پەتروپاۆل. 4 ناۋرىز. پەتروپاۆلدا جوعارى جانە ارناۋلى وقۋ ورىندارىن تامامداعان 134 جاس مامان «جۇمىسپەن قامتۋ جول كارتاسى-2020» باعدارلاماسى شەڭبەرىندە تۇراقتى جۇمىسقا ورنالاستى. بۇل تۋرالى قالالىق جۇمىسپەن قامتۋ ورتالىعى حابارلادى.
ورتالىقتىڭ ديرەكتورى ايجان ءىلياسوۆانىڭ مالىمدەۋىنشە, جاستار تاجىريبەسى اياسىندا 95 ادامدى جۇمىسقا تارتۋ جوسپارلانسا, ناتيجەسىندە 134 ادام ورنالاستىرىلعان. بۇل ماقسات ءۇشىن رەسپۋبليكالىق قازىنادان 16 ميلليون 931 مىڭ تەڭگە بولىنگەن.
مەملەكەتتىك باعدارلاما بويىنشا جۇمىس تاپقان ءاليا يمامباەۆا م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىن ەكولوگ ماماندىعى بويىنشا تامامداعان. ءاليا وقۋىن اياقتاعاننان كەيىن ءبىراز ۋاقىت جۇمىسسىز ءجۇرىپ قالعان. تەك جۇمىسپەن قامتۋ ورتالىعىنا كەلگەننەن كەيىن قالالىق ەكولوگيا دەپارتامەنتىندە 6 اي تاجىريبەدەن ءوتىپ, كاسىبي جاعىنان ىسىلعان. ناتيجەسىندە, سول مەكەمەگە جۇمىسقا قابىلدانىپ, العاشقى ەڭبەكاقىسىنا دا يە بولىپتى.
«مەكەمەلەر مەن كاسىپورىندار كوبىنە جۇمىس ءوتىلىنىڭ, تاجىريبەنىڭ بولعانىن قالايدى. ءبىز وسىنداي تىعىرىقتان شىعۋ ماقساتىمەن جۇمىسسىز جۇرگەن 29 جاسقا دەيىنگىلەر جايلى جان-جاقتى مالىمەتتەر جيناقتادىق. قازىر مەملەكەتتىك باعدارلاما بويىنشا كومەك كورسەتۋدىڭ, جۇمىسقا ورنالاستىرۋدىڭ كەشەندى ءىس-شارالارى ءتۇزىلىپ, ىقتيمالدى جولدار قاراستىرىلۋدا», دەيدى ايجان بورانبايقىزى.
ءومىر ەسقالي.
دەرەك: پەتروپاۆل قالالىق جۇمىسپەن قامتۋ ورتالىعى.
سۋرەت: petropavl.sko.kz.