شىعىس وڭىرىندە سايلاۋدى بايقاۋ جونىندەگى وڭىرلىك قوعامدىق كوميسسيا اشىلدى. اتالعان كوميسسيا سايلاۋ ۇدەرىستەرىنىڭ اشىقتىعىن قامتاماسىز ەتۋ ماقساتىندا قۇرىلدى. كوميسسيا وكىلدەرى سايلاۋ بارىسىندا كونستيتۋتسيالىق زاڭنىڭ تالاپتارى مەن سايلاۋ قۇقىقتارىنىڭ نورمالارىن رەتتەيتىن زاڭنامانىڭ ساقتالۋىن جانە داۋىس بەرۋ بارىسىن بايقايتىن بولادى.
«سايلاۋدى بايقاۋ بويىنشا رەسپۋبليكالىق قوعامدىق كوميسسياسى» رەسپۋبليكالىق قوعامدىق بىرلەستىگىنىڭ وبلىستىق فيليالىنىڭ جەتەكشىسى سۆەتلانا لينوكتىڭ ايتۋىنشا, وڭىردەگى بارلىق سايلاۋ ۋچاسكەلەرىندە 1 مىڭنان استام بايقاۋشى جۇمىس ىستەمەك.
– قازىرگى كەزدە ءبىز وكىلدەردى تاڭداۋ جۇمىستارىن جۇرگىزۋدەمىز. قۇرامىندا ءبىلىم سالاسىنىڭ قىزمەتكەرلەرى, زەينەتكەرلەر, ستۋدەنتتەر, جاستار ۇيىمدارىنىڭ وكىلدەرى بار بارلىق بايقاۋشىلار الدىن الا وقىتۋ سەمينارىنان وتەدى, – دەدى س.لينوك.
وبلىستىق كوميسسيانىڭ ماقساتىن وڭىردەگى ازاماتتىق اليانس تا قۇپتاپ وتىر.
– ازاماتتىق اليانستىڭ سايلاۋدى بايقاۋ, سايلاۋ ۇدەرىستەرىن قاداعالاۋ جانە تەحنولوگيالاردى قولدانۋ بويىنشا اۋقىمدى تاجىريبەسى بار. ءبىز دە ءوز تاراپىمىزدان بايقاۋشىلار جىبەرىپ, وبلىستىڭ بارلىق قالالارى مەن اۋداندارىندا پۋل قۇرۋ ارقىلى وسى ىسكە قولداۋ كورسەتپەكپىز. ياعني, وسى پۋل ارقىلى قانشا ادامنىڭ داۋىس بەرگەنىن, قاي كانديدات قانشالىقتى قولداۋعا يە بولعانىن انىقتاي الامىز. داۋىستاردى ساناۋ ناتيجەسىندە شىعىس قازاقستان وبلىسى بويىنشا ناقتى ناتيجەلەردى ۇسىناتىن بولامىز, – دەدى شىعىس قازاقستان وبلىسى ازاماتتىق اليانسىنىڭ توراعاسى, وبلىستىق ءماسليحات دەپۋتاتى ولەگ چەرنىشوۆ.
وسى ۋاقىتقا دەيىن تمد اۋماعىندا بىرقاتار ەلدەردىڭ پرەزيدەنتتىك سايلاۋلارىندا حالىقارالىق بايقاۋشى رەتىندە جۇمىس ىستەگەن ولەگ چەرنىشوۆ بيىلعى كەزەكتەن تىس سايلاۋدا شەتەلدىك بايقاۋشىلار سانى وتكەن سايلاۋلاردان اناعۇرلىم كوپ بولاتىنىن جەتكىزدى.
– بۇگىندە وڭىرىمىزدە ەقىۇ-دان حالىقارالىق بايقاۋشىلار كەلىپ, سايلاۋ ۋچاسكەلەرىنىڭ جۇمىسىمەن تانىسۋ ۇستىندە. سونىمەن بىرگە, تمد ەلدەرىنەن دە ارنايى وكىلدەر تىركەلىپ جاتىر. حالىقارالىق بايقاۋشىلاردىڭ نەگىزگى لەگى سايلاۋ كۇنى تاياعاندا كەلەدى. ولار وبلىس كولەمىندەگى كەز كەلگەن سايلاۋ ۋچاسكەسىندە ەلىمىزدىڭ «سايلاۋ تۋرالى» زاڭىنىڭ ورىندالۋ بارىسىمەن جانە سايلاۋدىڭ ءوتۋ ۇدەرىسىمەن تانىساتىن بولادى, – دەدى ول.
وڭىردە ەل بولاشاعىن انىقتاۋداعى ماڭىزى زور ساياسي ناۋقانعا دايىندىق قىزۋ ءجۇرىپ جاتىر. دايىندىق كەزەڭىندە بايقاۋشىلار سايلاۋ ۋچاسكەلەرىن ارالاماق. ولار ۇگىت-ناسيحات ناۋقانى مەن سايلاۋشىلار ءتىزىمى بويىنشا جۇمىس ىستەيدى. سونداي-اق, سايلاۋعا قاتىسۋدى تەڭ دارەجەدە قامتاماسىز ەتۋ جانە سايلاۋ ۇدەرىستەرىندەگى ىقتيمال زاڭ بۇزۋشىلىقتاردان ساقتاندىرۋ جونىندە جۇمىستار جۇرگىزىلەدى. سايلاۋ كۇنى وبلىس اۋماعىندا 1079 سايلاۋ ۋچاسكەسى جۇمىس ىستەيدى. وبلىس ورتالىعىندا 120 سايلاۋ ۋچاسكەسى, سەمەي قالاسىندا 145 سايلاۋ ۋچاسكەسى تىركەلگەن.
دۋمان اناش,
«ەگەمەن قازاقستان».
وسكەمەن.