قازاقستان رەسپۋبليكاسىنا قىزمەت ەتەمىن!
الداعى 30 تامىزدا ەل كونستيتۋتسياسىنىڭ ون بەس جىلدىق مەرەكەسىنە ەلوردادا اسكەري شەرۋ وتەتىنى بەلگىلى. اتالعان ءداستۇرلى سالتاناتتى شارانى ويداعىداي وتكىزۋ بيىل ەلىمىز قارۋلى كۇشتەرى قۇرلىق اسكەرلەرىنىڭ باس قولباسشىسى, گەنەرال-مايور مۇرات مايكەەۆكە جۇكتەلگەن. وسى رەتتە اسكەري شەرۋگە دايىندىق بارىسى جايىندا مۇرات جالەل ۇلىن اڭگىمەگە تارتقان ەدىك.
– مۇرات جالەل ۇلى, كونستيتۋتسيا كۇنىنە وراي وتكەلى وتىرعان بيىلعى اسكەري شەرۋدىڭ ەرەكشەلىگى قانداي؟ وعان قانشا اسكەري قىزمەتكەرلەر جۇمىلدىرىلعالى وتىر جانە اسكەري تەحنيكا مەن اۆياتسيانىڭ سانى قانشا؟
– اسكەري شەرۋگە دايىندالىپ جاتقان ارنايى قۇرامنىڭ جالپى سانى 2244-ءتى قۇرايدى. قارۋ-جاراق پەن اسكەري تەحنيكالار سانى 154 بولسا, اۋەدە 66 اسكەري ۇشاقتار مەن تىكۇشاقتار ونەر كورسەتەتىن بولادى. ولار 150 مەتردەن 1200 مەترگە دەيىنگى بيىكتىكتە سامعاسا, ۇشۋ جىلدامدىعىنىڭ كۇشى 100-دەن 720 شاقىرىم ساعات بولماق. ال ۇشۋ ۋاقىتى 11 ءمينوت. سونداي-اق 180 ادام وركەستردە اسكەري قىزمەتكەرلەر مەن شەرۋدى تاماشالاۋشىلارعا پاتريوتتىق اۋەندەرمەن رۋح بەرىپ تۇرادى.
جالپى, ەرەكشەلىك دەگەندە ءبىز تانكتەردىڭ الاڭدا بيىل كولىكتەرمەن ەمەس, شىنجىر تاباندارىنا ارنايى قۇرال كيگىزۋ ارقىلى وزدەرىنىڭ ءجۇرىپ وتۋلەرىن ايتار ەدىك. بۇل دا سىرتتان تاماشالاۋشى جۇرتقا ەرەكشە اسەر بەرەدى دەپ ويلايمىن.
– شەرۋگە قاتىسۋ باقىتىنا يە بولعان اسكەري قىزمەتكەرلەردىڭ پسيحولوگيالىق دايىندىقتارى جونىندە نە ايتار ەدىڭىز؟
– ولاردىڭ بارلىعى دا اتالعان سالتاناتتى شاراعا قاتىساتىندىقتارىنا شەكسىز قۋانىشتى دەپ ايتار ەدىم. مەن مۇنى دايىندىق بارىسىن قاداعالاعان قاي كەزدەرى دە بايقاپ ءجۇرمىن. ساربازدار مەن ساردارلار بۇل ايتۋلى مەرەكەنىڭ الدىندا وزدەرىنە قانشالىقتى وتانشىلدىق رۋحتاعى مىندەتتەر جۇكتەلەتىنىن انىق سەزىنەدى. سوندىقتان دا ولار پسيحولوگيالىق تۇرعىدا قازىردىڭ وزىندە ءجۇز پايىز دايىن تۇر دەپ ايتۋعا بولادى. ءسوزىمىز دالەلدى بولۋى ءۇشىن 17 تامىزدا قورعانىس ءمينيسترى ادىلبەك جاقسىبەكوۆتىڭ شەرۋگە قاتىسقالى وتىرعان ءاسكەريلەرمەن ءبىرىنشى ءجۇزدەسۋىندە ولارعا ءبىلدىرگەن شەكسىز ريزاشىلىعىن ايتقان ءجون سەكىلدى.
