ءومىر اتتى وسى ءبىر سىندارلى ساپاردىڭ سوقتىقپالى سوقپاقتارىنان سۇرىنبەي ءوتىپ, ءوزى ءۇشىن ەمەس وزگەنىڭ مۇددەسى ءۇشىن عۇمىر كەشىپ, ارقاشان تىنىمسىز تىرلىك پەن مىزعىماس بىرلىكتى تۋ ەتىپ, ادال ەڭبەگىمەن ەلىنىڭ يگىلىگىن ەسەلەگەن ەرلەردەن ەلىمىز قاشاندا كەندە بولىپ كورگەن ەمەس. سولاردىڭ ءبىرى – استانا قالاسىنىڭ ىرگەسىندەگى ورازاق اۋىلىنىڭ تۋماسى اكىمجان نازاروۆ. كوزدەن كولەگەيلەنسە دە كوڭىلدەن كومەسكىلەنە قويماعان انا ءبىر جىلدارى بۇل ءوڭىردىڭ ۇلكەن-كىشىسى ارداقتى ازاماتتىڭ ەسىمىن ەرەكشە قۇرمەتتەپ, اسقاقتاعان بەدەلىن ايبار تۇتاتىن ەدى. سونىمەن كونەكوز جۇرتقا ەتەنە ءمالىم, “ەل ەرتەڭىنىڭ يەسىمىن” دەپ ەرگە قونعان كەيىنگى تولقىنعا تاڭسىق اكىمجان نازاروۆ كىم ەدى؟
سوناۋ 1920 جىلى جيىرمادان جاڭا اسقان شاعىندا اتقا قونىپ, تۋعان اۋىلىندا تۇڭعىش جالشى-جاقىبايلادىڭ ارتەلىن قۇرىپ, اينالاسى سەگىز جىلدىڭ ىشىندە شاعىن ارتەلدى ىرگەلى كولحوزعا اينالدىرىپ, زامان تالابىنا ساي سول كولحوزدى كەيىننەن وڭىردەگى ەڭ ءىرى كەڭشارلاردىڭ بىرىنە ۇلاستىرىپ, وسى ىرگەلى شارۋاشىلىقتى قىرىق جىل بويى تابان اۋدارماي باسقارعان بىرەگەي تۇلعانىڭ قاي قىرىن الساڭىز دا ۇلاعات ەتۋگە تۇرارلىق. وتكەن عاسىردىڭ اۋمالى-توكپەلى زامانا بەلەستەرىندە قاتارلاستارىنان وزا شىعىپ, ۇنەمى جەل وتىندە, كوش باسىندا جۇرگەن اكىمجان اعامىزدىڭ ەل ىشىندە اڭىز بولىپ كەتكەن ونەگەلى باستامالارى بارشىلىق. بۇگىن ءبىز ارداقتى ازاماتتىڭ سوناۋ ءبىر ەل باسىنا كۇن تۋعان سۇراپىل سوعىس جىلدارىندا ۇلى جەڭىستى جاقىنداتۋ جولىندا اتقارعان عيبراتى مول بىرەر عانا جانقيارلىق ونەگەسىن تىلگە تيەك ەتپەكپىز.
ۇلى جەڭىستىڭ 65 جىلدىق ايتۋلى مەرەكەسى اتالىپ وتكەن بيىلعى جىلى اكىمجان نازاروۆتىڭ ەسىمىن اتاۋسىز قالدىرىپ, ء“بارى مايدان ءۇشىن, ءبارى جەڭىس ءۇشىن” دەگەن بۇكىلحالىقتىق قوزعالىسقا قوسقان ونىڭ ەرەن ەڭبەگىن ەسكەرۋسىز قالدىرساق ۇرپاققا سىن! ەل باسىنا كۇن تۋىپ, ەر ەتىكپەن سۋ كەشكەن قيىن-قىستاۋ سول زاماندا ول جۇزدەن استام شاڭىراعى بار “قىزىل تۋ” كولحوزىنىڭ باسقارما توراعاسى بولاتىن. “سوعىس” اتتى سۋىق حابار جەتىسىمەن-اق اكىمجان نازاروۆ ءوز ەركىمەن مايدانعا اتتانۋعا نيەت قىلادى. بىراق وبلىس باسشىلارى ونىڭ شارۋاشىلىق باسقارۋداعى باي تاجىريبەسىن ەسكەرىپ, “جاسىڭىز اسىپ كەتتى” دەگەن جەلەۋمەن الدارقاتىپ, ارنايى برونمەن الىپ قالىپ وتىرعان.
