استاناداعى ورتالىق كوممۋنيكاتسيالار قىزمەتىندە «ءبىلىم جانە عىلىم جۇيەسىنىڭ دامۋى تۋرالى» تاقىرىپ اياسىندا ءبىلىم جانە عىلىم مينيسترلىگى وكىلدەرىنىڭ قاتىسۋىمەن بريفينگ ءوتتى.
باسقوسۋدا ءبىلىم جانە عىلىم ءمينيسترى اسلان ءسارىنجىپوۆ بيىلعى وقۋ جىلىنداعى جەتىستىكتەرگە توقتالا كەلىپ, «1 قىركۇيەكتە 7,5 مىڭنان استام مەكتەپ 2 ملن. 600 مىڭنان استام وقۋشىنى قابىلدايدى, ولاردىڭ ىشىندە 336 مىڭى مەكتەپ تابالدىرىعىن العاش اتتايتىن 1-سىنىپتىڭ بالالارى. ياعني, جىل سايىن ءبىرىنشى سىنىپقا باراتىن بالالار سانى ارتىپ كەلە جاتقاندىقتان ءبىز ءۇش اۋىسىمداعى جانە اپاتتى مەكتەپتەر پروبلەماسىن شەشۋىمىز كەرەك. وسىعان وراي, بيىل 157 مەكتەپ پايدالانۋعا بەرىلىپ, وسى ارقىلى ءۇش اۋىسىمداعى مەكتەپتەردىڭ 80-ءى قالىپ تۇر. ال بۇعان دەيىن ولاردىڭ سانى 100-گە جۋىق بولعان ەدى. سونىمەن قاتار, اپاتتى مەكتەپتەر سانى ەكى ەسەگە ازايىپ, 136-دان 66 قالادى. 2017 جىلدىڭ سوڭىنا قاراي وسى پروبلەمانى تولىقتاي شەشەمىز دەپ جوسپارلاپ وتىرمىز», دەدى. مۇنىمەن قوسا, ۆەدومستۆو باسشىسى 8700 مەكتەپكە دەيىنگى ۇيىمعا 760 مىڭ بالا باراتىنىن, جىل سوڭىنا دەيىن 10 مىڭ ورىندىق 40 بالاباقشا ىسكە قوسىلاتىنىن, كۇردەلى جوندەۋ شارالارىمەن 250 مەكتەپ قامتىلعانىن, ال اعىمداعى جوندەۋ جۇمىستارى 5 مىڭنان استام مەكتەپتە جۇرگىزىلگەنىن جەتكىزدى. ال 4,5,6 جانە 11 سىنىپتارعا وقۋلىقتار الۋعا بيىل 12,5 ملرد. تەڭگە ءبولىنىپ, بۇگىندە بارلىق وڭىرلەر وقۋلىقتارمەن تولىقتاي قامتاماسىز ەتىلگەن ەكەن.
«بۇگىندە ءبىزدىڭ باستى ماقساتىمىز ءبىلىم بەرۋدىڭ مازمۇنىن جەتىلدىرۋ بولىپ تابىلادى, ال باعالاۋ جۇيەسى مازمۇنمەن تىكەلەي بايلانىستى. ياعني, ەگەر دە ءبىز ءبىلىمدى دامىتۋعا عانا ەمەس, سونىمەن قاتار, داعدى مەن بىلىكتىلىكتى دامىتۋعا ەكپىن قوياتىندىعىمىزدى ايتاتىن بولساق, وندا سايكەسىنشە وسى داعدىنى باعالاي الاتىن جۇيە قاجەت بولادى. بيىل ءبىز ۇبت-نى اكىمشىلەندىرۋ ماسەلەلەرىن جاڭعىرتۋ بويىنشا جۇمىستى جالعاستىرامىز. باعالاۋدىڭ جاڭا جۇيەسىنە توقتالاتىن بولساق, وسى باعىتتا ءتۇرلى نۇسقالاردى قاراستىرامىز. ونىڭ ىشىندە ۇبت-نى ونلاين تۇردە تاپسىرۋ دا بار», دەدى ۆەدومستۆو باسشىسى.
ۇلت جوسپارىنداعى 76-شى قادام اياسىندا ماتەريالدىق-تەحنيكالىق بازانى جاڭارتۋعا جانە مۇعالىمدەردى ىنتالاندىرۋعا باسا نازار اۋدارىلىپ, 96 مەكتەپكە گرانتتاردى تاعايىنداۋ جۇيەسىن جەتىلدىرۋ قاراستىرىلعان. الداعى جىلدارى جەتەكشى 10 جوو جانە 10 كوللەدج ءۇشىن 48 جاڭا ءبىلىم بەرۋ باعدارلامالارى جاساقتالماق. سونداي-اق, جوعارى وقۋ ورىندارىنىڭ 24 زەرتحاناسى مەن كوللەدجدەردىڭ 57 زەرتحاناسى جاڭا قۇرىلعىلارمەن جابدىقتالادى. كوللەدجدەردەگى شەبەرحانالاردى جابدىقتاۋعا رەسپۋبليكالىق بيۋدجەتتەن بولىنگەن قاراجات 2 ەسەگە كوبەيتىلگەن. 2015 جىلى 15 وقۋ ورنىنا بۇكىلالەمدىك بانكتىڭ نەسيەسى ەسەبىنەن 40 ملن. تەڭگەدەن قوسىمشا قولداۋ كورسەتىلدى. بۇل 458 شەبەرحانا مەن زەرتحانالاردى زاماناۋي قۇرىلعىمەن جابدىقتاۋعا مۇمكىندىك بەرەدى.
بيىلعى جىلى 32168 گرانت بولىنسە, كونكۋرسقا 67377 ادام قاتىستى. «ماڭگىلىك ەل جاستارى – يندۋسترياعا!» جوباسى اياسىنداعى كۆوتا بويىنشا وقۋ كونكۋرسىنا 6457 ادام قاتىستى. ناتيجەسىندە 29657 تالاپكەر گرانتقا يە بولدى. ولاردىڭ ىشىندە 2077-ءسى «التىن بەلگى» يەگەرلەرى, 1126-سى نازارباەۆ زياتكەرلىك مەكتەبىنىڭ تۇلەكتەرى, 155-ءى جالپى ءبىلىم بەرۋ پاندەرى بويىنشا حالىقارالىق جانە رەسپۋبليكالىق وليمپيادالاردىڭ جەڭىمپازدارى, 825-ءى ءبىلىم بەرۋ پاندەرى بويىنشا حالىقارالىق جانە رەسپۋبليكالىق عىلىمي جارىستاردىڭ جەڭىمپازدارى, 521-ءى حالىقارالىق جانە رەسپۋبليكالىق سپورتتىق جارىستاردىڭ جەڭىمپازدارى. كوميسسيانىڭ شەشىمىمەن كونكۋرسقا قاتىسقان بارلىق 483 جەتىم بالا مەن 273 مۇگەدەك بالا گرانتقا يە بولدى.
باسقوسۋ بارىسىندا مينيستر مەن ونىڭ ارىپتەستەرى جوو-عا ءبىلىم گرانتتارىن تاعايىنداۋعا, وقۋلىقتاردىڭ ساپاسىن باقىلاۋعا جانە ونىمەن مەكتەپتەردى قامتاماسىز ەتۋگە قاتىستى قويىلعان سۇراقتارعا جاۋاپ بەردى.
بەرىك سادىر,
«ەگەمەن قازاقستان».