اقتاۋ. 13 ناۋرىز. اقتاۋدا ون جاسار ەر بالانى كولىكپەن قاعىپ ءولتىرىپ, وقيعا ورنىنان قاشىپ كەتكەن جۇرگىزۋشى ۇستالدى. بۇل تۋرالى egemen.kz ءتىلشىسى حابارلادى.
قايعىلى وقيعا 2014 جىلدىڭ 18 قاراشاسىندا بولعان ەدى. سول كۇنى اقتاۋ قالاسىنداعى 2, 3 جانە 3ب شاعىناۋداندار اراسىنداعى قيىلىستا ون جاسار قادىرجان ءساتيمانوۆتى كولىك قاعىپ كەتەدى. اۋىر حالدە ماڭعىستاۋ وبلىستىق اۋرۋحاناسىنىڭ جانساقتاۋ بولىمىنە جەتكىزىلگەنمەن, جاس بالا ون كۇننەن سوڭ ەسىن جيماعان كۇيىندە قازا تاپتى. الايدا, وقيعا ورنىنان بوي تاسالاپ ۇلگەرگەن كۇدىكتىنى تابۋ وڭايعا سوققان جوق. تىڭعىلىقتى ىزدەستىرۋ جۇمىستارىنىڭ ناتيجەسىندە, جاۋاپسىز جۇرگىزۋشى قولعا ءتۇستى.
قازىرگى تاڭدا ءىس اقتاۋ قالالىق پروكۋراتۋراسىنا جونەلتىلگەن. ەندى جۇرگىزۋشى ج-نىڭ تاعدىرىن سوت شەشەتىن بولادى.
گۇلايىم شىنتەمىرقىزى.
دەرەك: egemen.kz.
سۋرەت: auto.gazeta.kz.