استانا. 5 ءساۋىر. بريتانيانىڭ بارلىق گازەتتەرى ەكى كۇننەن بەرى مودەلەر كارل لاگەرفەلدتىڭ شۋپەتت اتتى سيام تۇقىمداس مىسىعىنىڭ باس اينالاتىنداي مول اقشادان كىرىس كىرگىزگەنىن جارىسا جازىسىپ جاتىر. بۇل تۋرالى Lenta.Ru حابارلادى.
Independent اتاپ وتكەندەي, وتكەن جىلى شۋپەتت ەكى جارناما كومپانياسىنان 3 ملن ەۋرودان ارتىق اقشا تۇسىرگەن. بۇل – الەمدەگى كوپتەگەن ءسان مودەلدەرى تاباتىن قارجىدان دا ەداۋىر كوپ. باسىلىمنىڭ مالىمەتى بويىنشا, شۋپەتتى جاپوننىڭ Shu Uemura اتتى كوسمەتيكا كومپانياسى ايرىقشا قاتتى جارىلقاعان.
بۇدان باسقا, مىسىققا Vauxhall Corsa اۆتوموبيل كومپانياسىن ناسيحاتتايتىن كۇنتىزبەدەگى فوتوسەسسياسى ءۇشىن ايتارلىقتاي قوماقتى اقشا تولەنگەن.
Independent ينتەرنەتتە اشۋلى مىسىق (تاعى ءبىر اتى - بۇرقىلداق مىسىق) اتىمەن تانىمال تاعى ءبىر مىسىقتىڭ ءوز قوجاينىنا جىلىنا 100 ملن. دوللار كەلتىرىپ تۇراتىنىن دا اتاپ وتەدى. بىراق Chanel-ءدىڭ كرەاتيۆتى ديرەكتورى بولىپ تابىلاتىن لاگەرفەلد ءۇشىن بۇل ولشەم ەمەس.
«مەن مىسىقتىڭ بارلىق تاماعىن جارنامالاي بەرۋگە رۇقسات ەتپەيمىن», - دەپ تۇسىندىرەدى 81 جاستاعى ديزاينەر.
«شۋپەتت Metiers d’Art كومپانياسى جاڭا كوللەكتسياسىنىڭ نيۋ-يوركتە وتكەن تۇساۋكەسەرىنە لاگەرفەلدپەن بىرگە باردى. وعان Mercer وتەلىندە جەكە ءنومىر بەرىلىپ, قاسىنا كۇتۋشى قويىلدى», - دەپ اتاپ وتەدى Independent.
مىسىق ديزاينەردىڭ شىعارماشىلىق شابىتىنىڭ قاينار كوزى رەتىندە قىزمەت كورسەتەدى.
مۇرات ايتقوجا.
مانبە, سۋرەت: Lenta.Ru.