استانا. 27 تامىز. بۇگىن الماتىدا جەرگىلىكتى «قايرات» كومانداسى ەۋروپا ليگاسى پلەي-وفف كەزەڭىنىڭ قارىمتا ماتچىن فرانتسۋزدىڭ «بوردوسىمەن» وتكىزىپ, 2:1 ەسەبىمەن جەڭىسكە جەتتى. بىراق بۇل ەسەپ ونى توپتىق كەزەڭگە شىعارا المادى. بۇل تۋرالى ras.kz حابارلادى.
ەكى كوماندانىڭ بۇدان ءبىر اپتا بۇرىن بوردودا كەزدەسكەندە, ماتچ 1:0 ەسەبىمەن الاڭ يەلەرىنىڭ پايداسىنا شەشىلگەن ەدى. قوناقتاردىڭ بۇل جولى سىرت الاڭدا سوققان ءبىر دوبى ولاردى كەلەسى كەزەڭگە الىپ شىقتى.
«قايرات» (الماتى, قازاقستان) – «بوردو» (بوردو, فرانتسيا) 2:1 (1:0)
27 تامىز. الماتى. ورتالىق ستاديون. 26 242 كورەرمەن.
تورەشىلەر: باس نەيسحەيس, روب ۆان دە ۆان, حارلەس سحاپ ء(بارى – نيدەرلاند).
«قايرات»: ۆلاديمير پلوتنيكوۆ, برۋنو سوارەس, جاركو ماركوۆيچ, ەرمەك قۋانتاەۆ (جامبىل كوكەەۆ, 87), يسلامبەك قۋات, ميحايل باكاەۆ, باۋىرجان يسلامحان (دجوردجە دەسپوتوۆيچ, 82), يساەل, اناتولي تيموششۋك, جەرار گوۋ, سيتو ريەرا.
«بوردو»: جەروم پريور, نيكوليا پاللۋا, سەدريك يامبەرە, ماكسيم پۋندج, فرەدەريك گيلبەرت, ابدۋ تراورە (داۆيد سيمباسسا, 69), اندرە بيوگو پوكو, ۆاحبي حازري, ديەگو رولان (ەنتسو كريۆەللي, 69), انري سەۆە, يسااك تەلين.
گولدار: سەدريك يامبەرە 1 (اۆتوگول), يسلامبەك قۋات 66, ەنتسو كريۆەللي 77
ەسكەرتۋلەر: اناتولي تيموششۋك 38 – ابدۋ تراورە 21, ۆاحبي حازري 39, سادريك يامبەرە 64, ەنتسو كريۆەللي 85
ءبىرىنشى ويىن – 0:1.
الماتىلىقتار ويىن باستالار-باستالماستان وزىندىك ءبىر رەكورد جاسادى. ولار ماتچتىڭ 44-سەكۋندىندا ەسەپ اشتى. دالىرەگى, قاقپا الاڭىنداعى جەرار گوۋدان ساقتانعان قورعاۋشى سەدريك يامبەرە دوپتى الاڭ سىرتىنا جىبەرمەكشى بولىپ تەپكەن كەزىندە, ونى توردان ءبىر-اق شىعارىپ الدى. ال دوپتى مۇندا سول قاپتالدان سيتو ريەرا تاستاعان ەدى.
الاڭ يەلەرى بۇدان كەيىن دە بىرنەشە قاۋىپتى جورىقتار ۇيىمداستىردى. بىراق ولاردان ناتيجە شىعارۋدىڭ ىڭعايى كەلمەدى. مۇنىڭ ورنىنا بىرتە-بىرتە «بوردو» ويىن تىزگىنىن ءوز قولىنا ۇستاي باستادى. وسى دۇمپۋمەن فرانتسۋزدار بىرنەشە رەت شابۋىل دا ۇيىمداستىرىپ كوردى. بۇل ارالىقتا قايراتتىقتار دا قاراپ قالمادى.
ماتچتىڭ ەكىنشى بولىگى مەيمانداردىڭ شابۋىلىمەن باستالدى. ولاردىڭ ارەكەتتەرى بارعان سايىن قاۋىپتى بولا ءتۇستى. بىراق گولدى تاعى دا الماتىلىقتار سالىپ كەتتى. ونى يساەلدىڭ بەرگەن ايىپ دوبىنا جۇرتتىڭ بارىنەن بۇرىن اياعىن توسەپ ۇلگەرگەن يسلامبەك قۋات سالدى. وسىلايشا 2:0 ەسەبىمەن العا شىققان «قايرات» ءۇمىتتىڭ وتىن بۇرىنعىدان بەتەر ۇرلەي ءتۇستى. الايدا, ارادا 11 مينۋت وتكەننەن كەيىن قوناقتار بۇل ءۇمىتتىڭ تالقانىن شىعاردى. قاقپا الدىنداعى قاربالاس ساتىندە وكشەسىمەن دوپتى سىرعىتا سالعان ەنتسو كريۆەللي ونى قاقپا تورىنان ءبىر-اق شىعاردى. بۇدان كەيىن الماتىلىقتاردىڭ جاعدايدى تۇزەۋ ءۇشىن جاساعان ارەكەتتەرى جۇزەگە اسپادى.
وسىلايشا ەكى ويىننىڭ قورىتىندىسىمەن فرانتسۋز كلۋبى كەلەسى كەزەڭگە جولداما الدى.
تالعات رايىمبەك.
https://youtu.be/Q9qlpMFz6Sc