ەكىنشى مايدان-تىلداعى ەڭبەكتى ۇيىمداستىرۋعا بىلىكتى باسشى وزىنە ءتان قاجىماس جىگەر, تىڭ قۇلشىنىسپەن كىرىستى. “قىزىل تۋ” كولحوزى سول جىلدارى مەملەكەتكە تاپسىرىلاتىن اۋىلشارۋاشىلىق ونىمدەرىن ەسەلەي ارتتىردى. تابيعاتىنان ىزدەنىس پەن ىسكەرلىكتى تۋ ەتكەن باسقارما ونى مىسە تۇتپادى. جارتىلاي شولەيت ايماققا ورنالاسقان “قىزىل تۋ” كولحوزىنىڭ الاتىن استىعىن قايتكەن كۇندە رەكوردتىق دارەجەگە جەتكىزۋدى جاتسا دا, تۇرسا دا ويلادى. اقىرى سۋارمالى ەگىس تاسىلىنە كوشۋگە بەل بايلادى. ارقادا العاش رەت سۋارمالى ەگىس القابى سوعىس جىلدارى وسى “قىزىل تۋ” كولحوزىندا دۇنيەگە كەلدى.
كولحوزدىڭ سان سالالى ناۋقاندىق شارۋالارىنا ونسىز دا جۇمىس كۇشى جەتپەي جاتقاندا, اكىمجان نازاروۆ جاڭا باستاما كوتەرىپ, شارۋاشىلىقتا جۇرگەن ادامداردان تىس “ەكپىندى بريگادا” اتتى كولحوزشىلار توبىن قۇردى. وعان سول كەزدە رەسپۋبليكاعا اتى شىققان اقىن ءماريام جاگورقىزى, ءتۇسىپباي قارابۇزاۋوۆ, ەگور بولتۋسوۆ, ءدۇيسەنبەك راحمەتوۆ, جاعىپار مامبەتوۆ سياقتى جاسى اسىپ كەتكەن اۋىل قارتتارىن تارتىپ, بريگاداعا 85 جاستاعى تولجان تايجانوۆ اتتى اقساقالدى جەتەكشى ەتىپ بەكىتتى. قارتتار بريگاداسى العاشقى قادامدارىن توپىراعى قۇنارلى, بىراق سۋى تاپشى ورىكتىڭ جونىنان قۇدىق قازۋدان باستادى. ءومىر تاجىريبەسى مول تولجان اقساقال سۋ كوزىن ءدال تاۋىپ, قارتتار قادامى بىردەن ءساتتى بولدى. 40 مەتر تەرەڭدىكتەن شىققان سۋ شىمىرلاي اتقىلادى. ولار قۇدىقتى قولما-قول شەگەندەپ, تەرەڭنەن اتقىلاعان كاۋسار سۋدى تاۋلىك بويى كولىكپەن تارتىپ, ارىقتارعا اعىزىپ تۇردى. قۇدىق باسىنان سۋارمالى ەگىس بريگاداسىنىڭ دالا قوسى سالىندى. مول سۋدىڭ ارقاسىندا مىڭداعان گەكتار تىڭ جەرلەر يگەرىلىپ, ەگىس القابى ەسەلەندى. سۋارمالى جەرگە ونگەن ءونىم بەرەكەسى ەل يگىلىگىن ارتتىردى. ءتىپتى باقشا سالىپ, قىر ەلىنە تاڭسىق قاۋىن-قاربىز, كوكونىستىڭ نەشە ءتۇرىن وسىرە باستادى.
