«مەكتەپكە جول» اكتسياسى: ءۇمىتىڭدى ۇزبە, بالاقاي!

شىمكەنتتەگى ساڭىراۋ بالالارعا ارنالعان №1 مەكتەپ-ينتەرناتتا ەكى ءجۇزدىڭ ۇستىندە وقۋشىلار ءبىلىم الادى. سىرتقى دۇنيەنىڭ ىڭ-شىڭىنان حابارى جوق, ادامداردىڭ قاباعىنا جاۋتاڭداپ قالعان بالالار قامقورلىققا ءزارۋ. وبلىستىق جانە شىمكەنت قالالىق ءماسلي­حاتىنىڭ دەپۋتاتتارى جاقىندا تاعى ءبىر ساۋاپ­تى ءىستى قولعا الدى. ولاردىڭ ءبىر توبى №1 مەكت­ەپ-ينتەرناتقا قاجەتتى ءبىرتالاي دۇنيەنى ءبىلىم ورداسىنىڭ باسشىلىعىنا تابىس ەتتى. قىتايدىڭ جايمابازاردى بەرمەيتىن ارزانقول دۇنيەسى ەمەس, ساپاسى مىقتى تاۋارلار ەندى قامكوڭىل بالالارعا قۋانىش سىيلاپ, قىزمەت ەتەتىن بولادى. وبلىستىق ءماسليحاتتىڭ دەپۋتاتى, شىمكەنت قالالىق «نۇر وتان» پارتياسى فيليالى توراعاسىنىڭ ءبىرىنشى ورىنباسارى ومىرزاق مەلدەحانوۆ بۇل ءوزىن سىيلاعان ءاربىر ازاماتتىڭ بورىشى ەكەندىگىن ايتادى. بيۋدجەت قارجىسىنا قاراپ وتىرا بەرۋگە بولمايدى. ونىڭ باسقا دا بالالار كەرەگىنە جۇمسالاتىن تەتىگى كوپ. دەپۋتاتتار ءبىلىم وشاقتارىنا حابار شالىپ, قاجەتتى تىزىمدەردى الىپ, قولدارىنان كەلمەي جات­قان ماسەلەلەردى بىرلەسىپ شەشىپ جاتىر. يگىلىكتى ىستەر ادام جانىن ىزگىلىككە باۋليدى. ەل قالاۋلىلارى وسىلاي ونەگە كورسەتۋدە. باقتيار تايجان, «ەگەمەن قازاقستان». شىمكەنت.