استانا. 31 ناۋرىز. بۇگىن فۋتبولدان قازاقستان ۇلتتىق قۇراماسى رەسەيمەن جولداستىق كەزدەسۋ وتكىزەدى. ساعات 23:00-دە باستالاتىن ويىندى وتاندىق «حابار» تەلەارناسى تىكەلەي ەفيردە كورسەتەدى. بۇل تۋرالى egemen.kz حابارلادى.
كەزدەسۋ رەسەيدىڭ حيمكي قالاسىنا وتەدى. يۋري كراسنوجان جاتتىقتىراتىن ءبىزدىڭ قۇراما كەشە ويىن وتەتىن «حيمكي-ارەنا» ستاديونىندا العاشقى جاتتىعۋىن جاسادى. ايتا كەتەيىك, باس جاتتىقتىرۋشى بۇل جولى قاقپاشىلار نەناد ەريچ پەن ۆلاديمير لوگينوۆسكيدى قاسىنا ەرتكەن جوق. سونداي-اق, ءۇش كۇن بۇرىن يسلاندياعا قارسى ويىندا نەگىزگى قۇرامدا الاڭعا شىققان رەنات ابدۋلين, ازات نۇرعاليەۆ جانە داۋرەنبەك تاجىمبەتوۆتەر دە رەسەيگە بارعان جوق.
قارسىلاستارىمىزدىڭ باس جاتتىقتىرۋشىسى فابيو كاپەللو ەكەنى بەلگىلى. رەسەي سوڭعى ويىنىن 27 ناۋرىز كۇنى 2016 جىلعى ەۋروپا چەمپيوناتىنا ىرىكتەۋ ءتۋرنيرى اياسىندا چەرنوگورياعا قارسى وتكىزدى. الايدا, اتالعان كەزدەسۋ جانكۇيەرلەردىڭ باسبۇزارلىعىنا بايلانىستى اياقسىز قالدى. سونداي-اق, ءدال سول ماتچتا رەسەيدىڭ نەگىزگى قاقپاشىسى يگور اكينفەەۆتىڭ جاراقات العانىن ايتا كەتەيىك.
قوس كوماندا اراسىنداعى سوڭعى ويىن 2008 جىلى مامىر ايىندا وتكەن ەدى. اتالعان كەزدەسۋدە ءبىزدىڭ كوماندانىڭ قاقپاسىنا جاۋاپسىز 6 گول جىبەرىپ, ويسىراي جەڭىلگەنى ەسىمىزدە. ول كەزدە قازاقستان قۇراماسىن ارنو پايپەرس جاتتىقتىرسا, رەسەي تىزگىنى گۋس حيددينكتىڭ قولىندا بولاتىن.
رەسەيدىڭ «سپورت-ەكسپرەسس» باسىلىمىنىڭ بولجامى بويىنشا بۇگىن كوماندالار مىنا قۇراما الاڭعا شىعۋى مۇمكىن:
رەسەي: لودىگين, ششەننيكوۆ, ۆ.بەرەزۋتسكي, نوۆوسەلتسەۆ, كوزلوۆ, وزدوەۆ, موگيلەۆەتس, كانۋننيكوۆ, توربينسكي, سامەدوۆ, دزيۋبا.
قازاقستان: سيدەلنيكوۆ, گۋرمان, لوگۆينەنكو, قۋانتاەۆ, ۆوروتنيكوۆ, سۇيىمباەۆ, تاعىبەرگەن, سماقوۆ, قونىسباەۆ, ششەتكين, يسلامحان.
ەلامان قوڭىر.
دەرەك: egemen.kz.
سۋرەت: fanatik.kz.