استانا. 13 ناۋرىز. بۇگىن تۇندە فۋتبولدان ەۆروپا ليگاسى اياسىندا 1/8 فينالدىڭ العاشقى ويىندارى ءوتتى. سەگىز ويىننان تۇراتىن جارىس كۇنى سانكت-پەتەربۋرگتىڭ «زەنيتى» مەن ءتۋريننىڭ «تورينو» كوماندالارى اراسىنداعى ايقاسپەن باستالدى. بۇل تۋرالى egemen.kz حابارلادى.
تورەشى ىسقىرىعى ەستىلىسىمەن «زەنيت» بىردەن شابۋىلعا شىقتى. الايدا, «تورينو» قورعاۋشىلارى ءداننيدى دەر كەزىندە توقتاتىپ, قاۋىپتىڭ بەتىن قايتاردى. بىردەن قارىمتا شابۋىلعا شىققان يتاليالىقتار وڭ قاپتالمەن الاڭ يەلەرىنىڭ بارلىق قورعانىسىن بۇزىپ-جارىپ, قاقپاعا قاراي ۇمتىلدى. رەسەيلىكتەردىڭ قۋانىشىنا وراي, قورعاۋشى يگور سمولنيكوۆ ءوز ورنىنان تابىلىپ, شابۋىل ناتيجەسىز اياقتالدى.
تارتىستىڭ 12-مينۋتىندا «تورينو» ويىنشىسى ماركو بەناسسي ەرەجە بۇزىپ, ەسكەرتۋ الدى. ال ارادا 16 مينۋت وتكەندە بەناسسي ەكىنشى مارتە ويىن ءتارتىبىن بۇزدى. بۇل جولى دا تورەشى قالتاسىنان سارى قاعازىن الىپ, سوڭىنان قىزىل قاعازدى سۋىردى.
باسەكەنىڭ باستالعانىنا جارتى ساعات وتپەي جاتىپ ءبىر ويىنشىسىنان ايىرىلعان يتاليالىقتار ويىننىڭ قالعان بولىگىندە وتە ساق قيمىلداۋعا تىرىستى. سونىڭ وزىندە «زەنيت» جاۋاپسىز ەكى دوپ سوعىپ, جەڭىسكە جەتتى.
ەلامان قوڭىر.
دەرەك: egemen.kz.
سۋرەت: euro-football.ru.
«زەنيت» (سانكت-پەتەربۋرگ, رەسەي) – «تورينو» (تۋرين, يتاليا) 2:0 (1:0).
12 ناۋرىز. سانكت-پەتەربۋرگ. «پەتروۆسكي» ستاديونى. 20 000 كورەرمەن.
تورەشى: مانۋەل دە سوۋزا (پورتۋگاليا).
«زەنيت»: يۋ.لودىگين, ل.نەتۋ, ي.سمولنيكوۆ, ە.گاراي, د.كريشيتو, ا.ۆيتتسەل (ا.تيموششۋك 90), ح.گارسيا, و.شاتوۆ (ا.ريازانتسەۆ 81), دانني, حالك, س.روندون.
«تورينو»: د.پادەللي, ك.مولينارو, ك.گليك, ن.ماكسيموۆيچ, ە.مورەتتي, ا.گاتستسي, م.بەناسسي, ج.مارتينەس (د.ۆيۆەس 34, ا.فارنەرۋد 50), و.ەل كاددۋري, م.دارميان, كۋاليارەللا (م.لوپەس 74).
گولدار: ا.ۆيتتسەل 38, د.كريشيتو 53.
ەسكەرتۋلەر: ح.گارسيا 34, ي.سمولنيكوۆ 64, ا.ريازانتسەۆ 88 – م.بەناسسي 12, ك.گليك 87, ك.مولينارو 90.
الاڭنان قۋىلدى: م.بەناسسي 28.