1942 جىلى قازاقستاننىڭ بارلىق كولحوزشىلارى “قازاقستان كولحوزشىسى” اتتى تانك كولونناسىن جاساقتاۋعا قارجى جيناۋ قوزعالىسىنا جۇمىلدى. وعان قوسا اقمولا وبلىسىندا “اقمولا وسواۆياحيموۆشىلارى” اتتى تانك كولونناسى جاساقتالدى. بۇل يگى شاراعا دا اكىمجان نازاروۆ باسقاراتىن كولحوزشىلار ۇجىمى بەلسەنە ارالاستى. قازاقستانعا كەڭىنەن تانىلعان قارت جۋرناليست جۇماباي ورمانباەۆ سول ءبىر كەزەڭنىڭ ەستەلىگىن بىلاي جازىپ كەتىپتى: “اكىمجان ادەتى بويىنشا رەداكتسياعا كىرە, بىردەن سوزگە كىرىستى.
– ەستىپ جاتىرمىز وتاننىڭ تانك جاساۋ قورىنا 100 مىڭ سوم قارجى بەرىپ جاتقان پاتريوتتار كۇننەن-كۇنگە كوبەيىپ بارادى ەكەن. 100 مىڭ سومدى ءوز مەنشىگىمنەن مەن دە بەرەمىن. وبلىستىق پارتيا كوميتەتىنە مەنى قازىر اپارىڭىزدار, ءسوزىم-ءسوز! – دەدى.
وبكومدا بۇل حاباردى ساعالباي جانباەۆ جولداس قۋانا قارسى الدى.
– سەن ءجۇز مىڭ سومدى قايدان الاسىڭ؟ كولحوزدىڭ مالىن سالىپ جىبەرمەيمىسىڭ؟ – دەدى ءبرىنشى حاتشى اكىمجانعا قالجىڭداپ.
– ءجۇز مىڭ سومعا جەتەتىن اۋقاتىم بار عوي, ساكە, – دەدى اكىمجان تايىنباي.
– وندا دۇرىس. نازاروۆ جولداس كولحوزىنا وسى تۇندە ءجۇرىپ كەتەدى. بۇل باستاما ءجونىندەگى ماتەريال گازەتتىڭ كەلەسى سانىندا جاريالانۋى كەرەك, – دەدى حاتشى.
مەزگىل ءتۇن. ات قۇلاعى كورىنبەيتىن تۇتەگەن بوران. اكىمجانعا ەرگەن ارناۋلى ءتىلشى مەن. اكىمجان ۇستىندەگى قاسقىر تەرىسى ت ۇلىپتى ماعان جاۋىپ تاستاپ, دەلبەنى ءوزى ۇستاپ, شانا ۇستىندە تۇرەگەپ تۇرعان قالپى اتتاردى ايداپ كەلەدى. باراتىن جەرىمىز 70-80 شاقىرىم, جول جوق. ءاۋپىرىمدەپ, تاڭ اتا ورازاققا جەتتىك. جاتقامىز جوق. بىردەن كولحوزدىڭ اكتيۆىن جيناپ, جاعدايدى تۇسىندىردىك. اقشا تولەيدى دەگەن كولحوزشىلاردىڭ ءتىزىمى جاسالدى:
– مەن ءۇش مىڭ سوم سالامىن, – دەدى ءماريام جاگورقىزى.
– مەنىڭ ق ۇلىندى بيەمدى قوسىڭدار, – دەدى دوسىمبەك وتاعاسى.
