باتىس جاۋىنگەرلەرى قازاق بىتىمگەرلەرىن ۇيرەتىپ جاتىر

استانا. 4 ءساۋىر. قازاقستاندا كەشە «دالا قىرانى-2015» اسكەري جاتتىعۋىنىڭ شەشۋشى كەزەڭى باستالدى. بۇل تۋرالى Deutsche Welle حابارلادى. قازاقستان قورعانىس مينيسترلىگىنىڭ سايتىندا حابارلانعانداي, الماتى وبلىسىنداعى «ىلە» وقۋ پوليگونىنا اقش پەن ۇلىبريتانيا اسكەري قىزمەتكەرلەرىنىڭ الدىڭعى قاتارلى توپتارى جەتكىزىلدى. ولار مۇندا وزدەرىنىڭ قازاقستاندىق ارىپتەستەرىن وقىتپاقشى. وقۋ ەكى كەزەڭنەن تۇرادى. ونىڭ ءبىرىنشى ۇستىمىزدەگى ءساۋىر ايىندا وتسە, ەكىنشىسى ماۋسىمدا قولعا الىنادى. وقۋ-جاتتىعۋ جيىندارى دالالىق القاپتا دا, شتابتىق دەڭگەيدە دە وركەن جايادى. «جاتتىعۋلاردىڭ باستى ماقساتى بۇۇ-نىڭ بىتىمگەرلىك وپەراتسيالارىن وتكىزۋ كەزىندەگى قازاقستان بىتىمگەرلەر بريگادالارى مەن قازاقستان بىتىمگەرلەر باتالونىنىڭ شتاب جۇمىسىنداعى پراكتيكالىق داعدىلارىن جەتىلدىرۋ, سونداي-اق اسكەري بولىمشەلەردىڭ قارسىلاسۋشى جاقتاردىڭ جانجالدارى جاعدايىندا بىتىمگەرلىك ءىس-قيمىل اتقارۋ كەزىندەگى جاۋىنگەرلىك ۇيلەسىمدىلىگىن كوتەرۋ بولىپ تابىلادى», - دەلىنگەن رەسپۋبليكا قورعانىس مينيسترلىگى ءباسپاسوز قىزمەتىنىڭ ءباسپاسوز پاراقشاسىندا. قۇرىش نۇرىمبەت. مانبە, فوتو: Deutsche Welle.