كەزدەسۋدىڭ باسى سكانديناۆتاردىڭ باسىمدىعىمەن ءوتتى. قاقپاشى رومان چەرنىح 3-مينۋتتا ءوز قاقپاسىنا ءبىرىنشى دوپتى جىبەرىپ الدى. ونى كريستوففەر ەدلۋندتىڭ پاسىنان دانيەل اندەرسسون سالدى. شۆەدتەر بار بولعانى بەس مينۋت وتكەندە باسىمدىلىعىن ەسەلەي ءتۇستى. بۇل جولى باعاننىڭ استىنا دوپتى پەر حەلميۋرس جونەلتتى.
تايمنىڭ ەكۆاتورىنا قاراي رەسەيلىك پيوتر زاحاروۆ ەكى قاۋىپتى شابۋىل ۇيىمداستىردى. بىراق شۆەد گولكيپەرى اندرەاس بەرگۆال قاقپانىڭ «الۋىنا» جول بەرمەدى. ەسەپتى قىسقارتۋ ارەكەتىن 40-مينۋتتا بۇرىشتامادان بەرىلگەن دوپتى ءتيىمدى پايدالانعان سەرگەي لومانوۆ جاسادى – 1:2. كوماندالارى ۇزىلىسكە وسى ەسەپپەن كەتتى.
تابلوداعى ەسەپ 72-مينۋتقا دەيىن ساقتالىپ تۇردى. وسىنىڭ الدىندا پاۆەل ريازانتسەۆ جاعدايدى تەڭگەرۋگە ەكى رەت تالاپتانىپ ەدى. بىراق ەكەۋى دە بوسقا كەتتى. شۆەدتەر ءوز قاقپالارىنا قاراي سوققى جاساۋعا مۇمكىندىك بەرمەدى. بۇدان كەيىن سكانديناۆتار شابۋىلعا شىقتى.
اقىرىندا ولار رەسەيلىكتەر قاقپاسىنا ءۇشىنشى گولدى دا ءتۇسىرىپ ۇلگەردى. ونى پاتريك نيلسسون ءوز ەسەبىنە جازدى – 3:1. مىنادان كەيىن ورىستاردىڭ قارسىلاستارىنا جەتە قويۋى قيىن سياقتانىپ كورىنگەن. ايتكەنمەن, «ەروفەي» ارەناسىنا رەسەي پرەمەر-ءمينيسترى دميتري مەدۆەدەۆ كەلگەن ساتتەن باستاپ قۇرامانىڭ ايى وڭىنان تۋىپ جۇرە بەردى. ارادا مينۋت وتپەي جاتىپ, الەكساندر تيۋكاۆين تاعى ءبىر گولدىڭ قارىمتاسىن قايتارىپ كەتتى – 2:3. ونىڭ ارتىنشا سەرگەي لومانوۆ تاعى كوزگە ءتۇستى – 3:3. مۇنداي ساتتىلىكتى كۇتپەگەن ورىستاردىڭ ءوزى وسىدان سوڭ ارقالانىپ, العا شاپتى. بۇل شاپقىندار بوس كەتكەن جوق, پاۆەل ريازانتسەۆ پەن ماكسيم يشكەلديننىڭ دوپتارى نەگىزىندە ەسەپتى 5:3-كە جەتكىزدىردى. ەسكە سالا كەتەيىك, وسىنىڭ الدىندا قولا مەدال ءۇشىن تالاستا قازاقستان قۇراماسى فينليانديانى 8:6 ەتىپ ۇتقان بولاتىن. دامير قوجامقۇل. مانبە, سۋرەت: ۆوستوك-مەديا.