اكىمجان باسقارما مەن ونىڭ زايىبى بالشاھار: ءبىر ات, ءبىر بۇزاۋلى سيىر, التىن ساعات, ءۇش التىن جۇزىك, قوس اۋىز مىلتىق, كۇمىس بەلبەۋ, قۇندىز جاعالى كۇزەن ىشىك, قاسقىر ىشىك, ءتۇبىت ءشالى, قالى كىلەم جانە 27 مىڭ سوم اقشا قوستى.
– بالالارىم بارلىق باعالى زاتتارىن اتادى عوي. وزىمە ەنشىلەگەن ۇلكەن كىلەم مەن تۇلكى ىشىگىمدى, التىن بىلەزىگىمدى جەڭىس قورىنا مەن دە قوسايىن, – دەدى اكىمجاننىڭ قارت شەشەسى.
ەسەپتەي كەلگەندە, كولحوزشىلار 120 مىڭ سوم, اكىمجاننىڭ وتباسى 110 مىڭ سوم قارجى بەرىپ, بارلىعى قىزىلتۋلىقتار تانك جاساۋ قورىنا 230 مىڭ سوم اقشا اۋداردى”.
مىنە, ۇستىندەگى سوڭعى ىشىگى مەن قولىنداعى سوڭعى بىلەزىگىنە دەيىن شەشىپ بەرگەن تىلداعى قاراپايىم حالىق ەرلىگىنىڭ ءبىر كورىنىسى وسىنداي ەدى. اكىمجان باسقارما بولسا, قامباداعى سوڭعى استىعى مەن قوراداعى ءبىر-ەكى تۇياعىنا دەيىن قان مايدانداعى بوزداقتاردىڭ قاجەتىنە جاراتىپ وتىرعان تىلداعى ەلدى قايتسەم اشىقتىرمايمىن, قورعانىس قورىن قالاي تولىقتىرام دەپ, “جار قۇلاعى جاستىققا تيمەدى”. سۇراپىل سوعىس ۇزاعان سايىن ەل ءىشى جۇدەۋلىككە ۇرىنىپ, بەرەكەلى يگىلىگىنەن ايرىلا باستادى. ادام قولىمەن جاسالعان كەشەگى اقسيراق اشتىقتان كەيىن مول قور جيناي الماي ونسىز دا تاقۇل-تۇقىل كۇن كەشىپ وتىرعان اۋىلدى سوعىس ابدەن تيتىقتاتتى. قيت ەتسە “تىل دا مايدان” دەگەندى العا تارتىپ, كۇن قۇرعاتپاي زىكىرلەي كەلەتىن وكىمەتتىڭ وكىلدەرى ەلدىڭ سوڭعى تالعاجاۋىنا دەيىن تاقىرلاپ ءبىتتى. 1943 جىلدىڭ قاتال قىسى كۇشىنە ەنگەن سايىن كولحوزدار قاتتى كۇيزەلىسكە ءتۇسىپ, ەل ءىشى اشتىقتىڭ از-اق الدىندا تۇردى. ۇلكەندى-كىشىلى 130-عا تارتا كولى بار قورعالجىن وڭىرىندە تۇرىپ, قاراماعىنداعى جۇرتىن اشىقتىرۋ اكىمجان باسقارماعا كەشىرىلمەس كۇنا ەدى. وسىعان بايلانىستى ول تاعى ءبىر تىڭ باستاماعا بەل بۋدى.
