ءبىز ويدا-جوقتا كەزدەستىك. ماشات شاتقالىندا. ماشات شاتقالى دەگەن اتتىڭ ءوزى ماحاببات تاقىرىبىنا سۇرانىپ تۇرعان جوق پا؟ مارحابات اعانىڭ “ماشاتتاعى ماحابباتىن” دا سۇيسىنە وقىپ تاستاعانبىز ءبىر كەزدە.
سول جەردە ماحاببات تۋرالى كينو ءتۇسىرىلىپ جاتىر ەكەن, سوعان اناۋ-مىناۋ ەمەس, سوناۋ فرانتسيا ەلىنەن الەمگە ايگىلى اكتەر جەرار دەپاردەنىڭ ءوزى كەلىپتى دەگەن سوڭ, ونەر دەسە ىشكەن اسىمىزدى جەرگە قوياتىن ادەتىمىزبەن قۇيىسقانىمىز كوتەرىلە بەردى.
سونىمەن, ماشاتقا قاراي ساپار شەككەنبىز. كوپ ۇزاماي كينوشىلاردىڭ قىم-قۋىت تىرلىگىنە دە كۋا بولعانبىز. جەرار دەپاردە اتتى “جۇلدىزدى” دا كوردىك. بايقايمىز, ول قالجىڭباس سياقتى. اسىرەسە, بەلگىلى اكتەر, تالانتتى ونەر يەسى بولات قالىمبەتوۆپەن ءازىلى جاراسا كەتىپتى. ولاردىڭ ادەمى ءازىل-قالجىڭدارىنا قازىرگى قازاق كينوونەرىنىڭ دارا تۇلعاسى نۇرجۇمان اعا ىقتىمباەۆ كەڭكىلدەي ك ۇلىپ, ءماز بولىپ قالادى. وسىنىڭ ءبارىن كورىپ, كۋا بولىپ تۇرعان سوڭ اتاقتى اكتەرمەن اڭگىمەلەسكىمىز كەلمەي مە باياعى. ال اڭگىمەلەسۋ ءۇشىن فرانتسۋز ءتىلىنىڭ مامانى كەرەك. ول دا تابىلدى. تابىلعاندا... ايشا بولىپ شىقتى. ايشا بولعاندا, كۇللى قازاقتى ءبىر جەرگە جيىپ الىپ, وقيعاسىن ايتىپ بەر دەسەڭ جاتقا سوعاتىن كادىمگى “تاقيالى پەرىشتە” فيلمىندەگى ءبارىمىزدىڭ سۇيىكتى كەيىپكەرىمىز تايلاق عاشىق بولاتىن بويجەتكەن شە؟ ءيا, اۋدارماشىمىز سول سۇلۋدىڭ ءدال ءوزى بولىپ شىقتى!
راس, ماشاتتا كەزدەسكەن اۋدارماشى ايشا كينوداعى ءورىمتال ايشا قىزدان بۇگىندە وزگەرەك. ارينە, ۋاقىت تابى كىمدى بولسا دا ءوز ەركىنە ەرىكسىز جۇگىندىرەدى عوي. ونىڭ ۇستىنە كوزىنە تۇنعان مۇڭنان تاعدىر تاۋقىمەتىن ءبىراز تاتقانى دا اڭعارىلعان.
وۋ, ايتپاقشى, مەنىڭ ايشا, ايشا دەپ نەعىپ تاڭدايىم تاقىلداپ كەتتى. ايشا – ونىڭ فيلمدەگى اتى, ال ومىردەگى ەسىمى شولپان ەمەس پە؟ شولپان جۇسىپقىزى التايباەۆا! ءيا, بەلگىلى جۋرناليست, جازۋشى, سىقاقشى ءجۇسىپباي التايباەۆتىڭ تۋعان قىزى. ءجۇسىپ اعامىزدىڭ “ناق, ناق”, “سىپىرعى”, “ۇيات-اي”, “تۇلەك”, “جايناق” جانە “ارزان دومبىرا” سياقتى كوپتەگەن تاماشا كىتاپتارىن وقىپ وسكەنبىز. كەزىندە “ارا” سياقتى ارىندى جۋرنالدىڭ باس رەداكتورى بولعانىنان دا حاباردارمىز. ۇيات بولعانى, سۇيىكتى جازۋشىمىزدىڭ قازاق كينو ونەرىنىڭ شوق جۇلدىزىنىڭ بىرىنەن سانالاتىن “تاقيالى پەرىشتە” فيلمىنە ون ەكىدە ءبىر گ ۇلى اشىلماعان ەركە قىزىن اكتەر رەتىندە ۇكىلەپ قوسقانىن بىلمەپپىز.
