كەشە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ حالىقارالىق گۋمانيتارلىق كومەك ماسەلەلەرى جونىندەگى كوميسسيانىڭ وتىرىسىن وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى.
تاجىكستانداعى سەل مەن سۋ تاسقىنىنان زارداپ شەككەن حالىقتىڭ باسىنداعى احۋالدى نازارعا الا وتىرىپ, كوميسسيا قازاقستان ۇكىمەتىنە ول ەلگە رەسمي تۇردە گۋمانيتارلىق كومەك كورسەتۋ جونىندە كەڭەس بەردى. تاجىكستاننىڭ زارداپ شەككەن اۋداندارىنا ەت جانە ءسۇت كونسەرۆىلەرى, وسىمدىك جانە سارى ماي, قانت, كۇرىش, مەتالل پروكاتى مەن شيفەر جەتكىزىلەتىن بولادى.
اۋا تەمپەراتۋراسىنىڭ كۇرت كوتەرىلۋىنە بايلانىستى ءتاجىكستاننىڭ كوپتەگەن تاۋلى ءوڭىرلەرىندە مۇزداقتاردىڭ ەرۋى كۇشەيىپ, نوسەر جاۋىندار سوڭى سەل مەن سۋ تاسقىنىنا اپارىپ سوقتىردى. پياندج, ۆاحش, زەراۆشان, كافيرنيگان, يسفارا جانە يسفانا وزەندەرى باسسەيندەرىنىڭ بويىندا وسىنداي كۇردەلى جاعداي قالىپتاسىپ وتىر.