بۇل رەتتە اكىمجان نازاروۆتىڭ كوڭىلىنەن شىقپاي قويعان جەر اياعى قيانداعى اساۋبالىق كولى بولاتىن. ونىڭ اساۋبالىق اتالۋى دا تەگىن ەمەس. اۋماعى اتتىلىعا اپتالىق جول بولاتىن بۇل ايدىن كولدىڭ تايداي تۋلاعان بالىعى مول. اينالاسىندا قونىستانعان ەل جوق. جىراقتا جاتقان وسى اساۋبالىقتىڭ بايلىعىن يگەرىپ, جاعاعا شىعىپ جاتاتىن كوپ بالىعىن كىرەمەن تارتىپ, جۇرت يگىلىگىنە جاراتۋ اكىمجان باسقارمانىڭ ارمانىنا اينالدى. بىراق جاپانداعى ەلسىز كولدەن بالىق اۋلاپ, ەكى ءجۇز شاقىرىم قاشىقتىقتان كىرە تارتۋ ويلاۋعا عانا وڭاي. وعان كولحوزدىڭ ات پەن وگىزدەن قۇرالعان كۇش كولىگى جارامسىز. ونىڭ ۇستىنە “مايدان دا مايدان, تىل دا مايدان” بولىپ تۇرعان مۇنداي قيىن كەزەڭدە, جاز بەن كۇزدە كولحوزدىڭ شارۋاسىنان باسقا ماسەلەگە جوعارى جاقتاعىلار مويىن دا بۇرعىزبايدى. “حالىق جاۋىنىڭ” قامىتىن كيگىزىپ, جەر اۋدارىپ جىبەرۋلەرى دە ابدەن مۇمكىن. سوندىقتان اساۋبالىقتان بالىق اۋلاپ كىرە تارتۋدىڭ قولايلى كەزەڭى – قىس. ال كىرە تارتۋعا قولايلى كولىك – تۇيە. ويسىل قارانىڭ زاتى تۇگىلى اتىن ۇمىتقان اقمولا وڭىرىنەن تۇيە تابۋ – تۇسكە دە كىرمەيتىن قيال.
باسقارما قارتتارمەن ۇزاق كەڭەس قۇرىپ, اقىرى اياق جەتەر جەزقازعان وڭىرىنەن تۇيە جيناۋعا توقتام جاسادى. سەكسەننىڭ سەڭگىرىنەن اسقان تولجان قارت باستاعان ءبىر توپ اقساقال كۇز بويى جەزقازعان اسىپ, جىلقى مەن سيىرعا ايىرباستاپ العان وتىزدان استام تۇيەمەن العاشقى قار تۇسكەندە اساۋبالىققا اتتاندى. قارتتار بريگاداسى التى اي قىستى مۇز ۇستىندە وتكەردى. تۇيەلى كەرۋەنمەن توڭ-توڭ بالىق اقمولا مەن قاراعاندىعا جونەلتىلدى. اكىمجان باسقارما قاراماعىنداعى ەلدى اشتىقتان قۇتقاردى. قورعانىس قورىنا مىڭداعان توننا بالىق جونەلتىلدى. ءتىپتى ودان ارتىلعانى “ۆوەنتورگ” ارقىلى ازىق-ت ۇلىككە جارىماي وتىرعان جۇرتقا ساتىلدى. سوعىس جىلدارى بىرنەشە قىس قاتارىنان مىڭداعان توننا بالىق وندىرگەن قارتتار بريگاداسى قورعانىس قورىنا قوماقتى ۇلەس قوستى.
ەكىنشى مايدان – تىلداعى اكىمجان نازاروۆتىڭ ونەگەلى باستامالارى ەلگە كەڭىنەن تانىلىپ, مەملەكەتتىك قورعانىس كوميتەتىنە دە جەتتى. كوپ كەشىكپەي اكىمجان نازاروۆتىڭ اتىنا ءستاليننىڭ العىس حاتى كەلدى. جەڭىستى جاقىنداتۋ جولىنداعى بۇكىلحالىقتىق قوزعالىسقا قوسقان ەرەن ەڭبەك ەرلىگى ءۇشىن ول 1943 جىلى جەلتوقساندا “قىزىل جۇلدىز” وردەنىمەن, كەلەسى جىلى لەنين وردەنىمەن ماراپاتتالدى.
