جۋىردا تۇرىكتىڭ «تۋرمەدا» مەديتسينالىق اگەنتتىگى ءبىر توپ قازاقستاندىق جۋرناليستەردى انادولى جەرىنە, ىستامبۇل شاھارىنا الىپ باردى. ماقساتى – بۇگىنگى دامىعان تۇرىك مەديتسيناسىنىڭ جەتىستىكتەرىمەن تانىستىرۋ, تۇرىكتىڭ شيپاگەر عالىمدارىنىڭ كەسەلدى جويۋ ءادىس-تاسىلدەرىن قازاق دالاسىنا جەتكىزۋ.
ساپار باسى
الماتى اۋەجايىنان كوتەرىلگەن «پەگاس» اۋە كومپانياسىنىڭ ۇشاعى اراعا بەس ساعات سالىپ انادولى جەرىنە بارىپ قوندى. ساپاردى ۇيىمداستىرعان «تۋرمەدا» اگەنتتىگىنىڭ تۇركياداعى وكىلى, ءتۇرىك جىگىتى قازاقستاندىق توپتى جارقىن جۇزبەن قارسى الىپ تۇرىپ «قوش كەلدىڭىزدەر! سىزدەر قازاقستاننىڭ, الماتىنىڭ قارىن وزدەرىڭىزبەن بىرگە انادولى جەرىنە الىپ كەلدىڭىزدەر!» دەگەن جىلى ازىلمەن اۆتوبۋسقا باستادى. راسىندا دا, دالاعا شىقساق ىستامبۇل اسپانى مۇنارتىپ, باداناداي-باداناداي اقشا قار ەندى عانا باياۋلاپ جاۋا باستاپتى.
ىستامبۇل – مۇسىلمان دۇنيەسىندەگى تاريحي ەڭ كونە قۇرىلىستار, عيماراتتار مەن مادەنيەتتى ساقتاپ قالعان وتە اسەم قالا ەكەنى امبەگە ايان. ءبىر كەزدەرى «يسلام قاقپاسى», «باقىت قالاسى» دەگەن كوركەم اتاۋلارعا يە بولىپ, كۇللى ورتالىق ازيادان قاسيەتتى مەككەگە ساپار شەككەن قاجىلار وسى ىستامبۇلعا تابان تيگىزىپ, اپتاپتى مەكەن – اراب جەرىنە الاشتىڭ ۇلى ەكەندىكتەرىنە كوڭىلىن بىرلەپ ساپار شەگەتىن بولعان. تەحنيكاسى دامىعان قازىرگى كەزدە دە سولاي. قازاقستاننان قاجىلىق ساپارعا بەتتەگەن ۇشاق ىستامبۇل ارقىلى جيدداعا, مەككەگە بەت تۇزەپ جاتادى. سوناۋ حV-ءحVىىى عاسىردا, قازاق حاندىعى تۇسىندا تىكەلەي تىعىز قارىم-قاتىناستا بولىپ, تاعدىردىڭ تالەيىمەن ارادا حابار ءۇزىلىپ, بايلانىس توقىراپ قالسا دا, ءبىر اللانىڭ مارحاباتىمەن باۋىرلاس ەكى ەلدىڭ قۇشاقتارى قايتا ايقاسىپ, قاۋىشىپ جاتقان جايى بار.
«ىستامبۇلدا قار جاۋسا كولىك قاتىناسى قيىنداپ كەتەدى» دەگەن جولباسشىنىڭ ءۇنى مانادان بەرى تەرەزەدەن تىسقا كوز سالىپ, قالىڭ ويدا وتىرعان مەنى سەلت ەتكىزدى. بايقاسام, ءتورت قاتار بوپ ساپ تۇزەگەن ءنوپىر كولىكتىڭ قالىڭ ورتاسىندا تۇر ەكەنبىز. ءبىر جاقسىسى, تۇرىكتەر ءبىر-بىرىنە جول بەرىپ, ءوزارا ىلتيپاتپەن باياۋ دا بولسا العا مىسىقتابانداپ جىلجي بەرەدى ەكەن. ءمانىسىن سۇراساق, «ىستامبۇلدا جەكە كولىگىڭمەن ءجۇردىڭ بە, ەلدىڭ كورگەن مەحناتىنا ورتاقسىڭ. شارۋاڭ تىعىز با, وندا اۆتوبۋسقا ءمىن, جولىڭ اشىق!» دەگەن جاۋاپ الدىق. «الماتىدا بولدىم, سىزدەردە دە كولىك كەپتەلەگى بار. بىراق سىزدەردىڭ ماشينالارىڭىز شىدامسىز, كوپ بەبىلدەي بەرەدى», دەيدى تۇرىك تۋىسقان اڭگىمەسىنىڭ اياعىن ازىلگە ويىستىرىپ. وسىنداي جاراسىمدى قالجىڭمەن 5 جۇلدىزدى «رەديسون» قوناق ۇيىنە دە كەلىپ جەتتىك.
