قازاق قاشاندا تالانتتان كەم بولعان ەمەس. تاپ باسىپ تابا الساق, بالاباقشا مەن مەكتەپتە جۇرگەن ۇل-قىزدىڭ بويىندا الۋان ءتۇرلى ونەر جەتىپ-ارتىلادى. ونى ۇلتتىق ۇلگىمەن ۇشتاستىرساڭ, ءتىپتى جانىپ كەتەرى حاق. سونىڭ ءبىر دالەلى ەكى جىلدان بەرى ۇلت رۋحانياتىنا بەيىمدەلىپ وتكىزىلىپ كەلە جاتقان «اقبەرەن» رەسپۋبليكالىق وقۋشىلار بايقاۋى دەر ەدىك. بۇل يگى ىسكە ۇيىتقى بولىپ وتىرعان – «دارىن» رەسپۋبليكالىق عىلىمي - پراكتيكالىق ورتالىعى. وسى اتاۋلى مەكەمەنىڭ ديرەكتورى شولپان قيراباەۆاعا تىلدەسكەنىمىزدە ول: «بۇل بايقاۋدى ەلىمىزدىڭ مەكتەپتەرىندە وقىپ جاتقان 5-11 سىنىپ وقۋشىلارى اراسىندا ۇيىمداستىرىپ كەلەمىز. باستى ماقسات, بابالار ءداستۇرىن قايتا تۇلەتۋ, مەملەكەتتىك دارەجەگە يە بولعان ءتىلىمىزدىڭ قادىر-قاسيەتىن مەكتەپ قابىرعاسىندا جۇرگەن وقۋشىلاردىڭ ساناسىنا تازا ءسىڭىرۋ, تالانتتاردى تاۋىپ, وزگەلەرگە ۇلگى ەتۋ. ءبىر سوزبەن ايتقاندا, ءسوز قادىرىن, ونەر ءمانىن, ساۋاتتى جازۋ ۇلگىسىن ۇيرەتۋ. جاسىراتىنى جوق, وسى كۇندەرى قادىرلى قازاق ءسوزىنىڭ ءتۇپ ماعىناسىن تۇسىنبەي, ايتا بەرەتىندەر كوبەيدى. ءبىز وسىنى ءبىلىم ۇياسىنان باستاپ قولعا الۋدى نيەت ەتتىك. «اقبەرەن» بايقاۋى العاش استانادا شاڭىراق كوتەردى. بيىل كيەلى تۇركىستان قالاسىنىڭ ازاماتتارى وتكىزىپ بەرۋگە بەل بايلاپ, ن.وڭداسىنوۆ اتىنداعى دارىندى بالالارعا ارنالعان مەكتەپ-ينتەرنات بازاسىندا ۇيىمداستىردى. ولارعا جاس ۇرپاق اتىنان العىس ايتۋعا ءتيىستىمىز», دەدى.
التى باعىتتا وتكەن بايقاۋدا كوماندالار بويىنشا ءبىرىنشى ورىن – شىعىس قازاقستان, ەكىنشى ورىن –جامبىل, ءۇشىنشى ورىن – قىزىلوردا وبلىستارىنىڭ ەنشىسىنە ءتيدى. سول سەكىلدى نوميناتسيالار بويىنشا دا اقىندار ايتىسىندا, ءمۇشايرادا, ۇلتتىق اسپاپتا, شەشەندىك ونەردە, كوركەمسوز وقۋدا, شىعارما جازۋدا وزىق دەپ تانىلعاندار ديپلومدارمەن ماراپاتتالىپ, باعالى سىيلىقتارعا يە بولدى. الداعى جىلى «اقبەرەن» بايقاۋىن شىعىس قازاقستان وبلىسىندا وتكىزۋ كوزدەلىپ وتىر. جالپى, ۇلت رۋحانياتىنا ۇرپاقتى مەكتەپتەن باۋلۋ ماقساتىندا ۇيىمداستىرىلعان يگىلىكتى شاراعا قازاق جۇرتىنىڭ سەرگەك جاندارى سەرپىلىس تانىتىپ, قولداپ جاتسا نۇر ۇستىنە نۇر بولماق.
سۇلەيمەن مامەت,
«ەگەمەن قازاقستان».