استانا. 3 ءساۋىر. كەنيانىڭ گاريسسا قالاسىنداعى ۋنيۆەرسيتەتكە «اش-شاباب» توبىرىنىڭ شابۋىلى كەزىندە كەم دەگەندە 70 ادام قازا تاۋىپ, 79 ادام جاراقات الدى. بۇل تۋرالى Reuters مالىمەتىنە سۇيەنگەن ريا «نوۆوستي» حابارلادى.
بۇدان الدىن 15 ادامنىڭ وپات بولىپ, 65 ادامنىڭ زارداپ شەككەندەرى ايتىلىپ ەدى.
كەنيانىڭ اپاتتار زارداپتارىن جويۋ جونىندەگى ورتالىعى ءوزىنىڭ Twitter-دەگى رەسمي اككاۋنتىندا ارنايى قىزمەتتىڭ شابۋىل كەزىندە كەپىلگە الىنعان 500-دەن استام ستۋدەنتتى قۇتقارا العانىن مالىمدەدى.
سونداي-اق بيلىكتىڭ ەلدىڭ سوماليمەن شەكتەس تانا, گاريسسا, ۆادجيرا جانە ماندەرا دەپ اتالاتىن 4 وكرۋگىندە كومەندانتتىق ساعات ەنگىزۋ تۋرالى شەشىم قابىلداعانى ايتىلىپ وتىر. كومەندانتتىق ساعات ءساۋىردىڭ 16-سىنا دەيىن 18:30-دان 6:30-عا دەيىن كۇشىندە بولادى.
كەنيا ىشكى ىستەر ءمينيسترى بۇدان بۇرىن ارانيى قىزمەت ورىندارىنىڭ ۋنيۆەرسيتەتكە شابۋىل جاساعان ەكى توررروشىنى جويعانىن مالىمدەگەن بولاتىن.
كەنيا بيلىگى گاريسسا قالاسىنداعى ۋنيۆەرسيتەتكە شابۋىل جاساۋداعى باستى كۇدىكتى بولىپ سانالىپ وتىرعان موحامەد موحامۋد (Mohamed Mohamud) جونىندە اقپار ءۇشىن 215 مىڭ دوللار كولەمىندە سىياقى بەلگىلەدى. بيلىك ونى كورگەندەردىڭ بارىنە بۇل تۋرالى قۇقىق قورعاۋ ورگاندارىنا حابارلاۋدى وتىنەدى.
جەرگىلىكتى Daily Nation باسىلىمى كەنيا ىشكى ىستەر مينيسترلىگىنە سىلتەمە جاساي وتىرىپ,
كۇدىكتى سودىرلاردىڭ ءبىرىنىڭ وقيعا بولعان جەردەن قاشىپ كەتپەك بولعان كەزىندە قولعا تۇسكەنىن جەتكىزدى. باق-تاردىڭ مالىمەتى بويىنشا, سودىرلار ستۋدەنتتەردى ءدىني ەرەكشەلىكتەرىنە قاراي ءبولىپ, كەپىلدىككە العان دا, سوڭىنان 15 مۇسىلماندى بوساتىپ قويا بەرگەن.
مۇرات ايتقوجا.
مانبە, سۋرەت: ريا نوۆوستي.