ارىپتەستەرمەن اڭگىمە
قوناق ۇيدە ءبىزدى «تۋرمەدانىڭ» قۇرىلتايشىسى مۇستافا تادجار مىرزا مەن ونىڭ قازاقستانداعى وكىلى ءارى ورتالىق ازيا بويىنشا ۇيلەستىرۋشىسى ءسابيت سەيدۋاليەۆ باۋىرىمىز قارسى الدى. قوناقاسىندا مۇستافا مىرزا ساپاردىڭ ماقساتىن تانىستىرا كەلىپ, تاعى دا ءبىزدىڭ كەلۋىمىز بەن ىستامبۇلدا جاۋعان قاردى بايلانىستىرىپ, «سىزدەردىڭ قادامدارىڭىز قۇتتى ەكەن, كوپتەن بەرى جاۋماعان قار قوسا كەلدى» دەدى, ءبىز دە ءوز كەزەگىمىزدە «ال ءسىز بىلەسىز بە, ءبىزدىڭ پرەزيدەنتىمىز بارعاندا 40 جىل تامشى تامباي تۇرعان مەككەدە جاڭبىر جاۋعان!» دەيمىز. «ارينە, ول اللانىڭ بەلگىسى! سىزدەردىڭ پرەزيدەنتتەرىڭىز ءتۇبى ءبىر تۇرىك حالقىنىڭ باعىنا بۇيىرتقان ادام!» دەيدى مۇستافا بەي.
وسى جەردە قازاقستان مەن تۇركيا اراسىنداعى ەكونوميكالىق-ساياسي بايلانىستار, ەكى ەلدىڭ ىشكى-سىرتقى قاتىناسىنا ءوزارا جەدەل ءۇن قاتىسىپ, عالامدىق كوشتە قاتار كەلە جاتقاندىعى ويعا ورالادى. تاۋەلسىز قازاق ەلىنە تۇڭعىش تابانى تيگەن تۇرىك پرەزيدەنتى سۇلەيمەن دەميرەلدىڭ 1992 جىلدىڭ كوكتەمىندە جاساعان العاشقى ساپارى, اتاتۇرىك ارمان ەتىپ اۋزىنان تاستاماي كەتكەن قاسيەتتى تۇركىستانداعى كيەلى كەسەنەلەردى قالپىنا كەلتىرۋ جۇمىستارى, يسلام-تۇرىك مادەنيەتى مەن ءبىلىمىنىڭ كاۋسار بۇلاعىنىڭ كوزىن اشۋدى ەلىمىزدىڭ وڭتۇستىگىندەگى ابىزدار مەكەنىنەن باستاۋى, ودان بەرىدەگى ەكى ەل اراسىنداعى ەكونوميكالىق جانە مادەني-گۋمانيتارلىق سالاداعى ىنتىماقتاستىقتىڭ وڭ ىقپالى مەن ناتيجەلەرى, وتكەن جىلدىڭ تامىز ايىندا عانا تۇرىك تاعىنا وتىرعان پرەزيدەنت رەجەپ تايىپ ەردوعان سايلاۋدا جەڭىپ شىققانىندا ەلباسى نۇرسۇلتان نازارباەۆتىڭ تەلەفون ارقىلى قۇتتىقتاپ, ارتىنشا رەسمي يناۋگۋراتسياسىنا ارنايى بارىپ قاتىسۋى, تۇراقتى تۇردە وتەتىن تۇركىتىلدەس مەملەكەتتەر ىنتىماقتاستىعىنىڭ سامميتتەرىندە مەملەكەت باسشىسىنىڭ بارشا ءتۇبى ءبىر تۇرىك جۇرتىن تۇركيامەن ءبىر بولۋعا شاقىرىپ, ءوزارا باۋىرلاستىقتى ۇندەيتىنى, وسىنىڭ ءبارى سانامىزدان جانە ءبىر قىلاڭ بەرەدى.
