قازاقستانداعى سايلاۋلاردى بايقاۋ ءجونىندەگى رەسپۋبليكالىق قوعامدىق كوميسسيا وبلىستىق فيليالىنىڭ تانىستىرىلۋ ءراسىمىنەن كەيىن ءبىز ونىڭ توراعاسى سەرگەي حۋدياكوۆتى اڭگىمەگە تارتىپ, الداعى جۇمىس جوسپارلارى جايلى سۇراعان ەدىك. ول بىلاي دەدى:
– ءبىز سايلاۋ ۇدەرىستەرىنە قوعامدىق نەگىزدە اتسالىساتىندىعىمىزعا قاراماستان, ۇلكەن جاۋاپكەرشىلىك جۇكتەلىپ وتىرعانىن جاقسى تۇسىنەمىز. ويتكەنى, ەلىمىزدىڭ ءارى قاراي دامۋى, كەلەشەك تاعدىرى ايقىندالاتىن تاريحي تاڭداۋ ەشكىمدى بەيجاي قالدىرماسى انىق.
ال كوميسسيا جۇمىسىنا توقتالاتىن بولساق, وعان جان-جاقتى ازىرلىكپەن كەلىپ وتىرمىز. ونىڭ قۇرامىنا ءتۇرلى قوعامدىق ۇيىم مۇشەلەرى ەنگەن. شەتتەرىنەن تاجىريبەلى, مۇنىڭ الدىنداعى سايلاۋلارعا قاتىسىپ, كاسىبي جاعىنان ابدەن ىسىلعان جاندار دەۋگە بولادى. وبلىستا قۇرىلعان سايلاۋ ۋچاسكەلەرىنە وكىلدەرىمىزدى جىبەرۋدى ۇيعارىپ وتىرمىز.
بۇگىندە جەرگىلىكتى سايلاۋ ۋچاسكەلەرىندە جۇمىس ىستەۋگە ىنتا بىلدىرگەن 700-گە جۋىق بايقاۋشى مەن ەرىكتى دايىندىق كۋرستارىنا جىبەرىلىپ, ءادىستەمەلىك, تاعى باسقا قاجەتتى قۇرالدارمەن قامتاماسىز ەتىلۋدە.
ءبىز سايلاۋعا قاتىسۋشى رەتىندە عانا ەمەس, وعان دەيىن جۇرگىزىلەتىن ۇدەرىستەر اعىمىندا زاڭ تالاپتارىنىڭ ساقتالۋىن, ولقىلىقتارعا جول بەرمەۋ, ورىن السا, دەرەۋ تۇزەتۋ ماسەلەلەرىنە دە ارالاساتىن بولامىز. ويتكەنى, دەموكراتيالىق قوعامدا ءومىر سۇرگەندىكتەن, بارلىق ءراسىمدەردىڭ قاتاڭ ساقتالۋى, تالاپقا ساي جۇرگىزىلۋى باستى باسىمدىق رەتىندە كورىنۋى ءتيىس.
قازىردىڭ وزىندە سايلاۋشىلار تاراپىنان ساۋالدار قويىلۋدا. ولاردىڭ بىردە-ءبىر ءوتىنىش-تىلەكتەرىن اياقاستى قالدىرماۋ ماقساتىمەن شتابتا بايلانىس قىزمەتىن جانداندىرۋدىڭ بارلىق مۇمكىندىكتەرى قاراستىرىلعان.
26 ءساۋىر كۇنى وتەتىن پرەزيدەنتتىك سايلاۋ وزگەلەر سىقىلدى بايقاۋشىلار قاۋىمىنا دا كەلەلى مىندەتتەر جۇكتەپ وتىر. سىن ساعاتتان مۇدىرمەي وتۋگە قابىلەت-قارىمىمىز تولىق جەتەدى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.