ءساۋىر ايىنىڭ العاشقى كۇنى كيەلى ماڭعىستاۋ توپىراعىنا قادام باسقان «مەنىڭ قازاقستانىم» پويىزىنىڭ بەينەۋ اۋدانىنىڭ ورتالىعى – بەينەۋ كەنتىنەن كەيىنگى توقتاعان ءوڭىرى مۇنايلى اۋدانى بولدى. نەگىزىنەن, الىس-جاقىننان ورتامىزعا ورالعان باۋىرلار شوعىرلانعان اۋدان تۇرعىندارى پويىزدى ەمەن-جارقىن كوڭىلمەن قارسى الدى.
– كوپۇلتتى مەملەكەتىمىزدىڭ بەرەكە-بىرلىگى مەن وركەندەپ-دامۋى – بارشامىزعا ورتاق قاجەتتىلىك. ءبىز بولاشاققا ايرانداي ۇيىعان اۋىزبىرلىگىمىز, تاتۋلىعىمىز بەن جۇدىرىقتاي جۇمىلعان بىرلىگىمىز ارقىلى جەتەمىز. ۇلتتار اراسىنداعى دوستىقتى ناسيحاتتاپ ەل اراسىنا شىققان «مەنىڭ قازاقستانىم» پويىزىن ءبىز قۋانا قارسى الامىز, – دەدى اۋدان ورتالىعى ماڭعىستاۋ ستانساسىنداعى تەمىرجول ۆوكزالىنان قارسى العان ماڭعىستاۋلىقتار اتىنان ماڭعىستاۋ وبلىسى اكىمىنىڭ ورىنباسارى راقىمبەك ءامىرجانوۆ.
تاۋەلسىزدىك العان سوڭ ەلىمىزدە العاش اشىلعان بۇل اۋدان تۋرالى كوبىرەك ايتۋعا بولادى. 2007 جىلى قۇرىلعان اۋداننىڭ جەر كولەمى 492,2 مىڭ گا, قازىر اۋداندا ماڭعىستاۋ, باياندى اۋىلدارى, قىزىلتوبە, اتامەكەن, باسقۇدىق, داۋلەت, باتىر اۋىلدىق وكرۋگتەرى بار. جاس تا بولسا وزىندىك كەلبەتى قالىپتاسىپ, تۇگەلگە دەرلىك قاراكوز قانداستارىمىزدان تۇراتىن 130 مىڭعا تارتا تۇرعىنى بار, بۇرىن بوس جاتقان دالا ءتوسىن اۋىلعا تولتىرىپ, جىلدان-جىلعا قاناتىن جايىپ كەلە جاتقان اۋدان. تۇرعىندار وبلىس ورتالىعى – اقتاۋ قالاسىنان نەبارى 20 شاقىرىم قاشىقتىققا, ءتىپتى, «اۋىلى ارالاس, قويى قورالاس» دەيتىندەي, كەيبىر تۇستاردا شەكتەسە ورنالاسۋىن قولايلى سانايتىن بولار, مۇندا حالىق سانى كوشىپ كەلۋشىلەر مەن تابيعي ءوسىم ەسەبىنەن كىدىرىسسىز ءوسىپ كەلەدى, اۋدان اشىلعالى بەرى تۇرعىندار سانى 76,1 مىڭ ادامعا كوبەيگەن. وسىعان وراي مەكتەپ, بالاباقشا, دارىگەرلىك نىسان سىندى الەۋمەتتىك عيماراتتار قۇرىلىسى قارقىن الىپ تۇر.
– «ۇلكەن ۇيگە نە كەرەك بولسا, كىشى ۇيگە دە سول كەرەك» دەگەندەي, جاڭا اۋدان تۇرعىندارىن الەۋمەتتىك تۇرعىدا قامتىپ, اۋداننىڭ ەكونوميكالىق قارقىنىن ارتتىرۋ باعىتىندا جۇمىستانىپ كەلەمىز. جىل باسىنان بەرى ءار سالادا ءبىرشاما وڭ ناتيجەلەرگە قول جەتكىزىلدى. مىسالى, ونەركاسىپ ونىمدەرىنىڭ ءوندىرىس كولەمى 9 609,6 ملن. تەڭگەنى قۇراپ, وتكەن جىلداعى كورسەتكىشتى ساقتاپ قالا السا, ەكى ايدا 31,2 مىڭ شارشى مەتر تۇرعىن ءۇي پايدالانۋعا بەرىلدى, بۇل ەسەپتى كەزەڭدە 23,5 مىڭ شارشى مەتردى قۇراعان ەدى. سونداي-اق, اۋداندا بارلىق ەكونوميكالىق قىزمەت تۇرلەرى جۇمىسشىلارىنىڭ ورتاشا جالاقىسى 118 859 تەڭگەنى قۇرادى, بۇل وتكەن جىلعىدان 327 تەڭگەگە كوبەيگەن. مەملەكەت كاسىپكەرلىك سالاسىنا ايرىقشا ءمان بەرىپ وتىر. بۇل باعىتتا ءبىزدىڭ اۋداندا كاسىپكەرلىكپەن اينالىسامىن دەگەن ادامعا مۇمكىندىك تە, قولداۋ دا بار. بيىل قاڭتار, اقپان ايلارىندا وتكەن جىلعىدان 532-گە كوبەيگەن 4609 شاعىن كاسىپكەرلىك سۋبەكتىسى تىركەلدى جانە شاعىن كاسىپكەرلىك سالاسىندا جۇمىسپەن قامتىلعاندار سانى 5 382 ادامعا جەتتى, – دەدى اۋداننىڭ بۇگىنگى تىنىس-تىرشىلىگىن تانىستىرعان ەلۋباي جاقاەۆ.