دەرتكە شيپا, جانعا داۋا «مەديكالپارك»
جىل ون ەكى اي الەمنىڭ ءار تۇكپىرىنەن اعىلىپ كەلىپ جاتاتىن تۋريستەرى ۇزىلمەيتىن تۇرىك ەلى مەديتسيناسىن مىقتاپ جولعا قويعان. كونە عيماراتتار مەن ايگىلى وسمان يمپەرياسىنىڭ مادەنيەتىن, باعزى قولونەرى مەن جادىگەرلەرىن پاش ەتەتىن تۋريستىك ساياحاتى ءوز الدىنا, بۇگىندە تۇركيا مەديتسينالىق ءتۋريزمنىڭ دە الەۋەتىن ارتتىرىپ وتىر. ءتىپتى, «دەرتكە – داۋا, ەمگە – شيپا تابىلادى» دەپ ەسەپتەلىپ كەلگەن يزرايل مەديتسيناسىنىڭ ءوزى بۇگىنگى تۇرىك دارىگەرلەرىمەن شەندەسە المايتىن جاعدايعا جەتكەن. وعان ءبىز وسى ساپارىمىزدا كوز جەتكىزدىك.
قازاقستاننان بارىپ, اپتالاپ جاتىپ تۇرىك دارىگەرلەرىنىڭ كۇردەلى وتا جاساۋ تالىمىنە قاتىسقان وتاندىق ماماندار بۇگىنگى ءتۇرىك مەديتسيناسىنىڭ قيانعا شىرقاپ, جوعارى دارەجەگە كوتەرىلىپ كەتكەندىگىنە قايران قالۋدا. وڭاشالاپ الىپ, سىر تارتىپ سۇرايمىز جەرلەستەرىمىزدەن. «شىنىمەن تۇرىك مەديتسيناسى ىلگەرىلەگەن بە؟» دەپ. ولار بۇعان دەيىن شەتەلدەردىڭ الدىڭعى قاتارلى مەديتسينا عالىمدارىمەن كەزدەسكەنىن, ايتۋلى حالىقارالىق جيىنداردا, تاجىريبەلەردە كوپ بولاتىندىعىن العا تارتىپ, تۇرىكتەردىڭ اسا كۇردەلى وتالارعا باتىل تۇردە تاۋەكەل ەتىپ وتىرعانىن جانە ادام سەنگىسىز شىنايى جەتىستىكتەرگە يە بولعاندىعىن, تۇرىك دارىگەرلەرىندەي مەديتسينا عىلىمىن جەتىك مەڭگەرىپ, بۇل سالانىڭ قۇپياسىن تەرەڭدەتە تۇسكەن عالىمداردىڭ وسىنشا كوپ لەگىن كورگەندەرىنە تاڭ.
ءبىزدىڭ انادولى جەرىنە جاساعان ساپارىمىزدى ۇيىمداستىرعان «تۋرمەدا» اگەنتتىگى تۇركياداعى ەڭ ءىرى «مەديكالپارك» كلينيكالار جەلىسىمەن تىكەلەي جۇمىس ىستەيتىن ۇجىم. اگەنتتىكتىڭ قىزمەتى – ورتالىق ازيا مەن قازاقستاننان دەرتىنە داۋا ىزدەگەن ەمدەلۋشىلەردى تۇركياداعى اسا ساپالى ەم ورتالىعىنا جەتكىزۋ, سىرقاتقا جانە ونىڭ تۋىستارىنا مەيلىنشە جايلى جاعداي تۋدىرىپ, دەرتتى جانداردىڭ اياقتان تۇرىپ كەتكەنىنە دەيىن قالتقىسىز قولعابىس بەرۋ.
