كەشە سىرتقى ىستەر مينيسترلىگىندە اتالعان ۆەدومستۆونىڭ رەسمي وكىلى اسقار ابدراحمانوۆتىڭ قاتىسۋىمەن بريفينگ ءوتتى. وندا رەسمي وكىل 23-25 تامىز ارالىعىندا تاجىكستاننىڭ سىرتقى ىستەر مينيسترى حامروحون ءزاريفيدىڭ استاناعا رەسمي ساپارمەن كەلەتىندىگىن مالىمدەدى. “ساپار شەڭبەرىندە قازاقستان مەن تاجىكستان سىرتقى ىستەر مينيسترلەرى كەڭەسىنىڭ ءبىرىنشى وتىرىسىن وتكىزۋ جوسپارلانىپ وتىر. الداعى باسقوسۋ بارىسىندا ساياسي, ساۋدا-ەكونوميكالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتىڭ كوكەيكەستى ماسەلەلەرى تالقىلانادى”, دەدى ا. ابدراحمانوۆ.
ال 26 تامىزدا استانا تورىندە يادرولىق سىناقتارعا قارسى حالىقارالىق ءىس-قيمىل كۇنىنە وراي قازاقستاننىڭ سىرتقى ىستەر مينيسترلىگى مەن بىرىككەن ۇلتتار ۇيىمىنىڭ قازاقستانداعى وكىلدىگى ءبىرلەسە ۇيىمداستىراتىن كونفەرەنتسيا وتپەك.
بريفينگ بارىسىندا بىلتىرعى جىلدىڭ جەلتوقسان ايىندا بىرىككەن ۇلتتار ۇيىمى باس اسسامبلەياسىنىڭ قارارى 29 تامىز كۇنىن يادرولىق سىناقتارعا قارسى حالىقارالىق ءىس-قيمىل كۇنى رەتىندە بەكىتكەندىگى, ال 1991 جىلدىڭ ءدال وسى كۇنى ەلباسى نۇرسۇلتان نازارباەۆ قول قويعان سەمەي پوليگونىن جابۋ تۋرالى جارلىقتىڭ دۇنيەجۇزىلىك ماڭىزى حالىقارالىق قاۋىمداستىق تاراپىنان لايىقتى دارەجەدە مويىندالعاندىعى اتاپ كورسەتىلدى. رەسمي وكىلدىڭ ايتۋىنشا, استانادا وتەتىن حالىقارالىق كونفەرەنتسيا اياسىندا سول يادرولىق سىناقتاردى توقتاتۋدىڭ جانە يادرولىق قارۋدى جويۋدىڭ ساياسي جاعدايلارىمەن قاتار, سەمەي اۋماعىنىڭ الەۋمەتتىك-ەكونوميكالىق جانە ەكولوگيالىق ماسەلەلەرى مەن دامۋ بولاشاعى جان-جاقتى تالقىلانباق. كونفەرەنتسياعا پارلامەنت پەن ۇكىمەت, حالىقارالىق ۇيىمداردىڭ, اكادەميالىق توپتاردىڭ جانە ازاماتتىق قاۋىمداستىقتىڭ وكىلدەرى قاتىسادى.
شارا قورىتىندىسىندا كونفەرەنتسياعا قاتىسۋشىلاردىڭ حالىقارالىق قاۋىمداستىققا ارناعان ۇندەۋى جانە سەمەي اۋماعىن وڭالتۋ باعدارلاماسى مەن ءىس-ارەكەت جوسپارى قابىلدانادى دەپ كوزدەلىپ وتىرعان كورىنەدى.
ا.ابدراحمانوۆ سونداي-اق شانحاي ىنتىماقتاستىق ۇيىمىنىڭ حارتياسىنا سايكەس, 2010 جىلعى 12 ماۋسىمنان باستاپ ۇيىمدى ءبىر جىلدىق مەرزىمگە قازاقستان باسقاراتىندىعى, وسىعان وراي, قازاقستاننىڭ وسى بەدەلدى قۇرىلىمعا توراعالىق ەتۋى شەڭبەرىندە 2011 جىلدىڭ ماۋسىم ايىندا استانادا شانحاي ىنتىماقتاستىق ۇيىمى قۇرىلۋىنىڭ ونجىلدىعىنا ارنالعان مەملەكەت باسشىلارىنىڭ سامميتى وتەتىندىگى, وسى ايتۋلى كۇنگە دەيىن ءبىر جىلدىڭ ءىشىندە شانحاي ۇيىمى شەڭبەرىندە قازاقستان 90-عا جۋىق ءتۇرلى ءىس-شارالاردىڭ ۇيىمداستىرىلۋىن ۇيلەستىرەتىندىگى اتاپ ءوتىلدى. ونىڭ سوزىنە قاراعاندا, بۇل شارالاردىڭ 30-عا جۋىعى ەلىمىزدە وتەدى ەكەن.
“جاقىندا شانحاي ىنتىماقتاستىق ۇيىمىنداعى قازاقستاندىق توراعالىقتىڭ رەسمي لوگوتيپى بەكىتىلدى. رەسمي لوگوتيپتە شانحاي ۇيىمىنىڭ گەربى مەن ونىڭ تومەنگى جاعىندا قانات جايعان التىن قىراننىڭ بەينەسى كەلتىرىلگەن. ال ەكى جاعىنان ەلىمىزدىڭ ۇيىمعا توراعالىق ەتۋ جىلدارى – ياعني, 2010-2011 جىلدار كورسەتىلگەن”, – دەدى بۇل تۋراسىندا رەسمي وكىل.
ءلايلا ەدىلقىزى.