استانا. 16 مامىر. تۇرىكتىڭ بەلگىلى كينو اكتەرى بۋراك ءوزچيۆيت استاناعا كەلەدى. كينو «جۇلدىزىنىڭ» قازاقستانعا ساپارى «ماحابباتىم ساعان ۇقسايدى» ءفيلمىنىڭ تۇساۋكەسەرى اياسىندا ۇيىمداستىرىلۋدا. بۇل تۋرالى «قازاقستان» تەلەراديوكورپوراتسياسىنىڭ ءباسپاسوز قىزمەتى حابارلادى.
بۋراك ءوزچيۆيت قازاقستاندىق كورەرمەندەرگە «سۇلەيمەن سۇلتان» تەلەحيكاياسىنداعى مالكوچوگلۋ بالي بەي ءرولى ارقىلى تانىمال.
ساپار اياسىندا ول 23 مامىر كۇنى «ارمان 3D ازيا پارك استانا» كينوتەاترىنداعى گالا-كەشكە قاتىسادى. سونداي-اق, «قازاقستان» تەلەارناسىنىڭ ءتۇسىرىلىم الاڭىنا كەلىپ, بەلگىلى «تۇنگى ستۋديادا نۇرلان قويانباەۆ» تۇنگى شوۋىنىڭ قوناعى بولادى دەپ جوسپارلانۋدا. اتالعان باعدارلاما «قازاقستان» تەلەارناسىنىڭ ەفيرىندە 26 مامىر كۇنى ساعات 23:30-دا كورسەتىلەدى.
بۋراك – اكتەرلىكتەن بۇرىن مودەل بولعان. 2005 جىلى تۇرىكتىڭ ۇلتتىق Best Model of Turkey اتتى سۇلۋلىق سايىسىنىڭ جەڭىمپازى اتاندى. ال الەم بويىنشا وتكىزىلگەن Best Model of the World سايىسىندا 2-ورىنعا يە بولدى.
شىعارماشىلىق جولىن ەۋروپانىڭ تانىمال برەندتەرىن جارنامالاۋمەن باستادى. 2014 جىلى ىستامبۇل قالاسىندا ءوزىنىڭ Balibey Döner اتتى جەكە مەيرامحاناسىن اشقانىن ايتا كەتەيىك.
ەلامان قوڭىر.
دەرەك, سۋرەت: «قازاقستان» تەلەراديوكورپوراتسياسىنىڭ ءباسپاسوز قىزمەتى.