«مەديكالپارك» الەمدە ميكروحيرۋرگيا سالاسىندا ەلەۋلى جەتىستىككە جەتكەن كلينيكالىق جەلىلەر ورتالىعى. مۇندا جىلىنا 120 مىڭعا تارتا ۇلكەندى-كىشىلى وتالار جاسالىپ, ءۇمىتىن ۇزگەن ناۋقاستاردىڭ اياققا تۇرعان كەزدەرى از ەمەس. ونكولوگيا, ترانسپلانتاتسيا سالاسىندا تۇرىك مەديتسيناسى كوش باسىندا. ادام ميىنداعى ىسىكتى پىشاقتىڭ كومەگىنسىز سىلىپ تاستايتىن «گامما نايف» دەپ اتالاتىن اسا قىمبات مەديتسينالىق قۇرىلعىنى دا وسى «مەديكالپاركتەن» كەزدەستىرە الاسىز. مۇنداي قۇرىلعى الەمدە ساناۋلى ەلدەردە عانا بار جانە ونىمەن جۇمىس جاسايتىن بىلىكتى مامان-دارىگەر دە ساۋساقپەن سانارلىق.
كلينيكانىڭ ادامنىڭ جىلىك مايىن اۋىستىرۋمەن اينالىساتىن بولىمىندە بالالار گەماتولوگى, پروفەسسور تۋنچ فيشگين مىرزا الەمدە قازىر لەيكوز اۋرۋىنىڭ بەلەڭ الىپ كەتكەندىگىن, مۇندا دۇنيەنىڭ ءار تۇكپىرىنەن سىرقات بالالاردىڭ كەلەتىنىن, ونىڭ ىشىندە ەۋروپادان, ورتالىق ازيا ەلدەرى, يران, پاكىستان مەملەكەتتەرىنەن دە كوپتەپ جاسوسپىرىمدەردىڭ تۇسەتىندىگىن ايتتى. «قازاقستان باۋىرلاس ەل بولعاندىقتان قازاق سابيلەرى ءبىزدى جاتىرقامايدى, ءتىلىمىز دە, مىنەز-قۇلقىمىز دا ۇقساس, تەز ءتىل تابىسىپ كەتەمىز. ول ەم الۋشى بالالارعا دا جاقسى», دەيدى پروفەسسور تۋنچ بەي. دالىزدەگى الەم بالالارىنىڭ سالعان سۋرەتتەرى ىلىنگەن تاقتادان ساۋكەلە كيگەن قازاق قىزىنىڭ بەينەسىن بايقاپ قالدىق. ءيا, كوزىمىز الداماپتى. ەمدەلۋشى سابيلەردىڭ ءوز قولدارىمەن سالىنىپ, ءتۇرلى تاقىرىپتى بەينەلەيتىن سۋرەت تاقتاسىنداعى «ساۋكەلەلى ارۋ» سيپاتتالعان اق پاراقتىڭ شەتىنە بالا قولىمەن «ريزا بەيبىتحان. قازاقستان» دەپ جازىلىپتى. دارىگەردەن سۇراعانىمىزدا, قازاقستاننان كەلگەن 3 جاسار قىزدىڭ تۋىندىسى ەكەنىن, جۋىردا عانا جىلىك مايىن الماستىرعان كۇردەلى وتا جاسالعانىن ايتتى. وتاندىق دارىگەرلەر مۇنداي قيىن ەم ءتۇرى تاجىريبەدە بولماعاندىقتان 3 جاسار ريزانى مەملەكەتتىك كۆوتامەن «مەديكالپارك» ەمحاناسىندا ەمدەلۋگە جىبەرىپتى. جارتى جىلعا جۋىق كۇردەلى وتاعا دايىندالعان ءبىزدىڭ قىزىمىزعا ءوز اكەسى دونور بولىپ, وتا جاسالعانىنا نەبارى 3 اپتا وتكەن. قازاقستاندىق دارىگەرلەر سىرقات پەن دونوردىڭ جاسۋشا سايكەستىكتەرى 100 پايىز بولماسا وتا جاساي المايمىز دەگەن ەكەن, ال تۇرىك ماماندارى 54 پايىزدىق سايكەستىكپەن تاۋەكەلگە بارىپ, وتانى ءساتتى جاساپ شىققان. بۇيىرتسا, جاقىن كۇندەردە ءوز اياعىنان ءتاي-ءتاي باسىپ ءجۇرىپ كەتەدى دەپ ۇمىتتەنىپ وتىر. «اللا شيپاسىن بەرسىن! جاقسىلاپ قاراڭىزدارشى؟!» دەپ ءوتىنىش بىلدىردىك تۇرىك دارىگەرلەرىنە.
