اعىمداعى جىلدىڭ العاشقى جارتىجىلدىعى دا جىلجىپ وتە شىقتى. كوپ كوكەيىندە سىر ايماعىنىڭ دامۋ دارەجەسى قانداي دەڭگەيدە دەگەن ساۋال تۇرادى. وسى ساۋالعا ناقتى جاۋاپ بەرۋدى ماقسات ەتكەن وبلىس اكىمدىگىندە وبلىس اكىمى بولاتبەك قۋاندىقوۆتىڭ توراعالىعىمەن ءماجىلىس ءوتتى.
وتكەن جىلمەن سالىستىرعاندا اعىمداعى جىلدىڭ العاشقى جارتىجىلدىعىندا سىر ايماعىنىڭ الەۋمەتتىك-ەكونوميكالىق دامۋىندا كوش ىلگەرىلەۋشىلىك بار سىڭايلى. ەگەر سارالاپ ايتار بولساق, وبلىستاعى ونەركاسىپ كاسىپورىندارى 367,7 ملرد. تەڭگەنىڭ ونىمدەرىن وندىرگەن. ايماقتىڭ باستى سالاسى – اۋىل شارۋاشىلىعىندا دا ايتارلىقتاي تابىس بار. ال, نەگىزگى قورعا تارتىلعان ينۆەستيتسيا وتكەن جىلدىڭ ءتيىستى كەزەڭىمەن سالىستىرعاندا 89,1 پايىزعا ارتقان. ۇدەمەلى يندۋستريالىق-يننوۆاتسيالىق باعدارلاما اياسىندا العاشقى جارتىجىلدىقتا جالپى قۇنى 12,3 ملرد. تەڭگە بولاتىن 7 جوبا ىسكە قوسىلعان. وتكەن جارتىجىلدىقتا بارلىق قارجى كوزدەرى ارقىلى شاعىن جانە ورتا كاسىپكەرلىك نىساندارىنا 4,7 ملرد. تەڭگە نەسيە بەرىلسە, “جول كارتاسى” باعدارلاماسى بويىنشا 107,6 شاقىرىم جولعا كۇردەلى جانە ورتاشا جوندەۋ جۇمىستارى جۇرگىزىلۋدە.
ەل دامۋىنا نەگىز قالايتىن قازاقستاننىڭ 2015 جىلعا دەيىنگى ۇدەمەلى يندۋستريالىق-يننوۆاتسيالىق دامۋ باعدارلاماسى بويىنشا سىر ايماعىندا ىرىكتەلىپ الىنعان 54 ينۆەستيتسيالىق جوبانىڭ 12-ءسى يندۋستريالاندىرۋ كارتاسىنا ەنگىزىلىپ, ونىڭ 7-ءۋى بيىلعى جىلدىڭ جارتىجىلدىعىندا ىسكە قوسىلدى. اتاپ ايتار بولساق, “ۋاد” جشس يەلىگىندەگى تاۋلىگىنە 500 توننا ءونىم شىعاراتىن بيتۋم زاۋىتى, اقشابۇلاق كەنىشىندەگى ىلەسپە گازدى وڭدەۋ كەشەنىنىڭ ەكىنشى كەزەڭى, جاڭاقورعان اۋدانىنداعى “شالقيا – نەرۋد كومپانياسى” جشس-ءنىڭ جىلدىق ەڭبەك ونىمدىلىگى 300 مىڭ توننادان اسىپ جىعىلاتىن تاس پايدالانۋ كەشەنى پايدالانۋعا بەرىلدى. سونداي-اق قىزىلورداداعى “شاپاعات ءسۇت” جشس-ءنىڭ نان زاۋىتى پايدالانۋعا بەرىلىپ, تۇتىنۋشىلارعا نان ونىمدەرىن تاراتۋدا. يندۋستريالاندىرۋ كارتاسىنا ەنگىزىلگەن جوبالاردىڭ ىشىندەگى “كريستالل مەنەدجمەنت” كومپانياسىنىڭ گاز-تۋربينالى ەلەكتر ستانساسى مەن “تاتۋ اگرو” جشس-ءنىڭ تومات ءوندىرۋ تسەحى كەلەر جىلى ىسكە قوسىلادى دەپ كۇتىلۋدە. ال, “رزا” اق تاۋارلى ءسۇت فەرماسىن, “ۋاد” جشس اسفالت شىعارۋ زاۋىتىن, “پەتروقازاقستانقۇمكولرەسورسيز” اق گاز-تۋربينالى ستانساسىن ىسكە قوسپاق.
