ماسكەۋدە قازاقستان رەسپۋبليكاسى عارىشكەرىنىڭ حالىقارالىق عارىش ستانساسىنىڭ رەسەيلىك سەگمەنتىنە ۇشۋىن جۇزەگە اسىرۋ جونىندە كەلىسىمشارتقا قول قويىلدى.
كەشە ماسكەۋ توڭىرەگىندە وتكەن «ماكس-2015» حالىقارالىق اۆياعارىش سالونىنىڭ شەڭبەرىندە قازاقستان رەسپۋبليكاسىنىڭ عارىشكەرى ايدىن ايىمبەتوۆتىڭ حالىقارالىق عارىش ستانساسىنىڭ (حعس) رەسەيلىك سەگمەنتىنە ۇشۋىن جۇزەگە اسىرۋ جونىندەگى كەلىسىمشارتقا قول قويۋ ءراسىمى بولىپ ءوتتى.
بۇل قۇجاتقا قازاقستان تاراپىنان قازعارىش توراعاسى ت.مۇساباەۆ پەن رەسەي تاراپىنان رەسەي فەدەراتسياسىنىڭ فەدەرالدىق عارىش اگەنتتىگى باسشىسىنىڭ ۋاقىتشا مىندەتىن اتقارۋشى ا.يۆانوۆ قول قويدى.
كەلىسىمشارتتىڭ ءمانى قازاقستاندىق عارىشكەر ا. ايىمبەتوۆتىڭ عارىشقا ۇشۋ دايىندىعى مەن ونى جۇزەگە اسىرۋ جانە عارىشكەردى ۇشىپ كەلگەن سوڭ وڭالتۋ جونىندەگى قىزمەتتەردى كورسەتۋ مەن جۇمىستاردى ورىنداۋعا بايلانىستى ەكەندىگىن اتاپ وتكەن ءجون.
قول قويىلعان قۇجاتتىڭ تارماقتارىنا سايكەس, جوسپارلانىپ وتىرعان ۇشىرىلىم ۇزاقتىعى ۇشقىش باسقاراتىن عارىش كەمەسىنىڭ حعس-پەن تۇيىسۋىنە دەيىنگى 2 تاۋلىك پەن بۇرىن بەكىتىلگەن ۇشۋ باعدارلاماسىنا سايكەس, حالىقارالىق عارىش ستانساسى رەسەيلىك سەگمەنتىنىڭ بورتىندا 8 تاۋلىك بولۋىن قوسا العاندا, ون كۇندى قۇراپ وتىر. كەلىسىمشارت قۇنى ءبىر ميلليارد ءجۇز ميلليون ءرۋبلدى قۇرايدى جانە ول وزگەرمەيتىن قۇنعا يە.
«بۇل وتە ماڭىزدى قۇجات, وندا عارىشتىق ۇشىرىلىمنىڭ بارلىق قىر-سىرى قاراستىرىلعان. نەگىزگى بولىمنەن باسقا, ونىڭ تاعى 11 قوسىمشاسى بار. مەن قازاقستاندىق جانە رەسەيلىك ماماندارعا ريزامىن. ولار قىسقا مەرزىمدە, ياعني 2 جارىم ايدىڭ ىشىندە كەلىسىمشارتتى دايىنداپ شىقتى. شىن مانىندە, وسى باعىتتا وراسان زور جۇمىستار جۇرگىزىلدى», – دەپ اتاپ ءوتتى تالعات مۇساباەۆ.
كەلىسىمشارت وعان قول قويىلعان كۇنىنەن, ياعني 2015 جىلدىڭ 26 تامىزىنان باستاپ كۇشىنە ەندى, دەپ حابارلادى قازعارىشتىڭ ءباسپاسوز قىزمەتى.