جاقىندا مينسك قالاسىندا XXII حالىقارالىق كورمە-جارمەڭكە ءوتتى. كورمە بارىسىندا «زۆيازدا» باسپا ۇيىندە بەلورۋس تىلىندە جارىق كورگەن ن.كەلىمبەتوۆتىڭ « ۇلىما حات» كىتابىنىڭ تۇساۋكەسەرى ءوتتى.
كورمە قوناقتارى مەن وقىرماندارمەن كەزدەسۋدى «زۆيازدا» باسپا ءۇيىنىڭ باس رەداكتورى الەس كارليۋكەۆيچ اشىپ, وسى مەديا-حولدينگتىڭ قازاقستاندىق جوبالارى تۋرالى اڭگىمەلەدى. 2011 جىلى مينسكىدە ميكولى مەتليتسكي بەلورۋس تىلىنە اۋدارعان ابايدىڭ «جازىق دالا» اتتى ولەڭدەر جيناعى جارىققا شىقتى. سونىمەن بىرگە, ورىس تىلىندە قازىرگى قازاق جانە بەلورۋس ادەبيەتتەرىنىڭ «سوزۆۋچيە سەردەتس: بەلارۋس – كازاحستان» سەرياسىمەن «نە ۆەدايا گرانيتس» انتولوگياسى باسىلىپ شىقتى. سوڭعى باسىلىمنىڭ قۇراستىرۋشىسى – اتاقتى بەلورۋس اقىنى الەس باداك. «زۆيازدا» باسپا ءۇيى – جازۋشىلاردىڭ جىل سايىن مينسك قالاسىندا وتەتىن «كوركەم ادەبيەت – ءوزارا تابىسۋ جولى» حالىقارالىق دوڭگەلەك ۇستەلىنىڭ قۇرىلتايشىسى. ءار جىلدارى قازاقستاننىڭ جازۋشىلارى ۆالەري ميحايلوۆ, قايرات باقبەرگەنوۆ, ليۋبوۆ شاشكوۆا, رايحان ماجەنقىزى, سۆەتلانا انانەۆا وسى دوڭگەلەك ۇستەلگە قاتىسىپ ءجۇر.
وتكەن جىلى «زۆيازدا» باسپا ءۇيى نەمات كەلىمبەتوۆتىڭ «ءۇمىت ءۇزگىم كەلمەيدى» اتتى كىتابىن باسىپ شىعاردى. بەلورۋس تىلىنە الەس كارليۋكەۆيچ پەن الەس باداك اۋداردى. بيىلعى جىلى ن.كەلىمبەتوۆتىڭ « ۇلىما حات» دەگەن اتپەن ءبىر تومدىعى جارىققا شىقتى. اۋدارعاندار – الەس كارليۋكەۆيچ پەن گەننادي اۆلاسەنكو. اۋدارماشى الەس باداك تۇساۋكەسەر بارىسىندا كورنەكتى قازاق جازۋشىسى, ادەبيەتتانۋشىسىنىڭ شىعارماشىلىعى تۋرالى ءوزىنىڭ وي پىكىرىمەن ءبولىستى. تۇساۋكەسەردە «حۋدوجەستۆەننايا ليتەراتۋرا» باسپاسىنىڭ ديرەكتورى گريگوري پرياحين, فيلولوگيا عىلىمدارىنىڭ كانديداتى سۆەتلانا انانەۆا ءسوز سويلەدى. ءوزىنىڭ نەمات كەلىمبەتوۆكە ارناعان ولەڭىن ازەربايجان اقىنى چينگيز الي وگلۋ وقىدى.
نەمات كەلىمبەتوۆ قورىنىڭ وكىلى رايحان ماجەنقىزى بەلورۋس ۇلتتىق كىتاپحاناسىنا قازاق عالىمى جانە جازۋشىسىنىڭ الەمنىڭ ءارتۇرلى مەملەكەتتەرىندە باسىلعان «ءۇمىت ۇزگىم كەلمەيدى», « ۇلىما حات», «كۇنشىلدىك» كىتاپتارىن تاپسىردى.
ۆەرونيكا لوزوۆسكايا.
مينسك قالاسى.