قازاقستان رەسپۋبليكاسى ۇلتتىق قاۋىپسىزدىك كوميتەتىنە قاراستى اقتاۋ قالاسىنداعى «جاعالاۋ كۇزەتى باسقارماسى شەكاراشىلارى كاسپي تەڭىزىنىڭ قازاقستاندىق اۋماعىن زاڭسىز كەسىپ ءوتىپ, براكونەرلىكپەن بالىق اۋلاعان ازەربايجان رەسپۋبليكاسىنىڭ ازاماتتارىن قولعا ءتۇسىردى. جاۋىنگەرلىك كەزەكتى تەكسەرىسكە شىققان «تاراز» شەكارا كەمەسىنىڭ ەكيپاجى تەڭىز ۇستىنەن براكونەرلەردى بايقاپ, ولارعا توقتاۋعا بەلگى بەرەدى. الايدا, «بايدا» قايىعىن بار جىلدامدىققا سالىپ, قاشا جونەلگەن ازەربايجاندىقتار قازاقستان شەكاراسىنان قارا ءۇزىپ كەتۋدى كوزدەيدى. سول كۇنى اق كوبىكتەنە قۇتىرىنعان اقجال تولقىندارى جاعاعا ۇرىپ الاسۇرعان تەڭىزدىڭ اساۋ مىنەزىمەن الىسا العا ۇمتىلعان قازاقستان شەكاراشىلارى ولاردى وڭايلىقپەن قۇتقارمايدى. ەكى رەت اسپانعا اتىلعان ەسكەرتۋ وعىنان سوڭ, ازەربايجاندىق براكونەرلەرگە «قىزىلقۇم» ءمۇيىسى تۇسىندا قازاقستان شەكاراشىلارىنا بەرىلۋگە تۋرا كەلەدى.
ءتىنتۋ كەزىندە ولاردان 28 جاشىك تىيىم سالىنعان بالىق اۋلاۋ قۇرالدارى مەن جالپى سالماعى 946 كيلوگرامدى قۇرايتىن 240 بەكىرە تۇقىمدى بالىق تاركىلەنەدى. جانە براكونەرلەردىڭ بەكىرەنىڭ ۋىلدىرىق شاشاتىن ىرىلەرىن ۇستاعانى انىقتالعان.
– اقتاۋ قالاسىنداعى ۋاقىتشا تەرگەۋ يزولياتورىنا قامالعان براكونەرلەردىڭ ۇستىنەن قازاقستان رەسپۋبليكاسى قىلمىستىق كودەكسىنىڭ مەملەكەتتىك شەكارانى زاڭسىز كەسىپ ءوتۋ جانە براكونەرلىك باپتارى بويىنشا قىلمىستىق ءىس قوزعالدى. قازىر تەرگەۋ امالدارى جۇرۋدە, ءىس قاراقيا اۋداندىق ىشكى ىستەر بولىمىنە جولداناتىن بولادى, دەيدى قر شەكارا قىزمەتى «جاعالاۋ كۇزەتى» وڭىرلىك باسقارماسى, 2201 ا اسكەري ءبولىمىنىڭ كومانديرى ەرحان رىسقاليەۆ.
سول كۇنى ماڭعىستاۋدا اۋا رايى قولايسىز بولاتىن. سەكۋندىنا 25 مەتر جىلدامدىقپەن ورەكپي سوققان جەلدىڭ قۇرعاق جەردىڭ توپىراعىن سۋىرا ءۇيىرىپ, الا شاڭ ەتسە, تەڭىز بەتىن استاڭ-كەستەڭ تولقىنعا تولتىرعانى بەلگىلى. قيىن كەزدە تاباندىلىق تانىتقان شەكاراشىلار قاراقشىلاردى قۇرىقتاپ قانا قويعان جوق, بيىل العاش رەت براكونەرلەرگە بالىقتى تەڭىزگە تاستاپ جىبەرۋگە جول بەرمەدى. بورتتا قالعان بالىقتاردىڭ شىعىنى ەسەپتەلىپ قانا قويماي, براكونەرلەر ءتيىستى ءوز جازالارىن الاتىن بولادى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.