بۇگىنگى ۇلتتىق دەنساۋلىق ساقتاۋ جۇيەسىندەگى وزگەرىستەر مەن جاڭا تالاپتارعا سايكەس كەز-كەلگەن رەسپۋبليكا ازاماتى ءوزى قالاعان, ءوزى تاڭداعان دارىگەرگە قارالىپ ەمدەلە الادى. وعان ەشقانداي شەك قويىلمايدى. وبلىستىڭ سولتۇستىك جاق ءبولىگىندە ورنالاسقان شىڭعىرلاۋ اۋدانىنىڭ تۇرعىنى ءساتباي قالاباەۆتىڭ “ەگەمەن قازاقستاننىڭ” ورال قالاسىنداعى تىلشىلەر قوسىنىنا كەلگەندەگى باستى ايتايىن دەگەن ويى وسى ەكەن. ول كىسى اماندىق-ساۋلىق سۇراسقاننان كەيىن ءسوز جەلىسىن بىلايشا ساباقتادى:
– بالامىزعا شۇعىل اياق استىنان وتا جاساتۋ كەرەك بولدى. سودان سوڭ ءۇي ىشىمىزبەن ونىڭ تاعدىرىن قاي اۋرۋحاناعا, قاي حيرۋرگكە سەنىپ تاپسىرۋعا بولادى دەگەن ماسەلەنى تالقىعا سالدىق. ەل ىشىنەن سۇراي كەلە, ىزدەستىرە كەلە كازتالوۆ اۋدانىنا قاراستى جالپاقتال اۋىلدىق اۋرۋحاناسىندا تالاي ادامدى اجالدان اراشالاپ, دەرتتەرىنە داۋا تاۋىپ بەرگەن ەسەنگەلدى راباەۆ دەگەن حيرۋرگتىڭ بار ەكەنىن ەستىدىك.
شىڭعىرلاۋ وبلىستىڭ سولتۇستىگىندە قونىس تەپسە, جالپاقتال وڭتۇستىگىندە ورنالاسقان. وعان بارۋ ءۇشىن ەڭ الدىمەن 250 كيللومەتر قاشىقتىقتاعى وبلىس ورتالىعى ورالعا كەلىپ, سودان سوڭ تاعى دا 300 كيللومەتر جول ءجۇرۋ قاجەت بولدى. وسىنداي جول ازابىن كەشىپ جەر تۇبىندەگى جالپاقتالعا دا جەتتىك-اۋ, اقىرى. ءبىزدىڭ الىستان كەلگەنىمىزدەن حاباردار بولىپ قالسا كەرەك, ەسەنگەلدى تەز, ءارى كەزەكسىز قابىلدادى. كوپ كەشىكتىرمەي وتانى دا ءوزى جاساپ تاستادى.
قاتەلەسپەگەن ەكەنبىز. ويعا العان ماقساتىمىز ورىندالىپ, وتا وتە ءساتتى شىقتى. مۇنى ءبىز بىرىنشىدەن ەسەنگەلدىنىڭ شيپالى قولى مەن كاسىبي شەبەرلىگىنىڭ ارقاسى دەپ بىلەمىز. ول بالامىزدى وپەراتسيالىق بلوكتان پالاتاعا اۋىستىرعاننان كەيىن دە, تىكەلەي ءوز باقىلاۋىنا الدى. كوپ كەشىكپەي بالامىز شالعايداعى اۋىلدىق اۋرۋحانادان قۇلان-تازا جازىلىپ شىقتى. سونداي-اق مەدبيكەلەر گ.ماحمەتوۆا مەن ج.سادىقوۆاعا دا ريزاشىلىعىمىز شەكسىز. البەتتە ادامدى سەنىم الدامايدى عوي. ءبىزدى دە شالعاي اۋىلداعى قاراپايىم حيرۋرگ ەسەنگەلدى راباەۆقا دەگەن سەنىمىمىز الداماعانىنا وتە قۋانىشتىمىز. ونىڭ تالاي ادامدى دەرتىنەن قۇلان-تازا ايىقتىرىپ جۇرگەن بىلىكتى مامان-حيرۋرگ ەكەنىنە كوزىمىز ودان سايىن جەتە ءتۇستى. مىنە, وسى قۋانىشىمىزدى ەلىمىزدىڭ باس گازەتى “ەگەمەنگە” حابارلاعاندى ءجون كورىپ وزىڭىزگە كەلىپ وتىرمىز,– دەپ اياقتادى ءوز اڭگىمەسىن ءساتباي قالاباەۆ.
تەمىر قۇسايىن.