بارلىق سانالى عۇمىرىن اۋىل شارۋاشىلىعىن وركەندەتۋ ىسىنە ارناعان بىلىكتى باسشى اكىمجان نازاروۆ ءوزى قۇرعان “قىزىل تۋ” (كەيىننەن “كراسنىي فلاگ” كەڭشارى) كولحوزىن 41 جىل باسقارىپ, 1961 جىلى زەينەت دەمالىسىنا شىقتى. اكىمجان باسقارمانىڭ زەينەتكەرلىككە شىعۋى نيكيتا حرۋششەۆتىڭ قازاقستاندا جىلقى ت ۇلىگىن تۇگەلدەي جويىپ جىبەرۋگە باعىتتالعان سولاقاي ساياساتى داۋىرلەگەن كەزەڭمەن تۇسپا-تۇس كەلدى. “شاش ال دەسە, باس الاتىن” جەرگىلىكتى باسشىلار حرۋششەۆتىڭ اۋزىنان شىققانىن بىردەن قاعىپ الىپ, “جىلقى مالىنىڭ پايداسىزدىعىن” جاپپاي جارىسا دالەلدەپ, دالا ءسانى بولعان جانۋارلارعا جاۋداي ءتيدى. ساحارادا جەلدەي جۇيتكىگەن ءتورت ت ۇلىكتىڭ تورەسىن ءتۇز تاعىسىنداي مىلتىقپەن اتىپ, قىناداي قىردى. سويىلعان مالدىڭ ەتىن تاسىپ ۇلگەرە الماي قىس ايلارىندا ستانسا باسىنا تاۋ-تاۋ ءۇيىپ, جاز شىعا بۇزىلا باستاعان ەتتى كەروسين قۇيىپ ورتەگەندەرىن دە اكىمجان باسقارما كوزىمەن كوردى. جازىقسىز جانۋارلاردى قۇتقارا الماي جانى شيرىقتى.
“قىزىل تۋ” كولحوزىندا ءوز قولىمەن وسىرگەن مىڭنان استام جىلقى بار ەدى. اينالاسى ەكى ايدىڭ ىشىندە مىڭعا تارتا مال پىشاققا ىلىكتى. بيلىكتەن قول ءۇزىپ قالعان اكىمجان نازاروۆ قانشا كوممۋنيست بولسا دا مىنا سۇمدىققا ءتوزىپ وتىرا المادى. ءسوزى جەتەتىن بارلىق جەرگە بارىپ, باسشىلاردى رايىنان قايتارعىسى كەلدى. وردەندەرىن العا تارتىپ, بارلىق بەدەلىن دە سالىپ باقتى. بىراق جوعارى جاقتىڭ نۇسقاۋىمەن عانا ءىس تىندىراتىن جەرگىلىكتى بيلىك ونىڭ ءسوزىن قۇلاققا دا ىلمەدى. امالى تاۋسىلعان اكىمجان نازاروۆ جاسى كەلىپ قالعانىنا قاراماستان جازىقسىز جانۋارلاردى قاندى قاساپتان قۇتقارۋ ءۇشىن تاعى ءبىر تاۋەكەلدى ىسكە بەل بايلادى.
“قىزىل تۋ” كولحوزىنىڭ قىرعىننان امان قالعان ءۇش ءجۇز جىلقىسىن ادام اياعى جەتە بەرمەيتىن مىڭجىلقى ارالىنا ءبىر تۇندە ايداپ اكەتتى. اۋدان باسشىلارىنىڭ الدىندا بەدەلىن سالىپ, ەشقانداي اقىسىز-پۇلسىز باعىپ بەرۋدى سىلتاۋراتىپ, اۋدانداعى كەيبىر شارۋاشىلىقتاردىڭ جاناشىر باسشىلارى جاسىرىپ بەرگەن 400 جىلقىنى تاعى قوسىپ الىپ, مىڭجىلقى ارالىنا تىقتى. ءتورت قۇبىلاسىن تۇگەل تەڭىز كولى قورشاعان, ىشكە كىرەتىن جالعىز عانا تار اۋزى بار بۇل ارالدىڭ اۋماعى 15-20 مىڭ گەكتارداي, ونىڭ ءبارى تۇنعان كوك مايسا شابىندىق. سوناۋ ءبىر جىلدارى كوشپەلى حالىقتىڭ مىڭ جىلقىسى باقتاشىسىز وسى ارالدا قىستاپ قالعان دەسەدى. كەلەسى جىلدىڭ جازىندا عانا ق ۇلىندارى مارقايعان مول جىلقىنى ارالدان شىعارىپ العان كورىنەدى. سودان بۇل ارال مىڭجىلقى اتانعان. سولاقاي ساياساتتىڭ سالدارىنان جويىلۋعا شاق قالعان ت ۇلىك تورەسىنە جانى اشىعان ءوزى سياقتى بىرنەشە اقساقالدان جىلقىشىلار قوسىنىن قۇرىپ, اكىمجان نازاروۆ ءۇش جىلدان استام مىڭجىلقى ارالىن مەكەن ەتەدى.
