«ەگەمەننىڭ» وڭىردەگى ءتىلشى قوسىنىنا ماحامبەت اۋدانىنان شاعيا ەسماعامبەتوۆا دەيتىن تۇراقتى وقىرمانىمىز حابارلاستى. كەيىن دارىگەرلەرگە العىسىن ايتقان حاتى قولىمىزعا ءتيدى. دەنساۋلىقتىڭ قادىرىن ءبىر كىسىدەي بىلەتىن جان. ويتكەنى, ءوزى دە بۇرىن اۋداندىق اۋرۋحانادا 45 جىلدان اسا جۇمىس جاساپتى. بىلايشا ايتقاندا, سىرقات جاننىڭ شىبىن جانى ءۇشىن قانشالىقتى قينالاتىنىن جان-تانىمەن تۇسىنەدى. ەندى, ءوزى دە كەنەتتەن سىرقاتتانىپ, مۇمكىندىگى شەكتەۋلى جانعا, ياعني ءىى توپتاعى مۇگەدەككە اينالىپ شىعا كەلگەن. ارينە, دارىگەرلەردىڭ ءوز ىسىنە جاۋاپكەرشىلىكپەن قاراپ, جىلى سوزىمەن دە ەمدەگەنىنە ريزاشىلىعىن بىلدىرەدى.
– اۋرۋحاناعا تۇسكەن مەزگىلدە ەڭ ءبىرىنشى دارىگەرلىك كومەك كورسەتكەن اق حالاتتى ابزال جان نۇرساۋلە قانافينانىڭ ارقاسىندا بۇل ومىرگە قايتا كەلگەندەي بولدىم. سول سەكىلدى ەرسايىن ماەۆ, ەرمەك سابىروۆ, ءۇمىت كوشەنباەۆا, ەرجان لاقپاەۆتارعا دا العىسىم شەكسىز, – دەپ جازىپتى شاعيا ەسماعامبەتوۆا.
ونىڭ ايتۋىنشا, العاشىندا سىرقاتىنىڭ اۋىرلىعىنا بايلانىستى جان ساقتاۋ بولىمىندە ەمدەلۋىنە تۋرا كەلگەن. كەيىن وبلىستىق اۋرۋحانانىڭ نەۆرولوگيا بولىمشەسىنە اۋىستىرىلىپتى. بۇل بولىمشەگە تۇسەتىندەردىڭ سىرقاتى جۇيكەگە بايلانىستى بولعاندىقتان, ناۋقاستارعا ابزال جانداردىڭ ءبىر اۋىز جىلى ءسوزىنىڭ ءوزى دارۋمەننەن كەم تۇسپەيتىنى انىق.
– ايمان شارىپقىزىن جاس مامان كەزىنەن بىلەمىن, – دەيدى ونىڭ مەيىرىمگە تولى جۇرەگىنەن, ايالى الاقانىنان سىرقاتىنا شيپا تاپقان شاعيا ەسماعامبەتوۆا. – ول ەڭبەك جولىن ءبىزدىڭ ماحامبەت اۋداندىق اۋرۋحاناسىندا دارىگەر-نەۆروپاتولوگ بولىپ باستادى. بىرگە جۇمىس جاسادىق. سول ۋاقىتتان بەرى دارىگەرلىك قىزمەتىن جالعاستىرىپ, مەن سەكىلدى جانىنا شيپا ىزدەگەن سىرقاتتاردىڭ العىسىنا بولەنىپ كەلەدى.
اۋداندىق اۋرۋحانادا قاتارداعى دارىگەرلىكتەن ەڭبەك جولى تۇزىلگەن ايمان شارىپقىزىنىڭ ءوزى ىسىنە جاۋاپكەرشىلىكپەن قارايتىندىعىنا, تاجىريبەسىنىڭ تولىسا تۇسكەنىنە مىنا ءبىر دەرەكتەر دالەل بولاتىنداي. ونى 1987 جىلى №1 قالالىق اۋرۋحانانىڭ, ءبىر جىلدان كەيىن وبلىستىق اۋرۋحانانىڭ نەۆرولوگيا بولىمشەسىنە جۇمىسقا شاقىرىپتى. بەس جىلدان سوڭ نەۆرولوگيا بولىمشەسىنىڭ مەڭگەرۋشىلىگى سەنىپ تاپسىرىلدى. بۇعان قوسا وبلىستىڭ شتاتتان تىس باس نەۆروپاتولوگى بولىپ تا جۇمىس ىستەدى. راس, بىلىكتى مامانعا قاشاندا سۇرانىس تا, لايىقتى ورىن دا تابىلادى. ءبىراز جىل وبلىستىق اۋرۋحانا باس دارىگەرىنىڭ ورىنباسار قىزمەتىن دە اتقاردى.
