۇيەسىنىڭ تيىمدىلىگىن ارتتىرۋ جونىندەگى شارالار تۋرالى” جارلىققا قول قويدى. بۇگىندە جەر-جەرلەردە ءوتىپ جاتقان باسقوسۋلاردا, كەزدەسۋلەردە رەفورما جاڭا قۇقىق قورعاۋ جۇيەسىن ورنىقتىراتىن ماڭىزدى قادام رەتىندە باعالانۋدا. وبلىستىق اكىمدىكتىڭ ۇلكەن زالىندا قۇقىقتىق رەفورما مىندەتتەرىن تالقىلاۋعا ارنالعان جيىن ءوتتى.
كەڭەستى ءوڭىر باسشىسى سەرىك ءبىلالوۆ اشىپ, جۇرگىزىپ وتىردى. ول كۇن تارتىبىندە تالقىلانىپ وتىرعان ماسەلەنىڭ ايرىقشا وزەكتىلىگىن اتاپ كورسەتتى. پرەزيدەنت قۇقىق قورعاۋ ورگاندارىمەن قاتار جەرگىلىكتى اتقارۋشى ورىندارعا دا قۇقىق بۇزۋشىلىقتىڭ الدىن الۋ جانە قۇقىق ءتارتىبىن قامتاماسىز ەتۋ جونىندە جوعارى جاۋاپكەرشىلىك جۇكتەدى, دەدى ول. وبلىس پروكۋرورى اسقار دوسەكەنوۆ ءوز سوزىندە جارلىق قۇقىق قورعاۋ ورگاندارىن ەسكى جۇمىس ادىستەرىنەن ارىلتىپ, كۇندەلىكتى ءىس-ارەكەتىن جاڭاشا ءارى ساپالى سيپاتتا ۇيلەستىرۋگە باعىتتايتىنىن ايتا كەلىپ پروكۋراتۋرا ورگاندارىنىڭ قۇقىق قورعاۋ قىزمەتىنە قاتىستى ۇيلەستىرۋ فۋنكتسياسىن كۇشەيتۋ, پروكۋرورعا قىلمىستىق قۋدالاۋدىڭ زاڭدىلىعىن, ونىڭ ىشىندە قىلمىستىق ءىستىڭ قوزعالۋىن قاداعالاۋ جونىندە قوسىمشا مىندەتتەر, ونىڭ سوتقا دەيىنگى ءىس جۇرگىزۋدەگى ءرولى مەن جاۋاپكەرشىلىگىن ارتتىرۋ تالاپتارى جۇكتەلگەنىن تىلگە تيەك ەتتى. ۇلتتىق قاۋىپسىزدىك كوميتەتى وبلىستىق دەپارتامەنتىنىڭ باستىعى نۇرلان قىدىرباەۆ جارلىق تالاپتارىنان تۋىندايتىن ماڭىزدى ماسەلەنىڭ ءبىرى بۇدان بىلاي قىزمەتتەردىڭ قايتالانۋىنا جول بەرىلمەيتىنى, دەدى. ترانسۇلتتىق ەسىرتكى قىلمىسىنان باسقا ەسىرتكى قىلمىستارىن تەرگەۋ ىشكى ىستەر مينيسترلىگىنە بەرىلىپ, وكىلەتتىكتەر ايقىندالدى.
وبلىستىق سوتتىڭ توراعاسى نۇرعازى ءابدىحانوۆ جينالعاندار نازارىن سوت جۇيەسىندەگى اۋقىمدى قۇرىلىمدىق, ۇيىمدىق وزگەرىستەرگە اۋداردى. جوعارعى سوت جانىنان سوتتاردىڭ قىزمەتىن قامتاماسىز ەتۋ دەپارتامەنتىنىڭ قۇرىلۋى سوتتاردىڭ قىزمەتىن ۇيىمداستىرۋدى جانە ماتەريالدىق-تەحنيكالىق جاعىنان ودان ءارى جاقسارتۋدى كوزدەيدى. مەملەكەتكە زيان كەلگەن جاعدايدا, تاراپتاردىڭ بىتىمگە كەلۋىنە بايلانىستى ادامداردى قىلمىستىق جاۋاپكەرشىلىكتەن بوساتۋ ءتارتىبىن رەتتەۋگە ءارى ونشا اۋىر ەمەس جانە اۋىرلىعى ورتاشا ەكونوميكالىق قىلمىس جاساعان ادامداردى قاماۋعا الۋ شارالارىن قولدانۋدا شەكتەۋلەردىڭ بەلگىلەنۋى, كەلتىرىلگەن زياندى ءوز ەركىمەن وتەگەن جاعدايدا قىلمىستىق جاۋاپكەرشىلىكتەن بوساتۋ, باس بوستاندىعىنان ايىرۋعا بايلانىستى ەمەس جازالاردى, ونىڭ ىشىندە ايىپپۇل, قوعامدىق جۇمىستار جانە باس بوستاندىعىن شەكتەۋ, سونداي-اق قاماۋعا الۋعا بالاما جازالار قولدانۋ سالاسىن كەڭەيتۋ مۇنىڭ ءبارى قىلمىستىق ساياساتتى ىزگىلەندىرۋدەن تۋعان يگى ماقساتتار بولىپ تابىلادى.
جيىندا سونداي-اق وبلىستىق ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتى باستىعى مالعاجدار ءتاتكەەۆ, وبلىستىق ىشكى ءىستەر دەپارتامەنتى باستىعىنىڭ ءبىرىنشى ورىنباسارى ا.دەرمانوۆسكي سويلەپ, جۇمىس ءتيىمدىلىگىن جەتىلدىرۋدىڭ جولدارىن اڭگىمەلەدى.
ءومىر ەسقالي, سولتۇستىك قازاقستان وبلىسى.