ورال قالاسىندا كەدەن وداعىنا مۇشە قازاقستان, رەسەي جانە بەلارۋس ەلدەرى ىشكى ىستەر مينيسترلەرىنىڭ, سونداي-اق كەدەن, شەكارا قىزمەتى, شەكارالاس وبلىستار ىشكى ىستەر ورگاندارى باسشىلارىنىڭ كەزدەسۋى بولدى.
كەڭەسكە قاتىسۋشىلار كەدەن وداعى جاعدايىندا قىلمىسپەن بىرلەسىپ كۇرەسۋدىڭ ءادىس-تاسىلدەرىن كەڭىنەن تالقىلاپ, الدا اتقارىلار ءىس-شارالاردى پىسىقتادى.
كەزدەسۋ ورنى رەتىندە ورال قالاسىنىڭ تاڭداپ الىنۋى تەگىن ەمەس. ويتكەنى باتىس قازاقستان رەسەيدىڭ بەس بىردەي وبلىسىمەن شەكتەسەدى. قر ىشكى ىستەر ءمينيسترى سەرىك بايماعانبەتوۆتىڭ اتاپ وتكەنىندەي, قازاقستان مەن رەسەيدىڭ شەكارالاس ايماقتارىندا قىلمىسقا بىرلەسىپ توسقاۋىل قويۋدىڭ باي تاجىريبەسى جيناقتالعان. سونىمەن قاتار مينيستر رەسپۋبليكادا ەلباسى باستاماسىمەن قۇقىق قورعاۋ جۇيەسىن رەفورمالاۋ شارالارى قولعا الىنعانىن, سوعان سايكەس قۇقىق قورعاۋ ورگاندارىنىڭ بىرقاتار قىزمەتى وزگە ورگاندارعا جۇكتەلەتىندىگىن, بۇدان بىلاي ىشكى ىستەر ورگاندارىنىڭ نەگىزگى كۇش-قايراتى قىلمىسپەن كۇرەس ساپاسىن ارتتىرۋعا باعىتتالاتىنىن جەتكىزدى. مۇنىڭ كەدەن وداعى جاعدايىندا جاڭا سيپاتقا يە بولاتىنى ءسوزسىز.
باتىس قازاقستان وبلىسىنىڭ اكىمى باقتىقوجا ىزمۇحامبەتوۆ قازاقستان, رەسەي جانە بەلارۋس مەملەكەتتەرىنىڭ كەدەن وداعى ءبىرتۇتاس ەكونوميكالىق كەڭىستىك قۇرۋ جولىنداعى اسا ماڭىزدى قادام ەكەنىن اتاپ ءوتىپ, وداقتىڭ قازىردىڭ وزىندە ەكونوميكالىق ارىپتەستىكتى نىعايتىپ, ينۆەستيتسيالىق احۋالدى جاقسارتۋعا, ىشكى ەكونوميكالىق قىزمەتتى جۇزەگە اسىرۋدا كەزدەسەتىن كەدەرگىلەردى جويۋعا, ەڭ باستىسى, حالىقتىڭ ءال-اۋقاتىن ارتتىرۋعا ىقپال ەتىپ وتىرعاندىعىن باسا ايتتى.
قازىرگى كەزدە قىلمىستىق توپتاردىڭ ترانسايماقتىق بايلانىستار دەڭگەيىندە جاندانىپ وتىرعانىن تىلگە تيەك ەتكەن بەلارۋس رەسپۋبليكاسىنىڭ ىشكى ىستەر مينيسترى اناتولي كۋلەشوۆ ءتۇرلى قىلمىستار, زاڭسىز ەسىرتكى اينالىمى, ەكسترەميزم مەن لاڭكەستىك ارەكەتتەرگە توسقاۋىل قويۋ ءۇشىن ءۇش ەلدىڭ قۇقىق قورعاۋ ورگاندارىنىڭ بىرلەسكەن ءىس-ارەكەتىن رەتتەيتىن مەملەكەتارالىق قۇقىقتىق-نورماتيۆتىك بازانى جەتىلدىرۋدى ۇسىندى. ءۇش ەلدىڭ قۇقىق قورعاۋ ورگاندارى ءتۇرلى ءىس-شارالاردى ۇيىمداستىرىپ, اقپارات, تاجىريبە الماسۋدى بۇدان بىلاي دا جالعاستىرا فبولادى.
قىلمىسپەن كۇرەستە ورتاق ۇستانىم قاجەتتىگىن قولداعان رەسەي فەدەراتسياسىنىڭ ىشكى ىستەر ءمينيسترى راشيد نۇرعاليەۆ كەدەن وداعى اياسىندا جاڭا جۇمىس شارتتارىنا بىرلەسكەن تاسىلدەردى ەنگىزۋدىڭ ماڭىزدىلىعىن اتاپ كورسەتتى. بۇل ءۇشىن ەڭ الدىمەن ۆەدومستۆوارالىق كەشەندى ءىس-قيمىل, ءبىرىنشى كەزەكتە شەكارالىق جانە كەدەندىك قىزمەتتەر باستى ءرول اتقارۋى ءتيىس.
كەڭەسكە قاتىسۋشىلار بىرلەسكەن ءىس-قيمىلدار بارىسىن ساراپقا سالىپ, الداعى جوسپارلاردى بەلگىلەدى.
تەمىر قۇسايىن. ورال.
* * *
سىبىرلىك جۋرناليستەر كەلىپ كەتتى
پاۆلوداردا رەسەيدىڭ ءنوۆوسىبىر وبلىسى مەن ءبىزدىڭ وبلىستىڭ بۇقارالىق اقپارات قۇرالدارى وكىلدەرىنىڭ بىرلەسكەن فورۋمى ءوتتى. سىبىرلىك جۋرناليستەر قاۋىمىن سول جاقتاعى وداقتىڭ توراعاسى اندرەي چەلنوكوۆ باستاپ كەلدى.
باسقوسۋدا ەكى ەل اراسىنداعى ەكونوميكالىق-ساۋدا, مادەني ارىپتەستىك بايلانىستار, جالپى جۋرناليستەر اراسىندا اقپارات الماسۋ سياقتى ماسەلەلەر قوزعالدى. ورىس جۋرناليستەرىنە ءبىزدىڭ ەلىمىزدىڭ بۇگىنگى تاڭداعى اسقارالى جەتىستىكتەرى يندۋستريالىق دامۋ باعىتى, “جول كارتاسى” باعدارلاماسى جايلى وبلىس اكىمىنىڭ ورىنباسارى ءاليا عالىموۆا بايانداپ بەردى.
كەزدەسۋ “دوستىق” ۇيىندە ءوتتى. قازاقستاندىقتاردىڭ ىنتىماعىن دارىپتەيتىن مۇنداي كەزدەسۋلەر اركەز وبلىستاعى بارلىق مادەني ورتالىقتاردىڭ باسىن بىرىكتىرەتىن وسى “دوستىق” ۇيىندە ۇيىمداستىرىلادى. بۇدان كەيىن نوۆوسىبىرلىك جۋرناليستەر بولاشاق جازبالارىنا ارقاۋ بولاتىنداي مالىمەتتەر جيناپ, وبلىس ورتالىعىنداعى پاۆەل ۆاسيلەۆ مۋزەيىندە, زاۋىتتاردا, اسەم باياناۋىلدا, كومىرلى ەكىباستۇزدا بولدى.
فاريدا بىقاي. پاۆلودار.