استانا. 27 تامىز. ەلورداداعى تاۋەلسىزدىك سارايىندا تمد-عا قاتىسۋشى مەملەكەتتەر باس پروكۋرورلارىنىڭ ۇيلەستىرۋ كەڭەسىنىڭ 25-ءشى وتىرىسى بولىپ ءوتتى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى.
فورۋم جۇمىسىنا ەلىمىزدىڭ باس پروكۋرورى اسحات داۋىلباەۆ, ارمەنيا رەسپۋبليكاسىنىڭ باس پروكۋرورى گەۆورگ كوستانيان, بەلارۋس رەسپۋبليكاسىنىڭ باس پروكۋرورى الەكساندر كونيۋك, قىرعىز رەسپۋبليكاسىنىڭ باس پروكۋرورى ينديرا دجولدۋباەۆا, رەسەي فەدەراتسياسىنىڭ باس پروكۋرورى يۋري چايكا, تاجىكستان رەسپۋبليكاسىنىڭ باس پروكۋرورى يۋسۋف راحمون, ازەربايجان رەسپۋبليكاسى باس پروكۋرورىنىڭ ورىنباسارى رۋستام ۋسۋبوۆ, مولدوۆا رەسپۋبليكاسى باس پروكۋرورىنىڭ ورىنباسارى يۋري گارابانىڭ باسشىلىعىمەن تمد باس پروكۋراتۋرالارىنىڭ دەلەگاتسيالارى, سونداي-اق تمد اتقارۋشى كوميتەتىنىڭ توراعاسى سەرگەي لەبەدەۆ جانە تمد بپۇك اتقارۋشى حاتشىسى لەونيد ەرمولاەۆ قاتىستى.
فورۋم دەلەگاتتارىنىڭ الدىندا ءسوز سويلەگەن قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى نۇرلان ەرمەكباەۆ تمد اياسىندا ءوزارا ىنتىماقتاستىقتىڭ باسىم باعىتتارىن ودان ءارى دامىتۋ قاجەتتىلىگىنە باسا نازار اۋداردى.
تمد-عا قاتىسۋشى مەملەكەتتەر باس پروكۋرورلارىنىڭ ۇيلەستىرۋ كەڭەسىنىڭ توراعاسى, رەسەي فەدەراتسياسىنىڭ باس پروكۋرورى يۋري چايكا ءوز سوزىندە ايماقتاعى قاۋىپسىزدىكتىڭ جاڭا قاۋىپ-قاتەرلەرىنىڭ پايدا بولۋى اياسىندا قاراستىرىلاتىن ماسەلەلەردىڭ ماڭىزدىلىعى مەن وزەكتىلىگىن اتاپ ءوتتى.
وتىرىسقا توراعالىق ەتكەن قازاقستان رەسپۋبليكاسىنىڭ باس پروكۋرورى بۇگىندە بپۇك-ءنىڭ مەملەكەتارالىق قىزمەتتە ماڭىزدى ورىن الاتىنىن, ونىڭ تىكەلەي قاتىسۋىمەن ىنتىماقتاستىق ماسەلەلەرى بويىنشا قاجەتتى كەلىسىم-شارتتىق بازا جاسالعانىن, ۇلتتىق زاڭداردى جاقىنداتۋ بويىنشا, سونىڭ ىشىندە ەۋرازيالىق وداق اياسىندا ۇسىنىستار ازىرلەنىپ جاتقاندىعىن اتاپ ايتتى. كەڭەستىڭ الەۋەتىن ودان ءارى كۇشەيتۋ دوستاستىقتىڭ پروكۋراتۋرا ورگاندارىنا قۇقىق ءتارتىبىن قامتاماسىز ەتۋ بويىنشا ورتاق ماقسات-مىندەتتەرگە جەتۋ جونىندەگى بىرلەسكەن جۇمىستى ورىنداۋعا مۇمكىندىك بەرەدى.
وسى تۇرعىدا قاتىسۋشىلار باس پروكۋراتۋرالاردىڭ اقپاراتتىق تەحنولوگيالاردى ەنگىزۋ, قىلمىسپەن, سىبايلاس جەمقورلىقپەن, ەسىرتكى, پسيحوتروپتىق زاتتاردىڭ جانە ولاردىڭ پرەكۋرسورلارىنىڭ زاڭسىز اينالىمىمەن كۇرەسۋ, ەكسترەميزم جانە تەرروريزمگە قارسى ارەكەت ەتۋ, ناشاقورلىق, ازاماتتاردى ەكسترەميستىك ۇيىمدارعا تارتۋ, ادامداردى ساتۋ جانە زاڭسىز كوشى-قون بويىنشا جۇمىس تاجىريبەسىن تالقىلادى جانە تالدادى.
