ەلباسى ن.نازارباەۆ «مەيىرىمدىلىك» ەرىكتى قوعامى» قورى مەن مەملەكەتتىك ءتىلدى دامىتۋ قورىنا قىتاي ەلى ماراپاتتاپ, قۇرمەتتەپ بەرگەن سىيلىعىن قاق ءبولىپ بەردى.
ونەگە مە؟ ونەگە.
قوس قاباتتى, كوپ قاباتتى ءۇي مە, ورتا عاسىرلىق زاموك پا, ايتەۋىر ءزاۋلىم-ءزاۋلىم ساراي سالۋ كەرەك شىعار. لەۆ تولستويدىڭ ياسنايا پولياناسىنان اسىپ ءتۇسىپ, دۆوريانشا شالقىپ, تاسىپ عۇمىر كەشۋ كەرەك شىعار. بىراق, ل.تولستويدىڭ «سوعىس پەن بەيبىتشىلىگىن», بولماسا «قاجىمۇراتى» مەن «كرەيتسەر سوناتاسىن» جازىپ تاستاسا, نە ارمان بار؟
حاممەر ءمىنىپ, جەكە ۇشاقپەن بارىپ, گاۆاي ارالىندا دەمالىپ, سۇندەت تويدا تىكۇشاقتان تەڭگە شاشۋ كەرەك شىعار. التىنمەن اپتالىپ, پلاتينا, كۇمىسپەن كۇپتەلۋ كەرەك شىعار. پەندەگە ءبارى كەرەك.
تاۋەلسىزدىك العان بەتتە ءبارىمىز ابدىرادىق, ابىرجىدىق. تۇرمىسىمىز تۇرالادى. قالادا تۇرىپ, دالاعا شىعىپ, وت جاعىپ, اس پىسىردىك. مىڭجاسار ادەكەنوۆ اعامىز دا وسى كەپتى باسىنان كەشكەن شىعار. اعامىز اۋپارتكومدا ءبىرىنشى حاتشى, سوۆحوزدا ديرەكتور بولدى. كەيىن وبلىسىمىزدىڭ اۋىل شارۋاشىلىعى باسقارماسىندا قوي ت ۇلىگىنىڭ جوعىن جوقتاپ, بارىن باسىنان اسىرىپ وتىردى. بىزگە جەتكەن اڭىزدا ءتورت ت ۇلىكتىڭ ىشىندە قوي عانا اللا تاعالانىڭ شاپاعاتىن كورگەن دەيدى. ىبىراحىم پايعامبارىمىزعا كوكتەن كوك قوشقار ءتۇسۋى تەگىن بولماسا كەرەك. قۇرباندىق شالۋعا.
مىڭجاسار اعامىز بىزدەن دە تەرەڭ بولسا كەرەك. ارالاس-قۇرالاس بولدىق. مەن وسى «ورتالىقتىڭ» اۋىل شارۋاشىلىعى ءبولىمىنىڭ جاپ-جاس مەڭگەرۋشىسىمىن. جاس دەپ تەزەك تەرگىزىپ جىبەرمەدى. تەرەزەمدى تەڭەپ سويلەستى, اپىل-عۇپىل مىنەزىمدى كوتەردى. جاستىق ماكسيماليزم دەيمىز عوي, قازاقشالاساق, الىپ-ۇشىپ تۇرعان الاپات جالىنىمدى بايسال تاپتىردى. قويعا ارنالعان تالاي گازەت بەتتەرىن بىرلەسىپ ازىرلەدىك. ءبارى – گازەت تىكپەسىندە, ارحيۆتە تۇر.
وتپەلى كەزەڭنىڭ وزەك تالدىرعان قيىن كۇندەرى ەدى. مىڭجاسار اعام ويدى ورىپ, قىردى قىرىپ, قىرمانىن قىزىلعا تولتىرىپ قوياتىندار ساناتىنان ەمەس ەكەنىن بىلەتىنمىن. «ۇكىمەت اسىرايدى» دەيتىن اقپەيىل اڭقاۋ «اۋىلدان» بولاتىن. ءبىز دە سول «اۋىلدىڭ» قوراسىنان ماڭىراپ شىققان قوزىلار ەدىك.
نەگىزى ەستىگەنىمدى ەمەس, كوزىممەن كورگەنىمدى عانا جازۋعا بەيىلمىن. ات جالىندا جۇرگەن ءبىر ازاماتىمىز الماتىنىڭ جازارماندارى ەمەس, ءبىرتالاي ناعىز جازۋشىلارىنا سوعىم بەرىپ تۇرىپتى. جىل سايىن. وسىنى جازىپ كەتكەندەرى دە بار (گەرولد بەلگەر).
ءوزى جەتىسىپ جۇرسە, ءبىر ءسارى عوي. مىڭجاسار اعامىز دا جايىق بەكتۇروۆتىڭ جىل سايىنعى سوعىمىن موينىنا الىپتى. «ەستىگەن قۇلاقتا جازىق جوق» دەي سالامىز عوي. بۇل, ەندى – كوزىممەن كورىپ, قولىممەن ۇستاعان شاراپاتتى شارۋا. مىڭجاسار اعامىز جارقىراتىپ سويعىزعان, سەمىز تايدى بەيبىتشىلىك بۋلۆارىنداعى ۇيىنە ارقالاپ كىرگىزىپ, جايىق اتامنىڭ باتاسىن العان ەدىم. ارينە, مىڭجاسار اعامنىڭ ارقاسىندا.
كەنەسارىنىڭ سۋرەتىن ءتابارىكتەي, ماعجاننىڭ «باتىر بايان» پوەماسىن تۇمارداي ساقتاپ, بىزگە, بۇگىنگى ۇرپاقتارىنا جەتكىزگەن جايىق بەكتۇروۆ. وسى ەكى ءجادىگەردى دە «ورتالىق قازاقستان» گازەتى التى الاشتان ءسۇيىنشى سۇراپ, جاريالاعان. ەڭ كەرەمەتى – قازاقستان تاۋەلسىزدىك الماي تۇرعان كەزدە. ونى بىلەتىن, ۇعاتىن بالا بولسا, نە ارمان؟!
جايىق بەكتۇروۆ تا, مىڭجاسار ادەكەنوۆ تە جوق بۇگىن ارامىزدا. ورىندارى ۇڭىرەيىپ تۇر. بىزگە پەيىلى تار پەندەلەر كەرەك پە؟ كەرەگى جوق! بىزگە كىم كورىنگەنگە ەمەس, جايىق اتالارىمىزداي ۇلت شىراقشىلارى ءۇشىن استىنداعى جالعىز اتىن سويىپ بەرەتىن مىڭجاسارداي اعالار كەرەك.
كەرەك!
ماعاۋيا سەمباي,
«ورتالىق قازاقستان» گازەتىنىڭ باس رەداكتورى, قازاقستاننىڭ ەڭبەك سىڭىرگەن قايراتكەرى.
قاراعاندى.