“نۇر وتان” حالىقتىق-دەموكراتيالىق پارتياسى ەلباسى, پارتيا توراعاسى ن.ءا.نازارباەۆتىڭ ەرەكشە تاپسىرماسى بويىنشا الەۋمەتتىك ماڭىزى بار مەملەكەتتىك باعدارلامالاردىڭ, ءبىرىنشى كەزەڭدە ۇدەمەلى يندۋستريالىق-يننوۆاتسيالىق دامۋ باعدارلاماسىنىڭ جۇزەگە اسىرىلۋىنا قاتاڭ باقىلاۋ جاساۋدا. بۇگىنگى تاڭدا وسى باعىتتاعى ەلىمىزدەگى ەڭ ءبىر ەلەۋلى جوبا – “باتىس ەۋروپا – باتىس قىتاي” حالىقارالىق كۇرەجول قۇرىلىسى ەكەنى بارشاعا ايان.
“باتىس ەۋروپا – باتىس قىتاي” حالىقارالىق جوباسى اياسىندا قىزىلوردا وبلىسى اۋماعىندا سالىنىپ جاتىرعان 812 شاقىرىم جول بويىنا “نۇر وتان” حدپ-نىڭ 14 پارتيالىق باقىلاۋ بەكەتتەرى قونىس تەپكەن. وسى بەكەتتەردىڭ تىنىس-تىرشىلىگىمەن تانىسۋدى ماقسات ەتكەن “نۇر وتان” حدپ توراعاسىنىڭ ءبىرىنشى ورىنباسارى نۇرلان نىعماتۋلين سىر ايماعىنا كەلىپ, ساپارىن “باتىس ەۋروپا – باتىس قىتاي” كۇرەجول قۇرىلىسىمەن تانىسۋدان باستادى.
سىر ايماعىنان وتەتىن 811,7 شاقىرىم جول قۇرىلىسىنىڭ بۇگىنگى تاڭدا اينالما جول سالۋ – 114 شاقىرىمعا, جەر توسەلىمىن توسەۋ – 4712,0 مىڭ تەكشە مەترگە, جولدىڭ جايعاسۋ قاباتى – 94 شاقىرىمعا, نەگىزگى قاباتتى ورنالاستىرۋ – 71 شاقىرىمعا, اسفالتبەتوندى جول سالۋ – 48 شاقىرىمعا, ال جولدىڭ تومەنگى قاباتىنىڭ اسفالت توسەلىمى 21 شاقىرىمعا ورىندالعان. حالىقارالىق قۇرىلىسقا اينالعان وسى ايتۋلى جوبا جەرگىلىكتى حالىقتى جۇمىسپەن قامتاماسىز ەتۋگە زور سەپتىگىن تيگىزىپ وتىر. بۇگىندە تىكەلەي جول قۇرىلىسىندا جۇمىس ىستەپ جاتقان 4340 ادامنىڭ 2408-ءى جەرگىلىكتى تۇرعىندار. ولاردىڭ ورتاشا ايلىق جالاقىلارى 87,0 مىڭ تەڭگە كورىنەدى. حالىقارالىق قۇرىلىس ايماقتىڭ ەكونوميكاسىنىڭ دامۋىنا دا سۇبەلى ۇلەس قوسۋدا. اتاپ ايتار بولساق, جاڭاقورعان, شيەلى اۋداندارىندا شاعىل تاس زاۋىتتارى, قىزىلوردا قالاسىندا بيتۋم زاۋىتى سالىنىپ, پايدالانۋعا بەرىلدى. سونداي-اق مەردىگەرلەر 17 اسفالت-بەتون زاۋىتىن جول بويىنا ورنالاستىرۋعا ءتيىس بولسا, سونىڭ بۇگىنگى كۇنى 7-ءۋى جۇمىس ىستەپ تۇر. قۇرىلىس باسىندا باس جانە قوسالقى مەردىگەرلەردىڭ 196 جول-قۇرىلىس تەحنيكالارى توقتاۋسىز جۇمىس جاساۋدا.
“باتىس ەۋروپا – باتىس قىتاي” حالىقارالىق كولىك دالىزىندەگى جوعارىداعى جۇمىستارمەن, سونداي-اق پارتيالىق باقىلاۋ بەكەتتەرىنىڭ جۇمىستارىمەن ەگجەي-تەگجەيلى تانىسقان ن.نىعماتۋلين:
– ەلباسىمىز, پارتيامىزدىڭ ءتوراعاسى نۇرسۇلتان ءابىش ۇلى نازارباەۆتىڭ تىكەلەي تاپسىرماسىنا سايكەس “باتىس ەۋروپا – باتىس قىتاي” حالىقارالىق قۇرىلىس جوباسى باستالعان كۇننەن ەلىمىزدىڭ بارلىق ايماعىندا پارتيالىق باقىلاۋ بەكەتتەرى قۇرىلدى. باقىلاۋ بەكەتتەرى تاپسىرمانىڭ ۋاقتىلى ورىندالۋىن, قارجىنىڭ ماقساتتى جۇمسالۋىن قاداعالاپ قانا قويماي, ەڭبەك زاڭدىلىعىنىڭ ساقتالۋىن قاتاڭ باقىلاۋعا الىپ وتىر. پارتيالىق قاتاڭ باقىلاۋدىڭ ءناتيجەسىندە قازىردىڭ وزىندە جەرگىلىكتى جۇمىسشىلاردىڭ كوپتەگەن تولعاقتى ماسەلەلەرى ءوز شەشىمدەرىن تاپتى دەۋگە ابدەن بولادى, – دەدى.