حرۋششەۆتىڭ سولاقاي ساياساتىنىڭ بەتى قايتقانشا, مىڭجىلقى ارالىنان شىقپاي قويعان اكىمجان باسقارمانىڭ سول ءبىر كوزسىز ەرلىگىن كونەكوز قارتتار جىر قىلىپ ايتادى. اقىرى 700 جىلقىدان وسكەن ەكى مىڭنان استام سايگ ۇلىكتى ايداپ كەلىپ, اۋدان باسشىلارىنا تابىستاعان. بۇل مالدان كەيىننەن بۇكىل ءبىر ءوڭىردىڭ جىلقىسى وربىگەن.
اكىمجان نازاروۆتىڭ ۇلاعاتتى ءومىر بەلەستەرىندەگى ۇلى جەڭىستى جاقىنداتۋ جولىنداعى جانقيارلىق ەڭبەكتەرى مەن ت ۇلىك تورەسى قاسيەتتى جىلقى مالىن قاندى قاساپتان قۇتقارۋ ءۇشىن جاساعان ادامي ەرلىگى زامانداستارىنىڭ اۋزىندا اڭىز بولىپ ايتىلىپ, بۇگىنگە جەتتى. ال ەندى وسى ايتۋلى تۇلعانىڭ ارداقتى ەسىمىن ۇرپاق ەسىندە قالدىرۋ ماقساتىندا نە ىستەلدى؟ ءالى كۇنگە دەيىن شىبىق باسى سىندىرىلعان جوق. اقمولا وبلىسىنىڭ ورازاق اۋىلىنىڭ ازاماتتارى بىرنەشە رەت ماسەلە كوتەرىپ, اۋىلدارىنا اكىمجان نازاروۆ ەسىمىن ءبۋرۋدى سۇرادى. وكىنىشكە وراي, ودان ەشبىر ناتيجە شىعار ەمەس. ەندەشە, ەل مۇددەسى سىنعا تۇسكەن شەشۋشى ساتتەردە جۇزدەن جۇيرىك شىعىپ, ونەگەلى ىستەرگە ۇيتقى بولعان اكىمجان نازاروۆتىڭ ارداقتى ەسىمىن تۇڭعىش قازىعىن ءوزى قاعىپ, ىرگەتاسىن قالاعان ورازاق اۋىلىنا بەرىپ, ۇرپاق ۇلاعاتىنا اينالدىرۋ بۇگىنگى اقمولا وبلىسى مەن تسەلينوگراد اۋدانى باسشىلارىنىڭ پارىزى. وسكەلەڭ بۋىندى پاتريوتيزم مەن ەلىن, جەرىن قاستەرلەۋگە ۇندەيتىن ءا.نازاروۆتىڭ ونەگەلى ىستەرىن, ارداقتى ەسىمىن جاڭعىرتۋ جولىنداعى بۇل يگىلىكتى باستاماعا اقمولا وبلىستىق ءماسليحاتىنىڭ دەپۋتاتتارى دا ۇيتقى بولادى دەگەن سەنىمدەمىز.
جىلقىباي جاعىپار ۇلى.