وسى دەرەكتەردىڭ ءوزى ايمان شارىپقىزىنىڭ ءبىلىمدى, بىلىكتى دارىگەر ەكەنىن ايعاقتاي تۇسەدى. سول سەبەپتەن بولار, دەنساۋلىق ساقتاۋدىڭ ۇلتتىق بىرىڭعاي جۇيەسى ەنگىزىلگەن تۇستا وعان №7 ەمحانادا جۇمىس جاساۋعا قولقا سالىنىپتى. ءسويتىپ, ول مۇندا مەديكالىق-سانيتارلىق كومەكتى دامىتۋ جانە حالىققا جوعارى ماماندانعان كومەك كورسەتۋ باعدارلاماسىمەن ەڭبەك ەتتى. سوڭعى ەكى جىلدان بەرى وبلىستىق اۋرۋحانانىڭ نەۆرولوگيا بولىمشەسىنە جەتەكشىلىك ەتۋگە ەكىنشى مارتە شاقىرتۋ الدى. ونىڭ ارالاسۋىمەن وبلىستىق اۋرۋحانادا دياگنوستيكالىق زەرتتەۋ قۇرىلعىلارى ىسكە قوسىلىپ, ونىمەن اۋداندىق, ۋچاسكەلىك اۋرۋحانالار مەن فەلدشەرلىك-اكۋشەرلىك بەكەتتەر دەڭگەيىندە جۇيكە اۋرۋلارىن تەكسەرۋ جانە ەمدەۋ ستاندارتتارى, ولارعا كىدىرىسسىز شۇعىل مەديتسينالىق جاردەم كورسەتۋ جونىندەگى ادىستەمەلىك ۇسىنىستار جاساقتالىپتى.
ارينە, 30 جىلدان استام ەڭبەك ءوتىلى بار نەۆروپاتولوگ ايمان تەلەۋشوۆانىڭ ەڭبەگى جەمىسسىز ەمەس. 2009 جىلى «دەنساۋلىق ساقتاۋ ءىسىنىڭ ۇزدىگى» توسبەلگىسىمەن ماراپاتتالعان جوعارى ساناتتى دارىگەر تولىمدى تاجىريبەسىمەن ءبولىسىپ تۇرادى. سونىڭ ءبىر دالەلى – 2008 جىلى ۆەنا قالاسىندا وتكەن ينسۋلت سىرقاتى بويىنشا ءVى دۇنيەجۇزىلىك كونگرەسكە قاتىسۋى. جاستاردى ۇدايى قولدايدى. بىرنەشە شاكىرت تاربيەلەگەن. قازىر شاكىرتتەرى اۋداندىق, قالالىق ەمدەۋ مەكەمەلەرىندە, ءتىپتى, ءىرى شەتەلدىك كومپانيالاردىڭ كلينيكالارىندا دا ەڭبەك ەتەدى. جيىرما جىل بويى اتىراۋ مەديتسينالىق كوللەدجىندە نەۆرولوگيا پانىنەن ءدارىس وقيدى. ونىڭ ەڭبەكقورلىعى مەن بىلىكتىلىگىنەن, گيپپوكرات انتىنا ادالدىعىنان ۇيرەنگىسى كەلەتىندەر كوپ. ويتكەنى, ايمان شارىپقىزى سىرقات جانداردى مەديتسينا تاسىلىمەن ەمدەۋ ءۇشىن ۋاقىتپەن ساناسپايدى. جىلى ءسوزىن دە, بار مەيىرىمىن دە ايامايدى.
وسى ماقالانىڭ جازىلۋىنا سەبەپكەر بولعان وقىرمانىمىز شاعيا ەسماعامبەتوۆانىڭ حاتىمەن بىرگە قولىمىزعا تيگەن العىسقا تولى پاراقتاردا بولىمشە ۇجىمىنا, اسىرەسە, مەڭگەرۋشى ايمان تەلەۋشوۆانىڭ اتىنا ءبىر توپ ەمدەلۋشىلەر, ماسەلەن, باقىت جاكەەۆا, كلارا وتەەۆا, نۇرسۇلتان سۇلەكەنوۆ, رۇستەم ساقتاعانوۆ, قۇرمانعازى لۇقپانوۆ, ابۋعالي ساپيەۆ, باقتىگۇل قاراباليەۆا جانە باقتىلى قۋانوۆالار شىنايى كوڭىلدەن شىققان ريزاشىلىقتارىن ءبىلدىرىپتى. ماسەلەن, ءىى توپ مۇگەدەگى ەرسايىن مىرزاعاليەۆ بىلاي دەيدى:
– ون جىل بويى توسەككە تاڭىلىپ جاتتىم. دارىگەرىم, اق حالاتتى ابزال جان ايمان شارىپقىزىنىڭ شيپالى ەمىنىڭ ناتيجەسىندە ءوز اياعىما تۇردىم. بۇل ماعان قايتادان ومىرگە كەلگەندەي اسەر ەتتى. ەمدەلۋشىلەردىڭ سىرقاتىن, جاعدايىن مۇقيات تەكسەرىپ, بولىمشەدە كۇنى-ءتۇنى جۇرەتىن دارىگەرىمە ايتار العىسىم شەكسىز.
ءيا, بارشا مەديتسينا قىزمەتكەرلەرى ءۇشىن, اسىرەسە, نەۆروپاتولوگ ايمان تەلەۋشوۆا ءۇشىن ەمدەلۋشىلەردىڭ شىن جۇرەگىنەن شىققان العىسىن العاننان ارتىق قانداي باقىت بار دەسەڭىزشى!
جولداسبەك شوپەعۇل,
«ەگەمەن قازاقستان».
اتىراۋ وبلىسى.