استانا. 5 ءساۋىر. رەسەيدە اسا قاۋىپتى قىلمىسكەرلەردىڭ ءبىرى, كيللەر, «كىشى دريۋنيا» لاقاپ اتىمەن بەلگىلى اندرەي ءدريۋنيندى يركۋتسك قالاسىنىڭ پوليتسەيلەرى مەن زابايكالە ولكەسىندەگى فەدەرالدى قاۋىپسىزدىك قىزمەتى باسقارماسىنىڭ وكىلدەرى قولعا ءتۇسىردى. بۇل تۋرالى sibinfo.su حابارلادى.
حابارلامادا كورسەتىلگەندەي, پوليتسەيلەر چيتا قالاسىنىڭ تۋماسى, 41 جاستاعى ا.دريۋنين يركۋتسك وبلىسى وكتيابر اۋدانىندا جاسىرىنىپ جۇرگەنىن ەستىگەن ەكەن. ول وسىندا تالايدى زار قاقساتقان قىلمىستىق توپتىڭ مۇشەسى بولىپتى.
زابايكالە ىشكى ىستەر مينيسترلىگىنىڭ حابارلاۋىنشا, اتالمىش كيللەر ەلدەگى ەڭ قاۋىپتى 10 قىلمىسكەردىڭ ءبىرى كورىنەدى. وعان 10 ادامدى تاپسىرىسپەن ءولتىردى دەگەن ايىپ تاعىلىپ وتىر.
رەسەي ىشكى ىستەر مينيسترلىگى زابايكالە ولكەلىك قىلمىستىق ىزدەستىرۋ باسقارماسىنىڭ باسشىسى اندرەي موسكۆيتيننىڭ سوزىنە قاراعاندا, كۇدىكتىگە وتە قاتىگەز ءارى تەز شەشىم قابىلداي بىلەتىن قىلمىسكەر دەگەن مىنەزدەمە بەرىلگەن. پوليتسەيلەردىڭ ايتۋىنشا, ا.دريۋنين وزىنە قۇقىق قورعاۋ ورىندارى ىزدەۋ جاريالاعانىن بىلە تۇرا «كاسىبىن» توقتاتپاعان.
قازىرگى تاڭدا كۇدىكتى چيتا قالاسىنا جەتكىزىلىپ, ۋاقىتشا وقشاۋلاعىشىنا وتىرعىزىلعان.
جولدىباي بازار.
دەرەك, سۋرەت: sibinfo.su.