الىمدىلىعىمەن, ادۋىندىلىعىمەن ەكىنىڭ بىرىنە دەس بەرمەيتىن ايەل-انالارىمىزدىڭ قاتارىنان جۋرناليست كۇمىسجان بايجان دا تابىلادى. قاشاندا, ءالىپتىڭ ارتىن كۇتىپ, بايسالدىلىعىمەن باستاعان جۇمىسىنان وڭ ناتيجە شىعارۋ قالىپتاسقان ادەتى. ءبىر مىسال رەتىندە ايتار بولساق, ول جىر الىبى جامبىل جاباەۆتىڭ تۋعان كۇنىن جىل سايىن جوعارى دەڭگەيدە اتاپ ءوتۋدى قالىپتاستىرۋعا وزىندىك ەڭبەك سىڭىرە ءبىلدى. الماتى وبلىسى, جامبىل اۋداندىق «اتامەكەن» گازەتىن باسقارىپ وتىرعان جىلدارىندا وسىناۋ يگىلىكتى ىسكە ۇيىتقى ءھام قوزعاۋشى كۇش يەسى بولعاندىعىن ەشكىم تەرىسكە شىعارا الماسى حاق.
رەسپۋبليكالىق باس باسىلىم «ەگەمەن قازاقستان» گازەتىنىڭ الماتى وبلىسىنداعى مەنشىكتى ءتىلشىسى قىزمەتىنە كەلگەندە قۇددى قوسىمشا تىنىسى اشىلعانداي كۇنى-ءتۇنى تىنباي ەڭبەك ەتتى. ەڭ باستىسى, جاۋاپكەرشىلىك جۇگىن جەتە سەزىنىپ, بارىنشا شىعارماشىلىق ىزدەنىستە ءجۇردى. بويىنداعى ءبىر قاسيەتى – ءوتكەندى ەكشەپ, تارازىلاي الاتىنى دەر ەدىك. ءومىر قاجەتتىلىگىمەن جاسالعان قادامداردى استە ۇمىتپاي جۋرناليستەر قاۋىمىنا ءتان ادالدىقپەن ار تازالىعىن ساقتاۋعا تالپىنىپ قانا قويماي, وڭ ناتيجە شىعارا الاتىندىعى دەسەك ارتىق ايتقاندىق ەمەس. كەپىلدىك بەرەر ءبىر اۋىز سوزىمەن ۇلكەن لاۋازىمدى تۇلعانى دا يلاندىرعانىن ەت قۇلاعىمىز ەستىگەن. تاعى ءبىر قىرى كومەككە وتە ءزارۋ بولعان جاندارمەن تەز ۇعىنىسىپ, دەمەي بىلەتىندىگىمەن دە كورىنە الدى. سول قامقورلىعىنىڭ ناتيجەسىن كورگەن جاندار ارامىزدا بارشىلىق. جۇرگەن جەرىندە جاقسى ءىز قالدىرا بىلەتىندىگىنە ءبىر دالەل, ونىڭ كەشەگى مەيىرىم شۋاعىنا تولى كۇندەرىن كورىپ, جۇمساق ءجۇرەكتى جاننىڭ جىلۋىن سەزىنگەن سىڭلىلەرى تامسانا ايتىپ, ۇلكەن ءىلتيپات تانىتىپ جۇرگەنىنە كۋامىز.
جۇرەگىنىڭ تۇبىندەگى ءسوز مارجانىن ءبىر شۋماققا سىيعىزا بىلگەن كۇمىسجان بايجاننىڭ:
«ۇناتامىن پەرىشتە ءۇنىن قۇستاردىڭ,
ءدال سولارداي قالىقتاۋعا قۇشتارمىن.
ۇيا سالىپ بالاپانىن وسىرگەن,
قارلىعاشتاي وي-ءسوزىمدى ۇشتارمىن» دەگەن ولەڭ جولدارى وسى ويىمىزدى بەكىتە تۇسەدى.
ەلباسىنىڭ العىس حاتىمەن بىرنەشە مارتە ماراپاتتالىپ, «ەگەمەن قازاقستان» گازەتىنىڭ الماتى وبلىسىنداعى مەنشىكتى ءتىلشىسى قىزمەتىن جەتى جىل اتقارىپ, مادەنيەت قايراتكەرى, «ەڭبەك ارداگەرى» جانە مەرەكەلىك مەدالداردىڭ يەگەرى بولىپ, الماتى وبلىسى مەن تالدىقورعان قالاسىنىڭ, جامبىل اۋدانىنىڭ قۇرمەتتى ازاماتى اتانعان كۇمىسجان بايجان جۋرناليستيكا سالاسىندا قىرىق جىلدان استام جەمىستى ەڭبەك ەتتى. بۇگىندە ۇلىن ۇياعا, قىزىن قياعا قوندىرىپ, قوساعىمەن قوسا اعارىپ سول ەڭبەگىنىڭ جەمىسىن جەپ وتىر. بۇل دا ءبىر اقتالعان ءۇمىتتىڭ, ويعا العاننىڭ ورىندالعانى ەكەنى انىق.
نۇربول الدىباەۆ,
«ەگەمەن قازاقستان».
الماتى وبلىسى,
جامبىل اۋدانى.