استانا. 3 ءساۋىر. فۋتبولدان 2016 جىلعى ەۋروپا چەمپيوناتىنا ىرىكتەۋ ءتۋرنيرى اياسىندا وتكەن چەرنوگوريا مەن رەسەي اراسىنداعى ويىننىڭ اياقسىز قالعانى بەلگىلى. جانكۇيەرلەردىڭ جاپپاي تارتىپسىزدىگىنە بايلانىستى 66-مينۋتتا توقتاعان ماتچتىڭ ماسەلەسىن ۋەفا 8 ساۋىردە قارايتىن بولدى. بۇل تۋرالى uefa.com حابارلادى.
نەگىزى ۋەفا اتالعان ءىس بويىنشا تەرگەۋ جۇمىستارىن 30 ناۋرىزدا باستاپ كەتتى. فۋتبول ماماندارى ويىننىڭ توقتاتىلۋىنا ەكى كوماندانىڭ دا جانكۇيەرلەرى كىنالى ەكەنىن ايتۋدا. سەبەبى, الاڭعا ءارتۇرلى زاتتاردى تەك چەرنوگوريانىڭ ەمەس, سونداي-اق, رەسەيدىڭ دە جانكۇيەرلەرى لاقتىرعان. وسى جايتتى ەسكەرىپ, ۋەفا قوس تاراپتى دا جازالاۋى مۇمكىن.
ايتا كەتەيىك, 27 ناۋرىزدا 2016 جىلعى ەۋروپا چەمپيوناتىنا ىرىكتەۋ ءتۋرنيرى اياسىندا كوماندالار ءبىر-بىرىنە قارسى الاڭعا شىقتى. چەرنوگوريانىڭ پودگوريتسا قالاسىندا وتكەن ويىن العاشقى مينۋتتا-اق توقتاتىلعانى ەسىمىزدە. سەبەبى, جەرگىلىكتى جانكۇيەرلەردىڭ ءبىرى رەسەي قاقپاشىسى يگور اكينفەەۆكە پيروتەحنيكالىق قۇرال لاقتىرعان ەدى. سالدارىنان ويىنشى جاراقات الىپ, الاڭنان كەتۋگە ءماجبۇر بولدى. 35 مينۋتتان كەيىن قايتا جالعاسقان ماتچ 66-مينۋتتا ءبىرجولا توقتاتىلدى. بۇعان جانكۇيەرلەردىڭ الاڭعا ويىنعا كەدەرگى كەلتىرەتىن زاتتاردىڭ تولاسسىز لاقتىرۋى سەبەپ بولدى. اتالعان كەزدەسۋگە گەرمانيالىق تورەشى دەنيز ايتەكين قازىلىق جاساعانىن ايتا كەتەيىك.
ەلامان قوڭىر.
دەرەك: uefa.com.
سۋرەت: ria.ru.