ايتا كەتۋ كەرەك, ەنەرگەتيكا سالاسىندا دا يگىلىكتى جوبالار قولعا الىنىپ, جوسپارلى جۇرگىزىلۋدە. اتاپ ايتقاندا, بيۋدجەتتەن بولىنگەن 743,26 ملن. تەڭگەگە وبلىس ورتالىعىنداعى 6 قوسالقى ستانساعا قايتا جاڭعىرتۋ جۇمىستارى جاسالسا, تۇتىنۋشىلاردى سەنىمدى ەلەكترمەن جابدىقتاۋ ءۇشىن “قىزىلوردا ەلەكتر تاراتۋ توراپتارى كومپانياسى” اق ءوز قاراجاتى ەسەبىنەن جوسپارلانعان 1100 شاقىرىم ەلەكتر جەلىلەرىنىڭ بۇگىنگى تاڭدا 367 شاقىرىمىنا جوندەۋ جۇمىستارىن جۇرگىزدى. سونداي-اق “اتد”, “زاپادنايا”, “يۋجنايا” قوسالقى ستانسالارى مەن تاراتۋ پۋنكتتەرىن جاڭعىرتۋ جۇمىستارى باستالدى.
اعىمداعى جىلى قىزىلوردادا ماڭىزدى جوبا “قىزىلوردا قالاسىنىڭ جىلۋ جانە ەنەرگيا كوزدەرى مەن تۇرعىن ءۇي سەكتورىن ىلەسپە گازعا كوشىرۋ” جوباسىنىڭ ەكىنشى كەزەڭى جۇرگىزىلۋدە. بۇل ماقساتقا 14 ملرد. تەڭگە قارجى بولىنگەن. جوبا بويىنشا بيىلعى جىلى قالادا شامامەن 8,5 مىڭ ۇيگە گاز قوندىرعىلارى ورناتىلماق.
بيىلعى جىلى سىر ايماعىنىڭ اۋىل شارۋاشىلىعى سالاسىنا دا سەرپىن بەرۋ ماقساتىندا يگىلىكتى جوبالار جۇزەگە اسىرىلا باستادى. ياعني, وڭىردە جالپى قۇنى 12 ملرد. تەڭگەنى قۇرايتىن 16 اگروونەركاسىپ جوباسىن ىسكە اسىرۋ قولعا الىنۋدا. وبلىس تۇرعىندارىن ساپالى اۋىز سۋمەن قامتاماسىز ەتۋ باعدارلاماسى اياسىندا رەسپۋبليكالىق بيۋدجەتتەن بولىنگەن قارجىعا 14 جوبا ىسكە اسىرىلۋدا.
ايماقتىڭ الەۋمەتتىك احۋالىن ارتتىرۋدا دا ايشىقتى جۇمىستار اتقارىلۋدا. ايماقتا مەملەكەتتىك عيماراتتار مەن تۇرعىن ءۇي قۇرىلىستارى جارىسا بوي كوتەرۋدە. سونىمەن قاتار ۇستىمىزدەگى جىلى 8670 جاڭا جۇمىس ورنىن اشۋ كوزدەلگەن بولسا, العاشقى جارتىجىلدىقتا 7668 جۇمىس ورنى اشىلدى.
– وبلىس بويىنشا رەسمي جۇمىسسىزدىق دەڭگەيى وتكەن جىلعىدان 0,1 پايىزعا تومەندەگەن,– دەدى وبلىس اكىمى ب.قۋاندىقوۆ. – بىراق كەيبىر اۋدانداردا, اتاپ ايتقاندا, جالاعاش, شيەلى, جاڭاقورعان اۋداندارىندا تۇرعىنداردى جۇمىسپەن قامتاماسىز ەتۋ ويداعىداي ەمەس.
وبلىس اكىمى ايماقتىڭ الەۋمەتتىك-ەكونوميكالىق دامۋىندا ىلگەرىلەۋشىلىك بولعانىمەن كەيبىر سالالاردا كەمشىلىكتەر دە جوق ەمەس ەكەندىگىن باسا ايتتى. ايماقتا سۋ جۇيەلەرىن رەسپۋبليكالىق مەنشىككە بەرۋ جۇمىستارى باياۋ جۇرگىزىلۋدە. مال تۇقىمىن اسىلداندىرىپ, ت ۇلىكتەر باسىن كوبەيتۋگە ءتۇرلى قارجى كوزدەرىنەن قولداۋ جاسالىپ وتىرعانىمەن بۇل سالادا اتقارىلىپ جاتقان جۇمىس اۋقىمى كوڭىلدى كونشىتپەيدى. سونداي-اق بالىق شارۋاشىلىعىن دامىتۋ باعدارلاماسىنىڭ تەحنيكالىق-ەكونوميكالىق نەگىزدەمەسىن ازىرلەۋگە قارجى قارالسا دا باياۋلىق باسىم. ايماقتا تۇرعىن ءۇي قۇرىلىسى وتكەن جىلعىداي قارقىندى ەمەس.