ساۋاپتى ءىستىڭ باسىندا «تۋرمەدا» تۇر
تۇرىك ەمحاناسىنىڭ تابالدىرىعىنان اتتاعان ساتتە دەرتىڭىز جوعالىپ كەتەتىن ءتارىزدى. سونداي اۋرانى قالىپتاستىرىپ, ەرەكشە كۇيگە ەنگىزىپ قويعان تۇرىك باۋىرلار. باس دارىگەردەن باستاپ, كلينيكاداعى ايتۋلى پروفەسسورلار, قولى شيپالى حيرۋرگتەر مەن ءيمانجۇزدى مەدبيكەلەر ءاربىر ناۋقاسقا ەرەكشە مەيىرىممەن كوڭىل ءبولىپ, كۇندە جانىنان تابىلادى ەكەن. «كوڭىلدىڭ ءوزى – جارتى ەم» دەگەن قاعيداتتى بەكەم ۇستانعان اق حالاتتى ابزال جاندار كەز كەلگەن اداممەن جىلى سويلەسىپ, جان-دۇنيەڭدى باۋراپ الادى. بالدىرعاندار ەم قابىلدايتىن بولىمىندە ۇرەيلەنگەن نەمەسە كوزى جاساۋراعان ءسابيدى كورمەيسىڭ. ءداپ ءبىر اتاسىنىڭ ۇيىنە كەلگەندەي, سىرقاتىن ۇمىتىپ, دارىگەرلەردى ويىنعا يكەمدەپ جۇرگەن بالالار. جانە ءار ەلدىڭ ءوڭى وزگەشە پەرزەنتتەرى.
«مەديكالپارك» دارىگەرلەرىنىڭ ەرەكشە مەيىرباندىعىن وسىندا ەم قابىلداپ جاتقان ءبىراز وتانداستارىمىز دا ايىرىقشا نازارمەن ايتىپ بەردى. «قالاي بولادى ەكەن دەپ ەكىۇداي ۇمىتپەن كەلسەك تە, مۇندا ورنالاسقاننان كەيىن ساۋىعىپ كەتۋگە مىندەتتى سەكىلدى سەزىنەسىڭ ءوزىڭدى», دەيدى ولار. «شيپاسى قونسىن! ەمى دارىسىن! ەلگە ق ۇلىنداي ويناقتاپ جەتىڭىزدەر!» دەپ ءبىز دە تىلەك تىلەپ قويامىز.
«مەديكالپارك» ورتالىعىندا ەڭ كۇردەلى وتا دەپ ەسەپتەلەتىن جىلىك مايىن الماستىرۋدىڭ ورتاشا كورسەتكىشى 100-گە 70 پايىز ەكەن. ەكستراكورپورالدى ۇرىقتاندىرۋدا تيىمدىلىكتىڭ الەمدىك ستاندارتى 30 پايىز. ال «مەديكالپارك» ەمحاناسى ول تيىمدىلىكتى 54 پايىزعا جەتكىزگەن. وتە جوعارى كورسەتكىش, عىلىمي وزىق جەتىستىك! بۇدان وزگە راديولوگيالىق, ونكولوگيالىق سىرقاتتارعا وتا جاساۋدا دا تۇركيا دارىگەرلەرى وزىق ناتيجەگە قول جەتكىزىپ وتىر. ءتىپتى, ەكونوميكاسى كوش ىلگەرى العا وزعان ەۋروپا جۇرتى دا داۋا ىزدەپ وسىندا اعىلادى. سەبەبى, قىزمەت ساپالى, باعا ارزان! تۇركيانىڭ ەڭ ءىرى قالالارىندا ورتالىقتارىن اشقان بۇل ەمحانا الەمنىڭ بىرنەشە ەلىمەن تىعىز بايلانىستا كورىنەدى. اۋىر ناۋقاستاردى ەمدەۋدەن بولەك, وزگە مەملەكەتتەرگە مامان دايارلاۋدى دا جولعا قويعان. ماسەلەن, «تۋرمەدا» اگەنتتىگىنىڭ ارالاسۋىمەن ءبىر عانا 2010 جىلى الەمنىڭ ءار تۇكپىرىنەن 100-گە جۋىق دارىگەر كەلىپ, ءتالىم العان, تاجىريبە الماسقان.