دەلەگاتتار اتاپ وتكەندەي, ازاماتتاردىڭ قۇقىقتارى مەن بوستاندىقتارىن قورعاۋ بويىنشا قازىرگى زامانعى ستراتەگيالىق مىندەتتەر كونتەكستىندە مەملەكەتتەردىڭ قۇقىق قورعاۋ ورگاندارىنىڭ ترانسۇلتتىق قىلمىسپەن كۇرەستەگى ۇيلەسىمدى ءوزارا ارەكەت ەتۋ قاجەتتىلىگى تۋرالى ماسەلەنىڭ وزەكتىلىگى ودان ءارى ارتا تۇسەدى.
ۇيلەستىرۋ كەڭەسىنىڭ تۋى جانە ەلتاڭباسى تۋرالى ەرەجەلەر, سونداي-اق بپۇك-ءتىڭ سالىقتىق (قارجىلىق) تەرگەۋ ورگاندارى باسشىلارىنىڭ ۇيلەستىرۋ كەڭەسىمەن جانە تمد ەلدەرىنىڭ قارجىلىق بارلاۋ بولىمشەلەرى باسشىلارىنىڭ كەڭەسىمەن ءوزارا ارەكەتتى رەگلامەنتتەيتىن قۇجاتتار ماقۇلداندى.
وتىرىس بارىسىندا فورۋم دەلەگاتتارى رەسەي فەدەراتسياسىنىڭ باس پروكۋرورى يۋري چايكانى ءبىر اۋىزدان تمد-عا قاتىسۋشى مەملەكەتتەر باس پروكۋرورلارىنىڭ ۇيلەستىرۋ كەڭەسىنىڭ توراعاسى ەتىپ قايتا سايلادى. سونداي-اق تمد بپۇك-ءنىڭ كەزەكتى 26-شى وتىرىسى 2016 جىلى بەلارۋس رەسپۋبليكاسىندا وتكىزىلەتىنى جونىندە شەشىم قابىلداندى.
تالقىلاۋ ناتيجەلەرى بويىنشا تمد-عا قاتىسۋشى مەملەكەتتەر باس پروكۋراتۋرالارىنىڭ باسشىلارى الداعى كەزەڭدە حالىقارالىق ىنتىماقتاستىق سالاسىندا, پروكۋرورلىق قاداعالاۋدىڭ نەگىزگى باعىتتارى جونىندەگى وڭ تاجىريبەمەن الماسۋدى جالعاستىرۋ جانە ولاردى پراكتيكالىق قىزمەتتە پايدالانۋ بويىنشا باسىم مىندەتتەردى انىقتايتىن كۇن ءتارتىبىنىڭ بارلىق ماسەلەلەرى بويىنشا شەشىمدەر قابىلدادى.
قورىتىندى شەشىمدەرگە قول قويىلعان سوڭ تاۋەلسىز مەملەكەتتەر دوستاستىعىنا قاتىسۋشى مەملەكەتتەر باس پروكۋرورلارىنىڭ ۇيلەستىرۋ كەڭەسى قۇرىلۋىنىڭ 20-جىلدىعى قۇرمەتىنە تمد باس پروكۋراتۋرالارى مەن ورگاندارىنىڭ وكىلدەرىن مەرەيتويلىق مەدالدارمەن سالتاناتتى تۇردە ماراپاتتاۋدىڭ رەسمي ءراسىمى ءوتتى.
زاڭدىلىقتى, ادامنىڭ جانە ازاماتتىڭ قۇقىقتارى مەن بوستاندىقتارىن قامتاماسىز ەتۋ, قىلمىسپەن كۇرەسۋ سالاسىندا تمد-عا قاتىسۋشى مەملەكەتتەردىڭ باس پروكۋراتۋرالارىنىڭ ىنتىماقتاستىعىن جانە ءوزارا ارەكەت ەتۋىن ۇيىمداستىراتىن, دوستاستىقتىڭ مەملەكەتارالىق ورگانى بولىپ تابىلاتىن تاۋەلسىز مەملەكەتتەر دوستاستىعىنا قاتىسۋشى مەملەكەتتەر باس پروكۋرورلارىنىڭ ۇيلەستىرۋ كەڭەسى 1995 جىلعى 7 جەلتوقساندا قۇرىلعان. 2000 جىلعى 25 قاڭتارداعى دوستاستىققا قاتىسۋشى-مەملەكەتتەردىڭ باسشىلارى كەڭەسىنىڭ شەشىمىمەن وعان تمد-نىڭ مەملەكەتارالىق ورگانى مارتەبەسى بەرىلگەن. وسى قۇجاتقا ازەربايجان رەسپۋبليكاسى, ارمەنيا رەسپۋبليكاسى, بەلارۋس رەسپۋبليكاسى, گرۋزيا, قازاقستان رەسپۋبليكاسى, قىرعىز رەسپۋبليكاسى, مولدوۆا رەسپۋبليكاسى, رەسەي فەدەراتسياسى, تاجىكستان رەسپۋبليكاسى جانە ۋكراينا قول قويعان.
ايدار ورىسباەۆ.
دەرەك, سۋرەت: باس پروكۋراتۋرانىڭ ءباسپاسوز قىزمەتى