حولدينگ قولتىعىنان دەمەگەن

«Oxy Textile» ءجىپ ءيىرۋ فابريكاسى جۇمىسىن باستادى

شىمكەنتتەگى «وڭتۇستىك» ارنايى ەكونوميكالىق ايماعىنداعى «Oxy Textile» ءجىپ ءيىرۋ فابريكاسى قايتادان ىسكە قوسىلدى. قايتادان دەۋىمىزگە سەبەپ بار. بۇل زاۋىت وسىدان اتتاي بەس جىل بۇرىن دۇرىلدەپ اشىلعان. ماقتا شيكىزاتى قايدا دەيتىندەي ەمەس, اق ماقتانىڭ وتانى ماقتاارال امان بولسىن. فابريكا قۇرىلتايشىسى دا قارجىدان قينالمايتىندىعىن كەسىپ ايتقان. توقىماشىلار دا كوڭىلدى-اق ەدى. ايتسە دە «ۇيدەگى كوڭىلدى بازارداعى نارىق بۇزادىنىڭ» كەرى كەلدى. 2008-2009 جىلدارداعى الەمدىك قارجى داعدارىسى مەن ماقتا باعامىنا دەگەن تۇراقسىزدىق كۇنى ەرتەڭ قازاقستانداعى ەڭ مىقتى فابريكانىڭ ءبىرى بولادى دەپ وتىرعان كاسىپورىننىڭ جابىلىپ قالۋىنا اكەلىپ سوقتى. وبلىستىق ءماسليحاتتىڭ دەپۋتاتى, بەلگىلى كاسىپكەر ابىلقاسىم دوسبولوۆ وڭتۇستىك كورەياداعى مال ازىعىن دايىندايتىن ءىرى كاسىپورىنداردىڭ ءشوپتى امەريكادان باستاپ ءبىراز ەلدەردەن ساتىپ الاتىندىعىن ايتىپ ەدى. قۇراما جەمگە اينالدىرىپ ەڭ ءىرى مال بورداقىلاۋ ورىندارىن ازىقتان تارىقتىرماي تابىسقا شىعىپ وتىر ەكەن. ال, وڭتۇستىكتە امەريكادان اربالايتىنداي ەمەس, قۇدايعا شۇكىر, اق ماقتا جەتەدى. ليۆەرپۋل ماقتا بيرجاسىنداعى باعا تۇراقسىزدىعى بولماسا ءبىر ەمەس ونداعان زاۋىت, فابريكانىڭ قالاي, قايدا پايدالانامىن دەسە دە كەتپەندەرى كۇن نۇرىنا جارقىراعان ديقاندار اق التىننان تارىقتىرمايدى. بۇل جولى «Oxy Textile»-گە «Baiterek Venture Fund» كومەككە كەلدى. 907,5 ملن.تەڭگە كولەمىندە بولىنگەن قاراجات زاۋىتتىڭ ەش كەدەرگىسىز جۇمىس جاساۋىن قامتاماسىز ەتۋى ءتيىس. مۇنداي كاسىپورىندى ساۋىقتىرۋ جاڭا جۇمىس ورىندارىن اشادى. ونىڭ سىرتىندا بىلىكتى مامانداردىڭ ەلدەن كەتپەۋىنە, ءوڭدىرىستى وركەندەتۋگە مۇمكىندىك بەرەدى, دەدى «Baiterek Venture Fund» اق باسقارما توراعاسىنىڭ ورىنباسارى نۇرجان ابىشەۆ. بىزدە وسىنداي جانە باسقا دا توقىما ءوندىرىسى كاسىپورىندارىنىڭ قىزمەت ەتۋى ءۇشىن «وڭتۇستىك» ارنايى ەكونوميكالىق ايماعىندا تولىعىمەن ينجەنەرلىك ينفراقۇرىلىم جاسالعان. بۇگىنگى تاڭدا «وڭتۇستىك» ەەا-دا 21,665 ملرد. تەڭگەنى قۇرايتىن 8 جوبا ىسكە اسىپ, 1445 جۇمىس ورنى اشىلعان. ودان بولەك, قۇنى 114,7 ملرد. تەڭگەنى قۇرايتىن 11 جوبانى ىسكە اسىرۋ جۇمىستارى جۇرگىزىلۋدە. مۇندا جالپى 7141 جۇمىس ورنى اشىلماق. سونىڭ ىشىندە 2015 جىلى قۇنى 4,664 ملرد. تەڭگەنى جانە 1200 جۇمىس ورنى اشىلاتىن 4 جوبا ىسكە قوسىلادى.  «Oxy Textile» جشس فابريكاسىن ساۋىقتىرۋدىڭ ءار كەزەڭىندە وڭتۇستىك قازاقستان وبلىسىنىڭ اكىمدىگى تاراپىنان جان-جاقتى قولداۋ جاسالدى. توقىما كلاستەرى ءبىزدىڭ ايماقتىڭ بىردەن-ءبىر باسىم باعىتتارى بولىپ تابىلادى. سونىمەن قاتار, جۇمىس جاسايتىن كاسىپورىن – بۇل بيۋدجەتكە تۇسەتىن قوسىمشا سالىق تولەمدەرى, جاڭا جۇمىس ورىندارى جانە وبلىسىمىزدىڭ الەۋمەتتىك تۇراقتىلىعى, دەپ اتاپ ءوتتى وڭتۇستىك قازاقستان وبلىسى اكىمىنىڭ ورىنباسارى ساپاربەك تۇياقباەۆ. «بايتەرەك» ۇلتتىق باسقارۋشى حولدينگى» اق 2013 جىلى ەلباسىنىڭ جارلىعىمەن دۇنيەگە كەلگەن. نەگىزگى ماقساتى ەكونوميكانى دامىتۋ مەن ارتاراپتاندىرۋعا, ينۆەستيتسيا تارتۋعا, كلاستەرلەردى دامىتۋعا, ەنشىلەس ۇيىمداردا كورپوراتيۆتىك باسقارۋ جۇيەسىن جەتىلدىرۋگە قولداۋ كورسەتەتىن حولدينگ وڭتۇستىكتەگى فابريكاعا ءبىرىنشى رەت قولداۋ كورسەتىپ وتىرعان جوق. «Oxy Textile»-ءدىڭ باسىنا تونگەن كۇن «مەلانجدىڭ» قۇرامىنا كىرەتىن ەكى فابريكانى دا سانسىراتىپ كەتكەن. سول ماقتا-ماتا وندىرىسىندە دايىن ونىمدەردى شىعاراتىن ەكى فابريكانى دا «بايتەرەك» ەلباسىنىڭ تاپسىرماسىمەن ىسكە قوسىپ كەتكەن ەدى. «Oxy Textile» اياعىنا نىق تۇرعاننان كەيىن جىلىنا 6183 توننا دايىن ءونىم الماق نيەتتە. بۇگىندە فابريكادا توقساننان استام ادام جۇمىس جاساپ جاتىر. قۋاتىنا تولىق ەنگەننەن كەيىن 270 ادامعا جۇمىس ورنىن اشپاق. سونىمەن, «بايتەرەكتىڭ» سايا بولۋىنىڭ ارقاسىندا تاعى ءبىر كاسىپورىن قايتا ساپقا قوسىلدى. مۇنداعى قوندىرعىلار حالىقارالىق ستاندارتتارعا نەگىزدەلگەن, ءونىمى دە نارىقتاعى تايتالاسقا لايىق. قازىردىڭ وزىندە ەكسپورت ماسەلەسىندە كورشى قىتايمەن كەلىسسوز جۇرگىزىلۋدە. قىتاي – الىپ مەملەكەت. ماقتا ونىمىنە سۇرانىس ۇلكەن. قاجەتتەرىن اشار بولسا «Oxy Textile»-ءدىڭ ايى وڭىنان تۋادى دەي بەرىڭىز. ال, كاسىپورىن توقتاعاندا ۇيىندە امالسىز وتىرىپ قالعان توقىماشىلار توقىما ستانوكتارىنا قايتا ورالتقان ەلباسىنا راقمەت ايتادى. ءوندىرىس وركەندەسە قازاقستاننىڭ ەڭسەسى بيىك, ءجۇزى جارقىن, ازاماتتارىنىڭ كەلەشەككە دەگەن سەنىمى زور. باقتيار تايجان, «ەگەمەن قازاقستان». وڭتۇستىك قازاقستان وبلىسى.