تاياۋدا اممان قالاسىندا يوردانيا كورولى ابداللا II بەن ال-حۋسەين قازاقستان رەسپۋبليكاسى پرەمەر-ءمينيسترىنىڭ ارنايى وكىلى, ەلشى باعدات امىرەەۆتى قابىلدادى.
كەزدەسۋ بارىسىندا قازاقستاندىق ديپلومات ابداللا II-گە قازاقستان پرەزيدەنتى نۇرسۇلتان نازارباەۆتىڭ جولداۋىن تابىس ەتىپ, يورداندىق مونارحتى قازاقستاننىڭ حالىقارالىق ۇيىمدار شەڭبەرىندەگى قىزمەتىمەن جانە ەلىمىزدىڭ تاياۋ شىعىس مەملەكەتتەرىمەن قارىم-قاتىناستارىن دامىتۋىمەن تانىستىردى.
يوردانيا كورولى ءوز ەلىنىڭ قازاقستاننىڭ سىرتقى ساياسي قىزمەتىن, ەكى ەلدىڭ حالىقارالىق ۇيىمدار شەڭبەرىندەگى ىنتىماقتاستىعىن, سونداي-اق, استانانىڭ حالىقارالىق جانە ايماقتىق قاۋىپسىزدىكتى نىعايتۋعا بۇدان دا ۇلكەن ۇلەس قوساتىنىن قولدايتىنى تۋرالى ايتىپ جەتكىزدى.
ابداللا II يوردانيانىڭ ەكىجاقتى قارىم-قاتىناستاردى دامىتۋعا ۇلكەن ءمان بەرەتىنىن اتاپ ءوتىپ, ەلباسى ن.ءا. نازارباەۆقا جانە دوستاس قازاقستان حالقىنا ءوزىنىڭ يگى تىلەكتەرىن جەتكىزۋدى سۇرادى.
سۇحبات بارىسىندا, سونىمەن قاتار, حالىقارالىق كۇن ءتارتىبىنىڭ وزەكتى ماسەلەلەرى بويىنشا پىكىر الماسىلدى.
«ەگەمەن-اقپارات».