كەشە قاراعاندىدا وتكەن تىلدەردى قولدانۋ جانە دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىنىڭ جوباسىن تالقىلاۋعا ارنالعان “مەملەكەتتىك ءتىل – ۇلت بىرلىگىنىڭ باستى فاكتورى” اتتى قوعامدىق تىڭداۋ بولدى. وندا ءسوز باستاعان مادەنيەت مينيسترلىگىنىڭ جاۋاپتى حاتشىسى جاننا قۇرمانعاليەۆا اتاعانداي, بۇل بارلىق وڭىردە وتەتىن كەزدەسۋلەردىڭ العاشقىسى ەكەن. جاڭا باعدارلاما بويىنشا جان-جاقتى تۇسىندىرمە جاساعان بايانداماشى العا قويىلعان ماقساتتارعا قول جەتكىزۋدە اتقارىلار شارالاردى دا تانىستىردى. وسى ورايدا كوپشىلىكتىڭ پىكىرلەرى مەن ۇسىنىستارى وعان وزگەرتۋلەر جانە تولىقتىرۋلار ەنگىزىلۋ كەزىندە ەرەكشە ەسكەرىلمەكتىگىنە نازار اۋدارتىلدى.
وبلىستىق تىلدەردى دامىتۋ جونىندەگى باسقارمانىڭ باستىعى باقىتقالي مۇسابەكوۆ ءوز سوزىندە توقتالعانداي, ايماقتاعى ىشكى دەموگرافيالىق سەبەپتەرگە بايلانىستى مەملەكەتتىك ءتىلدى باسىمدىققا اينالدىرۋ وڭايلىققا سوقپاۋدا. ايتسە دە بۇدان تاۋ شاعىلىپ, تالپىنىس جاسىپ وتىرعان جوق. جۇرتتى قازاقشاعا بەت بۇردىرۋ باعىتىندا جەرگىلىكتى ءتىل جاناشىرلارىنىڭ تاجىربيەسى الىسقا ايان. ول سونداي-اق, قولبايلاۋ جاساپ جۇرگەن ماسەلەلەردىڭ شەشىمى تابىلۋعا, سونىڭ ىشىندە ۇيرەنۋگە ىقىلاستى قىزمەتكەرلەردى جۇمىس ۋاقىتىن ءبولىپ وقىتۋعا قولداۋ جاسالسا قۇبا-قۇپ بولار ەدى دەدى.
تالقىلاۋدى جالعاستىرعان “بولاشاق” ۋنيۆەرسيتەتىنىڭ رەكتورى, عىلىم دوكتورى نۇرلان دۋلاتبەكوۆ زاڭداردىڭ بۇدان بىلاي قاراي قازاق تىلىندە دايىندالىپ, جازىلۋىنا كوشىلۋى كەرەكتىگىن اتاي كەلىپ, ەكونوميكا مەن بيزنەس ءتىلىن قازاقشالاندىرۋعا كوڭىل بولىنبەي كەلە جاتۋىن, ەندى قالتارىستا قالدىرۋعا بولمايتىندىعىنا توقتالدى. ونىڭ پىكىرى بويىنشا تۇرعىلىقتى حالىق وكىلدەرىنىڭ ءبىرازى وسى سالادا قىزمەت ەتەدى. سوندىقتان قازاقشا سويلەۋگە جۇمىلدىرۋدىڭ ۇلكەن تىرەگى سوندا جاتىر دەگەن ويىن وبلىستىق كاسىپكەرلەر قاۋىمداستىعىنىڭ توراعاسى تالعات دوسكەنوۆ قوستاپ, بۇعان وزدەرىنىڭ ىنتالى ەكەنىن ورتاعا سالدى.
اباي اۋدانىنىڭ اكىمى تۇرار التىنبەكوۆتىڭ پايىمداۋىنشا ەلىمىزدىڭ كۇش-قۋاتى وسكەن, بەدەلى بيىكتەگەن سايىن مەملەكەتتىك ءتىل مارتەبەسى دە نىعايا ءتۇسىپ وتىرعانى بايقالادى. بۇعان اۋدان ومىرىنەن العا تارتارلىق مىسالدار جەتكىلىكتى. ماسەلەن, جاڭادان اشىلعان 200 ورىندىق قازاقشا بالاباقشادا تاربيەلەنۋشىلەردىڭ 57-ءسى وزگە ۇلت جەتكىنشەكتەرى. قازاق مەكتەبىنە وقۋعا ءوز تىلەگىمەن كەلىپ قوسىلۋشىلار دا از ەمەس. بۇل بايسالدى, بايىپتى ءتىل ساياساتىنىڭ ناتيجەلى نىشانى. سونىمەن قاتار ول قۇلاق ءتۇردىرىپ وتكەندەي مەملەكەتتىك ءتىلدى ناسيحاتتاۋدا, مەرەيىن كوتەرۋدە اۋىزبىرلىك قاجەت. بۇل ماسەلەگە كەلگەندە ساياسي ۇستانىمدار ءارتۇرلى بولعانمەن, ازاماتتىق ءۇن ءبىر بولۋى كەرەك.
ەۆرەي ۇلتىق-مادەني ورتالىعىنىڭ جەتەكشىسى بەلا كامەنەتسكايا, قاراعاندى تەحنيكالىق ۋنيۆەرسيتەتىنىڭ ستۋدەنتى نيكولاي سمولين جاڭا باعدارلاما جوباسىن مۇقيات وقىپ شىققاندارىن, ونىڭ كوپشىلىك تاراپىنان تۇسىنىستىك تاۋىپ وتىرعاندىعىن اتادى.
كەلەلى ماسەلە قوزعالعان كەڭەسكە مادەنيەت مينيسترلىگى ءتىل كوميتەتىنىڭ توراعاسى باۋىرجان وماروۆ قاتىستى.
ايقىن نەسىپباي, قاراعاندى.