وبلىس اكىمى ەسەپتى كەزەڭدە ەڭبەكاقى قارىزدارىنىڭ قوردالانىپ كەلە جاتقانىن دا قاداپ ايتتى.
– قازىرگىدەي داعدارىس كەزىندە جۇمىسشىلارعا بەرەشەك قارىزدارىن جەكە كاسىپكەرلەر عانا ەمەس, مەملەكەتتىك كوممۋنالدىق مەكەمەلەردىڭ تولىقتىرۋى مۇلدەم تۇسىنىكسىز ءارى كەشىرىلمەيتىن جايت, – دەگەن ول اۋدان اكىمدەرىنە, سالا باسشىلارىنا قاتاڭ تالاپتار قويدى.
العاشقى جارتىجىلدىقتىڭ قورىتىندىسىندا وبلىس بيۋدجەتىنىڭ كىرىسى 101,6 پايىزعا ورىندالعان. سالىق تۇسىمدەرى مەن قورشاعان ورتاعا ەميسسيا تولەماقىسىنىڭ ارتۋىنان وبلىستىڭ كىرىسى 112,1 پايىزعا ورىندالسا, ال بيۋدجەت شىعىسىنىڭ ورىندالۋى 92,6 پايىزدى قۇرايدى ەكەن. رەسپۋبليكالىق بيۋدجەتتەن الىنعان نىسانالى ترانسفەرتتەر 93,6 پايىزعا يگەرىلگەن. شىعىندار كورسەتكىشىنىڭ ورىندالماي قالۋى كەيبىر سالادا مەملەكەتتىك ساتىپ الۋ كونكۋرستارىنىڭ مەرزىمىنەن كەش وتكىزىلۋىنەن بولىپ وتىرعان سىڭايلى. سونداي-اق ءوز مىندەتتەرىنە سالعىرت قارايتىن مەردىگەرلەر دە جوق ەمەس. وسىعان بايلانىستى وبلىس اكىمى بيىلعى جىلدىڭ ەكىنشى جارتىجىلدىعىندا بولىنگەن قارجىنى تولىق يگەرۋدى نازاردا ۇستاۋ كەرەكتىگىن باسا ايتتى.
ماجىلىستە قىسقى ماۋسىمعا دايىندىق بارىسى دا قارالدى. قاجەتتى 76,6 مىڭ توننا قاتتى وتىننىڭ بۇگىنگى كۇنگە وبلىسقا جەتكىزىلگەن كولەمى كوڭىل كونشىتپەيدى. سونداي-اق سۇيىق وتىننىڭ 6 پايىزى عانا دايىن كورىنەدى.
وبلىس اكىمى ماجىلىستە ايماقتا سۋ قاۋپىنىڭ الدىن الۋ شارالارى جايلى دا ايتىپ ءوتتى. بۇگىندە “توقتاعۇل” سۋ قويماسىندا 19 ملرد. تەكشە مەتر سۋ جينالىپ تۇر ەكەن, بۇل وتكەن جىلعى كولەممەن سالىستىرعاندا 8 ملرد. تەكشە مەترگە ارتىق دەگەن ءسوز. وسىعان بايلانىستى ايماق حالقىنىڭ قاۋىپسىزدىگىن قامتاماسىز ەتۋ ماقساتىندا توتەنشە جاعدايلار مينيسترلىگىنە ۇسىنىس جولدانعان.
ءماجىلىستىڭ قورىتىندىسىندا ايماقتىڭ الەۋمەتتىك-ەكونوميكالىق باعدارلاماسىن باياندى ەتۋدەگى الداعى تۇرعان مىندەتتەر ايشىقتالىپ, سىربويلىقتار ەلباسىمىز قويىپ وتىرعان تالاپ بيىكتەرىنەن كورىنەدى دەگەن سەنىم بارى ناقتىلاندى.
ەركىن ءابىل. قىزىلوردا.