ايشا بۇگىندە فيلولوگيا عىلىمدارىنىڭ كانديداتى. كانديداتتىعىن سوناۋ سانكت-پەتەربۋرگتە قورعاعان. الماتى شەت تىلدەر ينستيتۋتىنىڭ ستۋدەنتتەرىنە, مىنە, جيىرما ءۇش جىلدان بەرى فرانتسۋز تىلىنەن ساباق بەرىپ كەلەدى. ول “تاقيالى پەرىشتە” فيلمىنەن باسقا, ء“ان قاناتىندا”, “اتامەكەن” كينولارىنا دا تۇسكەن. ء“ان قاناتىندا” – ءلايلانىڭ ءرولىن وينادى. كينوشىلاردىڭ تىلىمەن تۇجىرساق, “پارتنەرى” ءانۋار مولدابەكوۆ سىندى دارىندى اكتەر بولعان. ال “تاقيالى پەرىشتەدەگى” ايشا ءرولىنە مەكتەپتىڭ 11 سىنىبىندا وقىپ ءجۇرگەن كەزىندە, ياعني 18 جاسىندا شاقىرىپتى...
“ماشاتقا كەل, جەرار دەپاردەگە اۋدارماشى تاپپاي, قىسىلىپ تۇرمىز”, دەپ شاقىرعان بەلگىلى رەجيسسەر سەرگەي ءازىموۆ ەكەن. ونىڭ الدىندا سوزاقتاعى “كاتكو” ۋران كومپانياسىندا 3 جىل ء“تىلماش” بولعان ءتاجىريبەسى بار كورىنەدى. وكىمەت ء“وز كۇندەرىڭدى وزدەرىڭ كورىڭدەر” دەگەن سوڭ وزەكتى جانعا نان تابۋ كەرەك تە باياعى. كۇيەۋى راۆيل سابىروۆ بولسا مارقۇم بولىپ كەتىپتى. ودان ءبىر ۇل, ءبىر قىزى بار. ۇل – سۋرەتشى, قىز – قۇقىق قورعاۋشى. دامەلى دەگەن نەمەرەسىنىڭ ءتىلى بالدان ءتاتتى.
ايپاقشى, ماشات شاتقالىنا كىرەبەرىستەگى كينو ءتۇسىرىپ جاتقان اۋىلعا شىمكەنتتەن ءبىر توپ ايەلدەر دە كەلىپتى جەلپىلدەپ. جەرار دەپاردەمەن سويلەسەمىز دەيدى. فرانتسۋزشا! اكتەرگە: “كوردىڭىز بە, مەسە, ءبىزدىڭ شىمكەنتتىڭ ايەلدەرى ءدۋلاتيدىڭ عانا ەمەس, سونىمەن بىرگە ديۋمانىڭ تىلىندە دە سايرايىن دەپ تۇر”, دەگەن ەم, قازاقتىڭ مىنەز-قۇلقىن ءبىلىپ قالعان ول بالاشا ءماز بولدى دا قالدى.
ەڭ باستىسى, الگى ايەلدەر – شولپان التايباەۆا ءدارىس بەرگەن بايىرعى ستۋدەنتتەر بولىپ شىقتى. ۇستازدارىمەن: “شولپان جۇسىپقىزى, شىنىمەن ءسىز بە!؟” دەپ, شۇرقىراي امانداسىپ, قۋانا قۇشاقتاسىپ جاتىر. “ۇستاز باقىتى!” دەگەن وسى عوي. شولپاننىڭ مۇڭ ۇيالاپ, سىر تۇنعان كوزى لەزدە جايناپ شىعا كەلدى.
“تاقيالى پەرىشتە” فيلمىنە, ونداعى ايداي سۇلۋ ايشاعا قايتا ورالايىقشى. ءوز باسىم بۇرىن ىلعي ءامينا اپاي مەن بالاسى تايلاقتىڭ قىلىعىنا ءماز بولىپ وتىرا بەرىپپىن. ايتپەسە, بۇل فيلمدە جەكە-جەكە ءسوز ەتەتىن كوپتەگەن قاھارماندار بار عوي. ولاردىڭ ىشىندە ايشا-شولپاننىڭ بەينەسى دە ءوزى اتتاس جۇلدىزداي جارقىراپ تۇر. ول سومداعان بەينەدەگى نازىكتىك قانداي, سۇلۋلىق قانداي, ەڭ باستىسى — قازاق قىزدارىنا ءتان اقىلدىلىق پەن جىبەكتەي مىنەز قانداي, شىركىن!.. مەن ءفيلمدى قايتا كورگەندە وسىنداي وي ءتۇيدىم.
سىزدەر دە “تىرلىك كوپ, جۇمىس باستان اسادى” دەمەستەن, ءبىر كورىپ شىعىڭىزدار.
سۋرەتتە: اكتريسا, ۇستاز شولپان التايباەۆا.
كوسەمالى ساتتىباي ۇلى. سۋرەتتى تۇسىرگەن التىنبەك قارتاباەۆ.