– ەستۋىمىزشە بيىلعى شەرۋدە نازىك جاندىلار دا ءبىر توپ بولىپ ساپ تۇزەپ وتەدى دەيدى...
– ەلىمىز قارۋلى كۇشتەرىنىڭ سان-سالاسىندا قىزمەت ەتەتىن قىزدارىمىز شەرۋ كوركىن قىزدىرا تۇسەدى دەپ جوسپارلاپ وتىرمىز. مۇنداي ارنايى قۇرام بۇرىنعى شەرۋلەردە بولماعان. ياعني, بيىل تۇڭعىش رەت وتكەلى وتىر. ولاردىڭ ىشىندە پسيحولوگتار, تاربيە ءىسى وفيتسەرلەرى, ءىس جۇرگىزۋشى جانە بايلانىسشى بولىپ اسكەري قىزمەت اتقارىپ جۇرگەن ارۋلارىمىز بار.
اسكەري شەرۋدە سونداي-اق رەسپۋبليكالىق ۇلان, ۇلتتىق قاۋىپسىزدىك كوميتەتى شەكارا قىزمەتى, ىشكى ىستەر مينيسترلىگىنىڭ ىشكى اسكەرلەرى, توتەنشە جاعدايلار مينيسترلىگىنىڭ ارناۋلى بولىمدەرى جانە ءاسكەري وقۋ ورىندارى كۋرسانتتارى سەكىلدى وزگە دە قۋاتتى قۇرىلىم قىزمەتكەرلەرى ساپ تۇزەپ وتۋلەرى جوسپارلانعان. مۇنىڭ بارلىعى دا “حابار” تەلەارناسىنان سول كۇنى تىكەلەي ەفيردەن كورەرمەندەرگە جول تارتادى. بۇل رەتتە دە ءبىرشاما جۇمىستار جۇرگىزىلۋدە.
– ايتۋلى شاراعا دايىندىق ءدال قاي كۇندەرى وتەدى؟
– قازاق ەلى مونۋمەنتى جانىنداعى باس الاڭدا تامىزدىڭ 23-ءى مەن 28-ءى ارالىعىندا وتەدى دەپ بەلگىلەنگەن. الايدا ءوز تاراپىمىزدان تاعى ءبىر پىسىقتاۋ دايىندىقتارى ءوتۋى ءتيىس. ال ەندى باستى ۇلكەن دايىندىق 28 تامىزدا بولادى. بۇيىرتسا, شەرۋ وتەتىن كۇننەن ءبىر كۇن بۇرىن بارلىعى دا ساقاداي ساي تۇرادى. “تويدىڭ بولعانىنان, بولادىسى قىزىق” دەگەندەي, ءار دايىندىقتى قاراعان سايىن ەرەكشە قۇلپىرا تۇسكەن ساردارلار مەن ساربازداردى كورەمىن دە, بۇل شەرۋ ويداعىداي وتەتىنىنە سەنىمىم كۇشەيە تۇسەدى. ايبىندى ارميامىزدىڭ وركەندەي ءتۇسىپ, ەلىمىزدىڭ ىرگەسىن بەرىك ۇستاۋدا ساردارلار مەن ساربازداردىڭ اتقارار جۇگى اۋقىمدى ەكەنى ايقىن. كونستيتۋتسيا مەرەكەسى كۇنىنە ءوتكىزىلگەلى وتىرعان اسكەري شەرۋ اسكەريلەرگە ەرەكشە سەرپىن بەرەدى دەپ ەسەپتەيمىن جانە وسى رەتتە ءبىز جۇمىلا جۇمىس جاساي بەرەمىز.
– اڭگىمەڭىزگە راحمەت.
اڭگىمەلەسكەن ءابدىراحمان قىدىربەك.