وسكەمەندەگى دەنى دۇرىس دەگەن “ۆوستوك” ستاديونىنىڭ كۇيى كەتىپ, سۇرقى قاشقانىنا دا ءبىراز جىلداردىڭ ءجۇزى بولعان-تىن. وبلىستى باسقارعان تالاي باسشى ستاديوندى جوندەيمىز دەپ ۋادە بەرگەنىمەن, ول ورىندالماي كەلگەن ەدى. ءوڭىر باسشىسى ب.ساپارباەۆ ستاديوندى ارالاپ, ونى ءجوندەگەن ءجون دەپ تاپتى. ارتىنشا “قازاقمىس” كورپوراتسياسى باسشىلارىمەن ۋاعدالاستىققا قول قويعان ەدى.
قازىر مۇندا قۇرىلىس جۇمىستارى قىزۋ ءجۇرىپ جاتىر. ءبىر كەزدەرى “ۆوستوك” سپورت كلۋبىن ۇزاق جىلدار باسقارعان, قازىر وسكەمەن قالالىق ءماسليحاتىنىڭ حاتشىسى ۆلاديمير گولوۆاتيۋكتىڭ ايتۋىنشا, ستاديوندى جاڭارتۋعا دەپ بولىنگەن 600 ميلليون تەڭگە ءماسليحات دەپۋتاتتارىنىڭ قاتاڭ نازارىندا ەكەن. باتىس تريبۋنا جابىق بولىپ, جاڭا گازون توسەلمەك. ۇزىندىققا جانە بيىكتىككە سەكىرۋ, باسقا دا الاڭدارعا سوڭعى جابدىقتار ورناتىلماق. قىسقاسى, جاڭا ستاديون كوپشىلىك ءجيى جينالاتىن ورىنعا اينالماق.
وڭداسىن ەلۋباي, وسكەمەن.