اتىراۋ. 13 ناۋرىز. اتىراۋ وبلىسىنداعى «تايسويعان» اسكەري پوليگونىنىڭ رەسەيلىكتەرگە جالعا بەرىلگەن اۋماعى 80 پايىزعا دەيىن ازاياتىن بولدى. بۇل تۋرالى egemen.kz ءتىلشىسى حابارلادى.
اتىراۋ جۇرتشىلىعىمەن كەزدەسكەن پارلامەنت سەناتىنىڭ دەپۋتاتى سارسەنباي ەڭسەگەنوۆتىڭ ايتۋىنشا, جاقىندا ەلباسى جارلىعىمەن «تايسويعان» پوليگونىنىڭ اۋماعىن پايدالانۋ ءتارتىبى تۋرالى كەلىسىمگە وزگەرىستەر مەن تولىقتىرۋلار ەنگىزىلىپتى. ەندى وسىعان بايلانىستى قازاقستان مەن رەسەيدىڭ قورعانىس مينيسترلەرى ءوزارا كەلىسىمگە قول قويۋلارى ءتيىس. بۇعان وسى ايدىڭ اياعىنا قول جەتكىزىلەدى دەپ كۇتىلۋدە. سول كەزدە پوليگوننىڭ رەسەيلىكتەرگە جالعا بەرىلگەن اۋماعىن 80 پايىزعا دەيىن قىسقارتۋعا, ياعني, قازاقستانعا قايتارۋعا جول اشىلادى.
ەسكە سالا كەتەيىك, اتىراۋ وبلىسىنداعى اتالعان پوليگوننىڭ اۋماعى قىزىلقوعا اۋدانىنىڭ ۇشتەن ءبىر بولىگىنە دەيىن سوزىلىپ جاتىر. پوليگون اۋماعىنا وسى اۋداننىڭ تايسويعان ەلدى-مەكەنى مەن مۇناي وندىرەتىن كەن ورىندارى دا ەنىپ تۇر. بۇعان قوسا اتىراۋ قالاسىنىڭ ىرگەسىندەگى اقجار اۋىلىنداعى اسكەري بولىمشە جانە يندەر اۋدانىنا قاراستى سارىمايشاعىل اۋىلى دا پوليگون اۋماعىندا جاتىر.
جولداسبەك شوپەعۇل.
دەرەك: egemen.kz.
سۋرەت: راحىم قويلىباەۆ.