قوستاناي. 28 تامىز. قوستانايدا شەكارالىق وبلىستار جاستارىنىڭ «دوستىقتا جوق شەكارا» اتتى فورۋمى ءوتتى. وعان اقتوبە جانە رەسەيدىڭ چەليابى وبلىسىنىڭ جاستارى قاتىستى. بۇل تۋرالى egemen.kz ءتىلشىسى حابارلادى.
فورۋمدى قازاقستان حالقى وبلىستىق اسسامبلەياسى مەن قوستاناي وبلىسىنىڭ «گرين» ازاماتتىق اليانسى ۇيىمداستىردى. قوستانايدا العاش ءوتىپ وتىرعان فورۋم قوستاناي, اقتوبە جانە چەليابى وبلىستارى جاستارىنىڭ بىرلەسكەن جۇمىسى ءۇشىن پىكىرلەسۋ الاڭىنا اينالدى, جاس ليدەرلەر مەن ءتۇرلى ايماقتاعى بەلسەندى جاستارىنا دوستىق كوپىرىندەي بولدى. فورۋمعا قاتىسقان ەلۋ جاس ءۇش كۇن بويى «اق ءۇي» دەمالىس بازاسىندا ناتيجەلى جۇمىس ىستەدى. ولار ءۇشىن ءتۇرلى ترەنينگتەر, پىكىرتالاستار وتكىزىلدى. سونىمەن قاتار جاستار كوڭىل كوتەرۋ باعدارلاماسى دا ۇمىتىلعان جوق.
قازاقستان حالقى وببلىستىق اسسامبلەياسىنىڭ سەكرەتاريات مەڭگەرۋشىسى گۇلۆيرا قۇدايقۇلوۆا: «فورۋمنىڭ اتى ايتىپ تۇرعانداي, دوستىق ءۇشىن شەكارا بولماۋى ءبىزدىڭ باسقوسۋىمىزدىڭ ماقساتى بولۋى ءتيىس. كورشى وبلىستار جاستارى ۇنەمى ارالاسىپ, جاس ۇرپاقتى پاتريوتيزمگە, ادامگەرشىلىككە, رۋحاني جانە مادەني قۇندىلىقتارعا تاربيەلەۋگە باعىتتالعان يدەيالارىمىزبەن ءبولىسۋىمىز كەرەك» دەدى. چەليابى وبلىستىق دوستىق ءۇيىنىڭ ديرەكتورى يۋليا لاپيدۋس «دوستىقتا جوق شەكارا» فورۋمى جىل سايىن ءوتىپ تۇرسىن دەگەن ۇسىنىسىن ايتتى.
فورۋم قارارىندا دا كورشى وبلىستار جاستارىنىڭ بۇل شاراسى جىل سايىن وتەتىنى جانە ونىڭ گەوگرافياسى دا كەڭەيە تۇسەتىنى ايتىلدى.
ءنازيرا جارىمبەتوۆا.
دەرەك, سۋرەت: egemen.kz