استانا. 5 ءساۋىر. تاجىكستان استاناسى – دۋشانبەدە ۇجىمدىق قاۋىپسىزدىك تۋرالى شارت ۇيىمىنا (ۇقشۇ) مۇشە ەلدەر سىرتقى ىستەر مينيسترلەرى كەڭەسىنىڭ وتىرىسى ءوتتى. باسقوسۋدا ەلىمىزدىڭ سىرتقى ىستەر ءمينيسترى ەرلان ىدىرىسوۆ ۇيىمعا مۇشە ەلدەردىڭ وڭتۇستىك وڭىرلەرىندە سودىرلاردىڭ شوعىرلانۋىنا الاڭداۋشىلىق ءبىلدىردى. بۇل تۋرالى ca-news.org حابارلادى.
«اۋعانستان تەرريتورياسىندا «يسلام مەملەكەتى» وكىلدەرىنىڭ پايدا بولۋىنا بايلانىستى, ول جاقتاعى جاعدايدىڭ ايتارلىقتاي وزگەرگەنىن اتاپ وتكەن ءجون. وسى ماقساتتا ءبىز اتالعان جاعدايدى ۇقشۇ شەڭبەرىندە ساراپتاپ, تىڭعىلىقتى زەرتتەۋ جۇمىستارىن جۇرگىزۋ جانە وسىعان بايلانىستى ايماقتا بولۋى مۇمكىن قاۋىپتىڭ الدىن الۋ ءۇشىن ءىس-قيمىلدار الگوريتمىن دايىنداۋ تۋرالى كەلىسىمگە كەلدىك», – دەدى ۆەدومستۆو باسشىسى.
سونداي-اق, ول الەمدەگى تۇراقسىزدىققا ەرەكشە ءمان بەرىپ, قاتىسۋشىلاردىڭ نازارىن اۋداردى. ودان بولەك, ەرلان ءابىلفايىز ۇلى ۇيىمنىڭ بەيبىت سيپاتى مەن وعان مۇشە ەلدەردىڭ كەز كەلگەن ماسەلەنى سىندارلى جانە ساياسي جولمەن شەشۋگە دايىن ەكەنىن ايتتى. جيىندا نەگىزىنەن ۋكراينا مەن اۋعانستانداعى جاعداي ءسوز بولدى.
جيىن قورىتىندىسى بويىنشا جاسالعان مالىمدەمەلەر ءتىزىمى مەن الداعى جوسپار بەكىتىلدى. سىرتقى ىستەر مينيسترلەرىنىڭ كەلەسى وتىرىسى ۇقشۇ ۇجىمدىق قاۋىپسىزدىك كەڭەسىنىڭ سەسسياسى قارساڭىندا تاعى دا دۋشانبەدە وتەدى. باسقوسۋ 2015 جىلدىڭ كۇزىندە وتەدى دەپ جوسپارلانۋدا.
سونىمەن قاتار, سىرتقى ىستەر مينيسترلەرى تاجىكستان پرەزيدەنتى ەمومالي راحموننىڭ قابىلداۋىندا بولدى. ۇقشۇ-عا ارمەنيا, بەلارۋس, قازاقستان, قىرعىزستان, رەسەي جانە تاجىكستان مەملەكەتتەرى مۇشە ەكەنىن ايتا كەتەيىك.
ەلامان قوڭىر.
دەرەك, سۋرەت: ca-news-org.