كەشە پارلامەنت سەناتىنىڭ توراعاسى قاسىم-جومارت توقاەۆ بۇۇ باس حاتشىسىنىڭ ارناۋلى وكىلى, بۇۇ-نىڭ ورتالىق ازيا ءۇشىن ايماقتىق بىتىمگەرلىك ديپلوماتيا ورتالىعىنىڭ باسشىسى ميروسلاۆ ەنچانى قابىلدادى, دەپ حابارلادى پارلامەنت سەناتىنىڭ ءباسپاسوز قىزمەتى.
كەزدەسۋ بارىسىندا قازاقستاننىڭ بۇۇ-مەن ىنتىماقتاستىعىن ودان ءارى دامىتۋ ماسەلەلەرى بويىنشا پىكىر الماسىلدى.
قازاقستان رەسپۋبليكاسى مەن بۇۇ-نىڭ ءوزارا بەلسەندى ءىس-قيمىلىن اتاپ وتە كەلىپ, توراعا ءبىزدىڭ ەلىمىزدىڭ ۇيىم ينستيتۋتتارىمەن بايلانىستارىن دامىتۋعا ءمۇددەلى ەكەنىنە توقتالدى. “ۋاقىت ورتالىق ازيا ايماعىندا بۇۇ-نىڭ بولۋى قاجەتتىگىن دالەلدەپ وتىر”, – دەدى ق.توقاەۆ.
توراعانىڭ پىكىرىنشە, جاپپاي قىرىپ-جويۋ قارۋىنان باس تارتۋدىڭ بۇكىلدۇنيەجۇزىلىك كۇنىنە ارنالعان كونفەرەنتسياعا بۇۇ-نىڭ قۇرىلىمدىق بولىمشەسى باسشىسىنىڭ قاتىسۋى ۇيىمنىڭ قارۋسىزدانۋ جانە قارۋدى تاراتپاۋ سالاسىنداعى قازاقستان باسشىلىعىنىڭ باستامالارىن قولدايتىنىن كورسەتىپ وتىر.
قىرعىزستانداعى جاعدايدى تالقىلاۋ بارىسىندا قازاقستان ىشكى ساياسي تۇراقتىلىق پەن ۇلتتىق ەكونوميكانى دامىتۋدى قامتاماسىز ەتۋگە باعىتتالعان قىرعىزستاننىڭ جاڭا باسشىلىعىنىڭ باعدارىن قولدايتىنىن اتاپ ءوتتى. ق.توقاەۆ ەقىۇ سامميتىنە كەلۋى كۇتىلىپ وتىرعان بۇۇ باس حاتشىسى پان گي مۋنعا ىزگى تىلەكتەستىگىن جولدادى.
م.ەنچا بۇۇ-نىڭ ايماقتىق ءبىتىمگەرلىك ورتالىعىنىڭ قازاقستانمەن ءوزارا ءىس-قيمىلىنىڭ دەڭگەيىن جوعارى باعالادى جانە ورتالىققا قولداۋ بىلدىرگەنى ءۇشىن سەنات توراعاسى ق.توقاەۆقا ريزاشىلىق ءبىلدىردى. “ەگەر دە مۇنداي ايماقتىق قۇرىلىم بولماسا, ورتالىق ازيا وڭىرىندە ارەكەت ەتۋ كۇردەلى بولاتىن ەدى”, – دەدى بولىمشە باسشىسى.