اقتوبە قالاسىندا وتكەن باس جۇلدەسى 1 ميلليون تەڭگەنى قۇرايتىن بۇل بايقاۋعا جۋىردا شاڭىراق كوتەرگەلى وتىرعان بەس جۇپ قاتىستى. قالالىق اكىمدىكتىڭ قولداۋىمەن ۇيىمداستىرىلعان ەرەكشە بايقاۋ قازاقستان رەسپۋبليكاسى كونستيتۋتسياسىنىڭ 20 جىلدىعىنا ورايلاستىرىلىپ وتكىزىلدى.
بايقاۋدىڭ ماقساتى جاستاردى وتانسۇيگىشتىككە, وتباسىلىق ىنتىماققا, بىرلىككە تاربيەلەۋ بولىپ تابىلادى. شارانى ۇيىمداستىرۋشىلاردىڭ ءبىرى, «شاڭىراق تسەنتر» توي ۇيىمداستىرۋ ورتالىعىنىڭ باس ديرەكتورى ايگەرىم گالكيەۆا بۇل باستامانىڭ اقتوبەلىك قىز-جىگىتتەردىڭ قوعامدىق ءىس-شارالارعا بەلسەندىرەك قاتىسۋىنا ىقپال ەتەتىنىن ايتادى. بايقاۋعا وتباسىلىق ومىرگە قادام باسىپ وتىرعان جۇپتار ەرلان قالدىبەكوۆ پەن البينا يبرايمحانوۆا, ابىلاي ناۋرىزباەۆ پەن ايگەرىم ۇلماعانبەتوۆا, ماحاببات اميرين مەن گۇلنۇر جۇماعاليەۆا, قۋاندىق تورەبەكوۆ پەن الينا عابدۋاليەۆا, تالعات سالەنوۆ پەن احمان بيسەنباەۆا قاتىستى. سايىس ەكى جاستىڭ قالاي تانىسقانى تۋرالى باياندايتىن «Love story» بەينەباياندى تاماشالاۋدان باستالدى. بايقاۋ شارتتارى بويىنشا قالىڭدىقتار مەن كۇيەۋ جىگىتتەر تاماق دايىنداۋدان شەبەرلىكتەرىن كورسەتتى. سايىستىڭ «ماعان تۇرمىسقا شىقشى؟» دەپ اتالاتىن اقىرعى شارتىندا جىگىتتەر قىزدارعا جۇرەكجاردى ۇسىنىستارىن جاساپ, جۇزىكتەرىن ۇسىندى. قالا اكىمىنىڭ ورىنباسارى ايگۇل ارىنعازيەۆا باستاعان قازىلار القاسى باستى سىيلىقتىڭ يەلەرىن انىقتاپ, قالعاندارىن دا باعالى سىيلىقتارمەن ماراپاتتادى.
بايقاۋدىڭ 1 ميلليون تەڭگەلىك باس جۇلدەسىن تالعات پەن احمان يەلەندى. تۇركياعا ەكى كىسىلىك تەگىن جولداما ماحاببات پەن گۇلنۇرعا بۇيىردى. ال «Shanti Spa» ساۋىقتىرۋ ورتالىعىنا بارۋعا مۇمكىندىك بەرەتىن 55 مىڭ تەڭگەلىك سەرتيفيكاتتى قۋاندىق پەن الينا يەلەنسە, «اسسورتي» مەيرامحاناسىندا كەشكى اس ىشۋگە مۇمكىندىك بەرەتىن 30 مىڭ تەڭگەنىڭ سەرتيفيكاتىن ەرلان مەن البينا الدى. ابىلاي مەن ايگەرىمگە «Love story» بەينەبايانىن تەگىن ءتۇسىرۋ سەرتيفيكاتى تابىس ەتىلىپ, سۋرەتتەرى «ۆاشا سۆادبا» جۋرنالىندا جاريالاناتىن بولدى. مەرەكەلىك كەشتى قورىتىندىلاعان قالا اكىمىنىڭ ورىنباسارى ايگۇل ارىنعازيەۆا قازاقستان بويىنشا مۇنداي كۇيەۋ جىگىتتەر مەن قالىڭدىقتاردىڭ جارىسى ءالى وتپەگەندىگىن, بۇل بايقاۋدىڭ بولاشاقتا ءداستۇرلى تۇردە وتكىزىلەتىن جەتكىزدى. بايقاۋعا «سۆەتلانا» تۋريستىك فيرماسى, جاستارعا ارنالعان اقپاراتتى-جارنامالىق «ۆاشا سۆادبا» جۋرنالى, «مەگا اقتوبە» ساۋدا ويىن-ساۋىق ورتالىعى دەمەۋشىلىك قولداۋ كورسەتتى.
ساتىبالدى ءساۋىرباي,
«ەگەمەن قازاقستان».
اقتوبە.