سان-ساپات ادام كوشىپ كەلىپ, قوردالانعان ماسەلەلەردى تۋىنداتقان اۋداننىڭ «بەتىن بەرى قاراتىپ», بۇگىندە وبلىستاعى الدىڭعى قاتارلى اۋدانداردىڭ قاتارىنا قوسقان اۋدان اكىمى نازارىنان ءبىلىم بەرۋ سالاسى تىس قالعان جوق. ونىڭ ءجونى دە بار, ويتكەنى, ءۇش اۋىسىمدى وقىتۋ, تاسىمال ماسەلەسى حالقى كوپ وسى اۋداندا كۇردەلى بولىپ كەلگەن. قازىرگى تاڭدا اۋدان مەكتەپتەرىندە 20 مىڭنان استام وقۋشى ءبىلىم الىپ ءجۇر. جەر قويناۋىن پايدالانۋشى كومپانيالار ەسەبىنەن «ماڭعىستاۋ-4» تۇرعىن ءۇي ماسسيۆىندە 1200 ورىندىق مەكتەپ پايدالانۋعا بەرىلسە, جەرگىلىكتى بيۋدجەت ەسەبىنەن اتامەكەن, داۋلەت اۋىلدارىندا 280 ورىندىق بالاباقشا قۇرىلىسى جانە اتامەكەن اۋىلىندا 1200 ورىندىق مەكتەپ قۇرىلىسى ءجۇرۋدە. «ماڭعىستاۋ-5» ەلدى مەكەنىنەن 280 ورىندىق بالاباقشا عيماراتى جۋىق ارادا پايدالانۋعا بەرىلمەك. مەكتەپتىڭ جەتىسپەۋشىلىگىنەن تۋىنداعان وقۋشىلاردى تاسىمالداپ وقىتۋ ءۇشىن ارنايى اۆتوبۋستار ساتىلىپ الىنىپ, وقۋشىلار ايالداماسى اشىلىپ, وڭتايلى جولعا قويىلعان. ال 3-6 جاستاعى بالالاردى باقشامەن قامتۋ 57 پايىزدى قۇراپ وتىر.
«كوش جۇرە تۇزەلەدى» دەگەندەي, ىرگەتاسىن قالاۋى دا, اياعىن قاز باسۋى دا داعدارىس كەزدەرىنە تۇسپا-تۇس كەلگەن اۋداننىڭ الداعى كەزەڭدەرگە مەجەلەپ وتىرعان جوسپار-جوبالارى جوق ەمەس. قازاقىلىققا ساي قوناقتاردى اقپەيىلمەن قارسى العان مۇنايلىلىقتار «مەنىڭ قازاقستانىم» پويىزىنىڭ كەلۋىنە ريزاشىلىقتارىن ءبىلدىردى.
ءبىر كۇن بويى كاسىپكەرلىك, الەۋمەتتىك, زاڭگەرلىك باعىتتاعى كەڭەستەرگە جۇگىنۋشىلەر دە از بولعان جوق. تۇرعىنداردىڭ, اسىرەسە, شوعىرلانا بارعان جەرى – دارىگەرلەر قابىلداۋى بولدى. ءبىر كۇندە دارىگەرلەرگە 410 ەرەسەك ادام, 180 بالا قارالىپ ۇلگەردى. بەلگىلى ونەرپازداردىڭ كونتسەرتى دە مۇنايلى اۋدانى تۇرعىندارىنا ۇلكەن سىي بولدى.
شارافاددين ءامىروۆ,
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى,
مۇنايلى اۋدانى.