كەشە ەلوردادا «اۋىل» قازاقستاندىق سوتسيال-دەموكراتيالىق پارتياسىنىڭ كەزەكتەن تىس ح سەزى ءوتىپ, وندا جاڭا باسشى سايلاندى.
قۇرىلتاي جۇمىسىنا پارتيانىڭ بارلىق وڭىرلىك فيليالدارىنىڭ دەلەگاتتارى قاتىستى. كۇن تارتىبىنە «اۋىل» پارتياسىن 2002 جىلدان بەرى باسقارىپ كەلە جاتقان عاني قاليەۆ باسقا جۇمىسقا اۋىسۋىنا بايلانىستى پارتيا باسشىسى مىندەتىن تاپسىرىپ, جاڭا توراعا سايلاۋ ماسەلەسى شىعارىلعانى بەلگىلى بولدى. «قازاقستان الدىندا الەمنىڭ 30 دامىعان ەلدەرى قاتارىنا ەنۋى ءۇشىن جان-جاقتى جاڭعىرتۋدى جۇزەگە اسىرۋ مىندەتتەرى تۇر. سوندىقتان دا «اۋىلدىڭ» باسشىلىعىنا جاڭا باستامالارمەن, يدەيالارمەن, سونداي-اق, وزگەشە كوزقاراسپەن قارۋلانعان جاڭا جەتەكشىنىڭ بولعانى ابزال», دەپ اتاپ كەتتى عاني ءالىم ۇلى. پارتيا باسشىسىنا لايىق وسىنداي قاسيەتتەردى اۋىلدىقتار پارلامەنت سەناتىنىڭ دەپۋتاتى ءالي بەكتاەۆتىڭ بويىنان تابىلادى دەپ شەشىپتى. ءا.بەكتاەۆ ءبىرىنشى بولىپ «اۋىل» قسدپ-نىڭ وڭتۇستىك قازاقستان وبلىسىنداعى فيليالىن باسقارعان. جاڭا جەتەكشىنىڭ كەلۋىمەن وڭىرلەردەگى پارتيا فيليالدارىنىڭ جۇمىسى جاندانا تۇسەدى دەپ كۇتىلۋدە. پارتيانىڭ پاۆلودار وبلىستىق فيليالىنىڭ وكىلى كەنجە كەڭەسباەۆ پارتيا باسشىلىعىنا كەلگەن ءالي بەكتاەۆتىڭ وڭتۇستىك قازاقستان وبلىستىق فيليالىنداعى پارتيالىق باسشىلىق تاجىريبەسى پارتيا جۇمىسىنا جاڭا تىنىس بەرەدى دەگەندى ەرەكشە اتادى. سونداي-اق, پارتيا باسشىسىنىڭ اۋىسۋىنا قاتىستى پىكىرىن بىلدىرگەن ساياساتتانۋشى ۆلاديمير تەلنوۆ ءوز سوزىندە «اۋىل» پارتياسى ومىرشەڭدىگىن, سونداي-اق, جاڭا كەزەڭگە بەيىمدىگىن دالەلدەدى دەگەندى باسا ايتتى. ولاي بولسا, جاڭا توراعا سايلانۋىمەن «اۋىل» پارتياسى ەلىمىز الدىندا تۇرعان, سونىڭ ىشىندە, اۋىل شارۋاشىلىعىن دامىتۋ ماسەلەلەرىندە مەملەكەتتىك ورگاندارعا كومەك كورسەتۋ باعىتىندا جاڭا مىندەتتەرگە سايكەس ءوز جۇمىسىن ۇيىمداستىرا الادى.
اسقار تۇراپباي ۇلى,
«ەگەمەن قازاقستان».