اۋىلدىق جەرلەردە سپورتتىڭ بۇقارالىلىعىن ارتتىرۋدا “اق بيداي” وبلىستىق سپارتاكياداسىنىڭ ماڭىزى ەرەكشە. بيىل دا بۇل مەرەكە ءوز دەڭگەيىندە اتالىپ ءوتتى. جارىس شىمىلدىعى ەسىل اۋدانىنىڭ ورتالىعى – ياۆلەنكا كەنتىندە اشىلدى. سالتاناتتى جيىندا سويلەگەن وبلىس اكىمى سەرىك ءبىلالوۆ ەلباسى جولداۋىندا ايتىلعان قازاقستاندىقتاردىڭ كەمىندە 30 پايىزىن سپورتقا تارتۋ مىندەتىنىڭ ماڭىزىنا توقتالا كەلىپ, جارىسقا قاتىسۋشىلارعا جەڭىس تىلەدى.
سپارتاكيادا فۋتبول, باسكەتبول, ۆولەيبول, ەركىن كۇرەس, ۇستەل تەننيسى, جەڭىل جانە اۋىر اتلەتيكا, ۆەلوجارىس سەكىلدى سپورتتىڭ 12 ءتۇرىن قامتىپ, 13 اۋداننان ءبىر مىڭعا تارتا سپورتشى ءوزارا كۇش سىناستى. دودا اسا تارتىستى ءوتىپ, اقتىق سىنعا دەيىن كىمنىڭ جەڭىمپاز اتانارى بەلگىسىز بولىپ كەلدى. ماسەلەن, جۇماباەۆتىقتار دويبىدان ەشكىمگە دەس بەرمەسە, تيميريازەۆتىكتەر بەلتەمىر كوتەرۋدەن الدارىنا جان سالمادى. تايىنشا اۋدانىنىڭ قۇراماسى پنەۆماتيكالىق مىلتىقتان اتۋدان قۇرالايدى كوزگە اتقان سۇرمەرگەندەر بولىپ شىقتى.
دەسەك تە, جالپىكوماندالىق ەسەپتە الاڭ يەلەرى – ەسىل اۋدانىنىڭ سپورتشىلارى ەڭ كوپ ۇپاي جيناپ, جەڭىستىڭ ەڭ بيىك تۇعىرىنا كوتەرىلدى. ولارعا وبلىس اكىمىنىڭ جۇلدەسى – “ۋاز” جەڭىل كولىگى تابىس ەتىلدى. ەكىنشى, ءۇشىنشى ورىنداردى يەلەنگەن قىزىلجار جانە تايىنشا اۋداندارىنا سپورتتىق ۆەلوسيپەدتەر مەن جاتتىعۋ ترەناجەرلەرى تارتۋ ەتىلدى.
ءومىر ەسقالي.
سولتۇستىك قازاقستان وبلىسى, ەسىل اۋدانى.