ن.نىعماتۋلين ساپارى بارىسىندا “نۇر وتان” حدپ-نىڭ قىزىلوردا وبلاستىق فيليالىنىڭ باستاۋىش پارتيا ۇيىمى ءتوراعالارىمەن كەزدەسۋ وتكىزدى. جيىنعا باستاۋىش پارتيا ۇيىمدارىنىڭ توراعالارى مەن وبلىستىق جانە اۋماقتىق پارتيا فيليالدارى توراعالارىنىڭ ءبىرىنشى ورىنباسارلارى قاتىستى. جيىندا ءسوز العان ن.نىعماتۋلين پارتيانىڭ نەگىزگى كۇشى ساناتىنا جاتاتىن باستاۋىش پارتيا ۇيىمدارىنىڭ قازىرگى تىنىس-تىرشىلىكتەرى مەن الدا تۇرعان مىندەتتەرى جايلى بايان ەتتى.
– وزدەرىڭىز بىلەسىزدەر, – دەدى ءوز سوزىندە ن.نىعماتۋلين, – ەلباسىمىز, “نۇر وتان” حدپ-نىڭ توراعاسى نۇرسۇلتان ءابىش ۇلى نازارباەۆ الداعى 10 جىلدىق دامۋ باعىتتارىن كورسەتكەن تاريحي جولداۋدا ايتىلعان ماڭىزدى جوبالاردى, جوسپارلاردى جۇزەگە اسىرۋدا “نۇر وتان” پارتياسىنا ۇلكەن سەنىم ارتىپ وتىر. سونىڭ ىشىندە باستاۋىش پارتيا ۇيىمدارىنىڭ الار ورنى دا ەرەكشە.
ن.نىعماتۋلين ءوز سوزىندە پارتيانىڭ قىزىلوردا وبلىستىق فيليالى جۇمىسىندا كەمشىلىكتەردىڭ دە جوق ەمەس ەكەنىن اشىق ايتتى. مىسالى, پارتيانىڭ “قوعامدىق قابىلداۋ” بولىمدەرىنە حالىقتار تاراپىنان وتىنىشتەر تولاسسىز تۇسۋدە. اعىمداعى جىلدىڭ وتكەن 7 ايىندا رەسپۋبليكا بويىنشا “قوعامدىق قابىلداۋ” بولىمدەرىنە 41 مىڭنان استام ادامداردان وتىنىشتەر كەلىپ تۇسكەن. وكىنىشكە قاراي, وسىنداي ءتيىمدى جۇمىس ءتاسىلى قىزىلوردا وبلىسىندا ويداعىداي ىسكە اسىرىلماي وتىر. سونداي-اق سوڭعى ەكى جىلدا پارتيانىڭ مۇشەلىك جارنالارىن جيناۋ دا ءوز دەڭگەيىندە ەمەس. وبلىستا پارتيالىق ىشكى ءتارتىپتى ساقتاۋ ماسەلەسى دە ەرەكشە نازار اۋدارتادى. سىر ايماعىندا جىل باسىنان بەرى 15 ادام سىبايلاس جەمقورلىق سالدارىنان پارتيا قاتارىنان شىعارىلعان. كادرلار تاڭداۋدا دا كەلەڭسىزدىكتەر جوق ەمەس.
جيىن سوڭىنان ن.نىعماتۋلين پارتيانىڭ وبلىستىق فيليالىنىڭ “قوعامدىق قابىلداۋ” بولىمىندە بىرقاتار وبلىس تۇرعىندارىن قابىلدادى.
“نۇر وتان” حالىقتىق دەموكراتيالىق پارتياسى توراعاسى ءبىرىنشى ورىنباسارىنىڭ سىر ايماعىنا ساپارى بارىسىندا قىزىلوردا وبلىسىنىڭ اكىمى, “نۇر وتان” حدپ قىزىلوردا وبلىستىق فيليالى ساياسي كەڭەسىنىڭ بيۋرو مۇشەسى ب.قۋاندىقوۆ, “نۇر وتان” حدپ قىزىلوردا وبلىستىق فيليالىنىڭ ءتوراعاسى, وبلىستىق ءماسليحات حاتشىسى ن.قۇدايبەرگەنوۆ بىرگە بولدى.
ەركىن ءابىل. قىزىلوردا.