«دىنگە ەرەكشە كوڭىل بولگەن مۇسىلمان مەملەكەتىسىزدەر عوي, سىزدەردە ترانسپلانتاتسياعا, ادام اعزاسىن الماستىرۋعا قالاي قارايدى؟» دەگەن سۇراق قويدىق. مۇستافا تادجار مىرزا بۇل ماسەلەنىڭ تۇبەگەيلى شەشىلگەنىن, بيلىك پەن ءمۇفتيات بىرلەسىپ, ەل ىشىندە ساۋاتتى ناسيحات, ءتۇسىندىرۋ جۇمىستارى تىڭعىلىقتى جۇرگىزىلگەندىكتەن ءدىنباسىلارى اعزا الماستىرۋعا رۇقسات بەرەتىن ءپاتۋا, ساياساتكەرلەر حالىقارالىق دەڭگەيدەگى زاڭ قابىلداعانىن جەتكىزدى. «ادامدى جاراتقان – اللا! ادام ءومىرى ۇلكەن قۇندىلىق! سوندىقتان دا ءبىز ءبىرىنشى كەزەكتە ادام جانىن ساقتاپ قالۋعا بار پەيىلىمىزدى اۋدارامىز. جانى قىل ۇستىندە جاتقان ادام – ول دا بىرەۋدىڭ قيماسى, جالعىزى, ارداقتىسى. ءبىر ادامنىڭ ءومىرى بۇكىل ءبىر ۇرپاقتىڭ جالعاستىعىن ساقتاپ قالۋى مۇمكىن», دەيدى. راسىندا, ەتجاقىنىمىز سىرقاتتانىپ قالسا, تەزىرەك ساۋىعۋىن تىلەپ, جاراتقانعا جالبارىنامىز, جانىمىز سونىڭ ۇستىندە بولادى. مىناداي مەديتسيناسى دامىعان زاماندا, ۇزىلگەلى تۇرعان جانىن الىپ قالاتىن مۇمكىنشىلىك بولا تۇرا «جوق, بۇعان ءدىن قارسى, زاڭعا تومپاق. سوتتالىپ كەتەر جايىم جوق!» دەپ قولى التىن شيپاگەر شەتكە شىقسا, سىرت اينالسا قانداي بولار ەدىك؟!
قوش بول, ىستامبۇل!
قالىڭ جاۋعان قاردىڭ سەبەبىنەن تۇركيانىڭ ەڭ ءىرى 2 قالاسىندا بولامىز دەپ جوسپارلانعان 3 كۇندىك ساپارىمىز ءبىر عانا ىستامبۇلمەن شەكتەلدى. انتاليانى كورۋ بۇل جولى ءناسىپ بولمادى. بۇيىرتسا, ءالى كەلەرمىز. «ءتۋريزمنىڭ جارقىن مىسالىنا اينالعان بودرۋم, انتاليا, ەر تۇرىكتىڭ ەكىنشى ءارى جاڭا استاناسى انكارا, قۇداي قالاسا, ساف اۋاڭدى جۇتىپ, يرەلەڭدەگەن كوشەلەرىڭدە سەيىل قۇرار كۇن دە بولار», دەگەن ۇمىتپەن جولعا جينالدىق.
اباي, شاكارىم, ءماشھۇر ءجۇسىپتەر «ءدىن مەن ءىلىمنىڭ استاناسى» دەپ باعا بەرگەن ىستامبۇل شاھارىنان كوتەرىلگەن ۇشاق قارا تەڭىزدى كوكتەي ءوتىپ, كۇللى مۇسىلمان الەمىنىڭ بەسىگى بولعان اراب جازىعىندا وسمان يمپەرياسىن قۇرعان, ازيا مەن ەۋروپاعا, قارا قۇرلىق افريكاعا قۇزىرىن ءجۇرگىزگەن, ەۋرازيا كەڭىستىگىندەگى ەڭ الىپ تا قاھارلى يمپەريانىڭ نەگىزىن قالاعان ەر تۇرىكتىڭ تۋعان جەر – اتاجۇرتى جۋساندى قازاق دالاسىنا, بۇگىندە ازۋىن ايعا بىلەگەن الپاۋىت مەملەكەتتەرمەن تەرەزەسىن تەڭەستىرىپ كەلە جاتقان قازاقستانعا, ءبىزدىڭ ورتاق وتانىمىزعا قاراي ساعات ساناپ جاقىنداپ كەلە جاتتى...
قانات ەسكەندىر,
«ەگەمەن قازاقستان».
الماتى – ىستامبۇل – الماتى.