تالدىقورعانداعى №5514 اسكەري بولىمگە سولتۇستىك قازاقستان, قوستاناي, پەتروپاۆل جانە وزگە وڭىرلەردەن بورىشىن وتەۋگە كەلگەن 100 سارباز انت قابىلدادى. ۇلى وتان سوعىسىنىڭ ارداگەرلەرى مەن كومانديرلەر قاتىسقان جيىندا ەلىمىزدىڭ ءانۇرانى اسقاقتاپ, جاس جاۋىنگەرلەردىڭ رۋحىن كوتەردى. “دانق” ەسكەرتكىشىنە تاعزىم ەتىپ, گۇل شوقتارىن قويعان ولار اسكەري ءبولىمنىڭ تۋى الدىندا وتانىنا, قازاقستان حالقىنا, پرەزيدەنتكە ادال قىزمەت ەتەتىندىكتەرىن ءبىلدىرىپ, انت بەرىپ, قولدارىن قويدى.
دانقتى قولباسشى باۋىرجان مومىش ۇلى: “وتان ءۇشىن وتقا ءتۇس, كۇيمەيسىڭ!” دەگەن. وسى پاراساتتىلىقتىڭ استارىندا بۇگىنگى ۇرپاققا ۇلگى بولاتىن تەرەڭ وي جاتقانى انىق. سوندىقتان دا بولار, وسى كۇنگى سالتاناتقا الىستان كەلگەن اتا-انالار پەرزەنتتەرىنىڭ ەلى مەن جەرىن قورعايتىن ازامات بولعاندىعىن كوزبەن كورىپ, ءتالىم-تاربيەلەرىنىڭ قايتارىمىنا كۋا بولدى.
جيىندا وتان سوعىسىنىڭ ارداگەرى توقتارباي قاناپيانوۆ, اسكەري ءبولىم كومانديرى ءابدۇمارات تاشىمبەتوۆ, تاعى باسقالار سويلەپ, اتامەكەن, تۋعان جەرگە تەر توگۋ, ەلدىڭ تىنىشتىعىن ساقتاۋ ابىروي ەكەندىگىن سوزدەرىنە ارقاۋ ەتىپ, ساربازداردى قۇتتىقتادى.
كۇمىسجان بايجان,الماتى وبلىسى.