استانا. 4 ءساۋىر. رەسەيدىڭ استراحان وبلىسىنىڭ سولتۇستىگىندە قازاق مادەني ورتالىعى اشىلدى. بۇل تۋرالى AstrakhanPost.Ru پورتالى حابارلادى.
جاڭا ورتالىقتىڭ اتى «بولاشاق» دەپ اتالادى. «ورتالىق ءبىزدىڭ كوپ ۇلتتى ولكەمىزدىڭ باي مادەني داستۇرلەرىن ساقتاپ, دامىتۋ ماقساتىنداعى ءارتۇرلى ۇلت وكىلدەرىنىڭ مەرەكەلەرى مەن سالت-داستۇرلەرىن, بەلگىلى ارتىستەرمەن شەبەرلىك كلاستارى مەن كەزدەسۋلەر وتكىزەتىن ورىنعا اينالادى», - دەلىنگەن ۇيىمداستىرۋشىلار تاراتقان پاراقشادا.
ورتالىقتىڭ اشىلۋىنا قازاقستاننان, استراحان جانە قارابالى قالالارىنان, كراسنويار اۋدانى مەن احتۋبا اۋدانىنىڭ نوۆو-نيكولاەۆكا سەلوسىنان قوناقتار قاتىستى. سالتاناتتى جيىندى اشقان احتۋبا اۋدانى مۋنيتسيپالدى ءبىلىم بەرۋ ءبولىمىنىڭ باسشىسى ۆيكتور ۆەديششەۆ ەكى حالىقتى عاسىرلار بويى ءبىر-بىرلەرىنە تىعىز بايلانىستىرىپ كەلە جاتقان دوستىق پەن مادەني داستۇرلەردى ەسكە الا كەلىپ, قۇرمەت رەتىندە «جولداستىق» قوعامىنا قازاقتىڭ داڭقتى كۇيشىسى قۇرمانعازى ساعىرباي ۇلىنىڭ بارەلفىن تاپسىردى.
جينالعانداردى ءوتىپ جاتقان ناۋرىز مەرەكەسىمەن ايماقتىق دۋمانىڭ دەپۋتاتى الەكسەي فۋريك, نوۆو-نيكولاەۆكا سەلوسىنىڭ اكىمى ايىس ورازعاليەۆ جانە ءبىر توپ اقساقالدار قۇتتىقتادى. سودان كەيىن استراحان ونەر ۇجىمدارى مەن قازاقستاننان كەلگەن قوناقتاردىڭ كونتسەرتى باستالدى.
بۇدان بولەك, مادەنيەت ءۇيىنىڭ فويەسىندە قازاقتىڭ ۇلتتىق تاعامدارىنىڭ كورمەسى بولدى. ال ونىڭ جانىنا تىگىلگەن قازاق كيىز ۇيلەرىنە باي داستارحان جايىلىپ, ءوزىنىڭ مەيماندارىن كۇتتى.
مۇرات ايتقوجا.
مانبە, فوتو: AstrakhanPost.Ru.